ۇلى بريتانيادا قازاق ورتالىعى اشىلدى
لوندون. KAZINFORM - تۇماندى البيوندا قازاقستان مەن ۇلى بريتانيا اراسىنداعى مادەني-دوستىق قارىم-قاتىناستى نىعايتۋعا باعىتتالعان قازاق ورتالىعىنىڭ اشىلۋ سالتاناتى ءوتتى.
ورتالىق كوركەم ءتىلىمىز بەن ۇلتتىق داستۇرلەرىمىزدى جەرگىلىكتى جۇرتشىلىقپەن كەڭىرەك تانىستىرۋدى جانە سول ەلدەگى قازاقتاردىڭ باسىن بىرىكتىرۋدى ماقسات ەتەدى، دەپ حابارلايدى Kazinform اگەنتتىگىنىڭ وسى ەلدەگى مەنشىكتى ءتىلشىسى عالىمجان قارامان ۇلى.
ۇلى بريتانياداعى قازاقتاردىڭ سانى جىلدان-جىلعا ارتىپ كەلەدى. وزىق وقۋ ورىندارىندا ءبىلىم الىپ جاتقان ستۋدەنتتەر جانە جەرگىلىكتى كومپانيالاردا ۋاقىتشا جۇمىس ىستەيتىن وتانداستارىمىز كوپ. جىراقتا جۇرسە دە، جۇرەگى تۋعان جەر دەپ سوعادى. قازاق ورتالىعى ەڭ الدىمەن سول قازاقتاردىڭ باسىن بىرىكتىرۋدى ماقسات ەتىپ وتىر.
«جالعىز تۇركيادان كەلگەن قازاق دياسپوراسى ەمەس، قىتايدان، موڭعوليادان، قازاقستاننان، ءارتۇرلى ماقساتپەن كەلگەندەر بار. وسى جاقتا 250-دەن استام قازاق قىزدارى بار، ولار بريتانيالىقتارعا تۇرمىسقا شىققان. سولاردىڭ باسىن قۇراپ، قازاق مادەنيەتىن، قازاق ءداستۇرىن، قازاق تاريحىن، قازاق جاستارىنا بولسىن، سولارعا ۇگىتتەپ جاتىرمىز»، - دەيدى ۇلى بريتانياداعى قازاق ورتالىعىنىڭ ءتوراعاسى يسمايل كەسيجي.
شەتەلدىكتەردىڭ قازاق مادەنيەتى مەن ونەرىنە دەگەن قىزىعۋشىلىعى زور. ديماش قۇدايبەرگەننىڭ تانىمالدىلىعى ارتقالى بەرى ءتىپتى كوبەيگەن. رەسمي تىركەلگەن جانكۇيەرلەرىنىڭ سانى مىڭ جارىمنان اسىپ جىعىلادى. سۇيىكتى ءانشىسىنىڭ اندەرىن ءتۇسىنۋ ءۇشىن قازاق ءتىلىن ۇيرەنىپ ءجۇر. بۇگىنگى ءىس-شارادا ولار ۇلتىمىزدىڭ ادەت-عۇرىپتارىمەن تانىستى.
«قۋانىش كەزىندە كامپيت شاشاتىن ءداستۇر بار ەكەنىن ءبىلدىم. بۇدان بولەك ۇلتتىق اسپاپ - دومبىرانىڭ ءۇنىن ەستىدىم»، - دەيدى ۋوريك ۋنيۆەرسيتەتىنىڭ ستۋدەنتى، تۇركيا ازاماتى حان ارال.
«قازاقتاردىڭ قوناقجايلىعى ۇنادى. جاقىن تانىماسا دا، داستارقانعا شاقىرىپ، قۇرمەت كورسەتىپ جاتىر»، - دەيدى ۋوريك ۋنيۆەرسيتەتىنىڭ تاعى ءبىر ستۋدەنتى، پاكىستان ازاماتى شاحيم دجاففري.
ورتالىقتىڭ اشىلۋى ۋوريك ۋنيۆەرسيتەتىندەگى قازاق جاستارىنىڭ بالىمەن تۇسپا- تۇس كەلدى. جىل سايىن وتكىزىلەتىن ءىس-شارا بيىل دا ۇلىبريتانيانىڭ تۇكپىر-تۇكپىرىندە وقىپ جاتقان ستۋدەنتتەردىڭ باسىن قوستى. ولار قازاق تىلىندە ءان شىرقاپ، بي بيلەدى.
«بۇل ءىس-شارانى ستۋدەنتتەردىڭ وزدەرى ۇيىمداستىراتىنى قۋانتادى. ولار ءبىلىم الىپ قانا قويماي، كوپشىلىكپەن ارالاسىپ، كوكجيەگىن كەڭەيتەدى. ەلشىلىك مۇنداي باستامالاردى ءاردايىم قولداپ وتىرۋعا دايىن»، - دەيدى قازاقستاننىڭ ۇلى بريتانياداعى ەلشىسى ماعجان ءىلياسوۆ.
«وسى جىلعى بالدى ءبىز ۇلتتىق ناقىشتا وتكىزەمىز دەپ شەشتىك. قازاقتىڭ سالت-داستۇرلەرىن، ادەت-عۇرىپتارىن پاش ەتىپ كورسەتۋ، كەلەسى ۇرپاققا دارىپتەۋ - ءاربىرىمىزدىڭ مىندەتىمىز. مىسالعا، جۇزىك، سىرعا دەلىك نەمەسە وسىنداي شاپاندار كيىپ كەلۋ كەرەك بولدى»، - دەيدى قازاقستاندىق ستۋدەنت ىڭكار نۇرادىل.
ورتالىق قازاقستاندىق دارىندى جاس مۋزىكانتتاردى ۇلىبريتانياعا شاقىرىپ، ونەرىن ناسيحاتتاۋ جوسپارلانىپ وتىر. بۇدان بولەك، وتاندىق كاسىپكەرلەردىڭ ونىمىمەن جەرگىلىكتى حالىقتى تانىستىرۋ دا ويلاستىرىلىپ جاتىر. ورتالىق قىزمەتكەرلەرى قازاقتىڭ بيلەرى مەن كيىمدەرىن ترەندكە اينالدىرۋدى ماقسات ەتەدى.
اۆتور
عالىمجان قارامان ۇلى
