ۇلى بريتانيادا جالپى ىشكى ءونىم كورسەتكىشى تومەندەدى

ۇلى بريتانيا ەكونوميستەرى ءۇشىن كۇتپەگەن جاڭالىق. ەل ەكونوميكاسى قازان ايىندا قايتا قىسقاردى. بۇل ازداي، جاڭا جىلدا جارىق پەن جىلۋ اقىسى تاعى قىمباتتايتىن بولدى. ول ازىق- تۇلىك ونىمدەرى مەن قىزمەت قۇنى دا وسەدى دەگەن ءسوز، دەپ حابارلايدى Kazinform ءتىلشىسى.

ۇلى بريتانيادا ءومىر ءسۇرۋ قۇنى قىمباتتاپ، حالىقتىڭ قالتاسىن قاقتى. ينفلياتسيانى تەجەۋ ءۇشىن كوتەرىلگەن پايىزدىق مولشەرلەمە قازىر 10 جىلدان بەرى بولماعان وتە جوعارى دەڭگەيدە. روجدەستۆو مەرەكەسى قارساڭىندا ءبىر-بىرىنە سىيلىق سىيلاپ ۇيرەنگەن اعىلشىنداردا ەندى اقشا جوق. تاۋارلارىنا ءتۇرلى جەڭىلدىكتەر ۇسىنسا دا، دۇكەندەردىڭ ساۋداسى جۇرمەي جاتىر.

«قازىر حالىق مايدا-شۇيدە زات ساتىپ الۋعا اقشا تاپپاي قينالىپ جاتىر. سوڭعى زەرتتەۋلەرگە سايكەس جاپپاي ساتىلىم بولاتىن «جومارت جۇما» ناۋقانى كەزىندە بىلتىر سۇرانىستىڭ 61 پايىزعا، بيىل 44 پايىزعا ازايعانىن اڭعارىپ وتىرمىز»، - دەيدى تۇتىنۋ سالاسى بويىنشا ساراپشى جاسمين بيرتلز.

ۇلى بريتانيانىڭ جالپى ىشكى ءونىم كورسەتكىشى قىركۇيەكپەن سالىستىرعاندا 0,3 پايىزعا تومەندەدى. ۇلتتىق ستاتيستيكا باسقارماسىنىڭ مالىمەتتەرىنە سايكەس بۇعان اۋا رايىنىڭ قولايسىزدىعى اسەر ەتسە كەرەك. سەبەبى قۇرىلىس جۇمىستارى تۇرالاپ، بولشەك ساۋدا، قىزمەت كورسەتۋ جانە تۋريزم سالالارىندا ىركىلىس بولعان. بيلىكتەگىلەر بولاشاعىمىز بۇلىڭعىر دەپ دابىل قاققانداردى جارقىن جاقتا ءومىر سۇرۋگە شاقىرىپ وتىر.

«ءوز-وزىمىزگە دەگەن سەنىمدىلىگىمىزدى جوعالتپاۋىمىز كەرەك. ءبىز برەكسيتتى باستان كەشىردىك. بۇل پارلامەنت جۇمىسىنىڭ توقتاۋىنا، ساياسي تۇرعىدا وتە قيىن كەزەڭدەرگە الىپ كەلدى. بريتان حالقى ەۋرووداقتان شىعامىز دەپ داۋىس بەرگەنىمەن پارلامەنت بۇل بىرلەستىك ەلدەرىمەن ورتاق مامىلەگە كەلە الماي ابدىراپ قالدى. سالدارىنان تەرەزا ءمەيدىڭ ۇكىمەتى بيلىكتەن كەتتى. ودان كەيىن پاندەميا باستالدى»، - دەيدى ۇلى بريتانيانىڭ قارجى ءمينيسترى دجەرەمي حانت.

ەكونوميكالىق قيىندىقتار سالدارىنان ستەرلينگ فۋنتى دا السىرەدى. دوللار مەن ەۋروعا شاققانداعى باعامى ول ەڭ تومەنگى مەجەگە جەتتى. بۇل جاعداي رەتسەسسيا قاۋپىن ارتتىرادى جانە انگليا بانكىنىڭ پايىزدىق مولشەرلەمەنى جوعارى دەڭگەيدە ۇستاپ تۇرۋعا ماجبۇرلەيدى دەدى ماماندار. شىنىمەن دە سولاي بولدى. ۇلى بريتانيانىڭ باس قارجى ينستيتۋتى مولشەرلەمەنى سول كۇيىندە قالدىرۋدى شەشتى.

«ءدال قازىر، مەنىڭ ويىمشا، پايىزدىق مولشەرلەمەنى تومەندەتۋ تۋرالى اڭگىمە باستاۋ ءالى ەرتە. ءبىز الدىمەن جاقسى ناتيجەلەر كورسەتۋىمىز كەرەك. مەن جەتىستىكتەردى كورىپ قۋانامىن، ءبىراق ولار ازدىق ەتەدى. سوندىقتان جاقىن ارادا مولشەرلەمەنى تومەندەتە المايمىز»، - دەيدى انگليا بانكىنىڭ باسشىسى ەندريۋ بەيلي.

بريتان ۇكىمەتى ينفلياتسيا دەڭگەيىن 2 پايىزعا دەيىن تومەندەتۋدى جوسپارلاعان ەدى. ءبىراق ول 11 پايىزدان 4,5 پايىزعا دەيىن عانا ازايدى. انگليا بانكىنىڭ وكىلدەرى ەكونوميكالىق كورسەتكىشتەر تۇراقتالعان كەزدە عانا ارەكەت ەتۋگە بەل بۋىپ وتىر. ا ق ش- تىڭ فەدەرالدىق رەزەرۆتىك جۇيەسى كەلەسى جىلى مولشەرلەمەنى تومەندەتۋدى مەجەلەگەنىمەن ۇلى بريتانيادا جاعداي ازىرگە وزگەرمەيدى.

«مەنىڭ ويىمشا، ينفلياتسيانىڭ قازىرگى دەڭگەيىن ۇستاپ تۇرۋ باستى ماسەلە بولىپ قالا بەرەدى. ءبىز بىلتىر كوپ ماسەلەگە تاپ بولدىق. سونلىقتان بىزدەگى احۋالدى ا ق ش- تاعى جاعدايمەن سالىستىرۋعا كەلمەيدى»، - دەيدى انگليا بانكىنىڭ باسشىسى ەندريۋ بەيلي.

قىلىشىن سۇيرەتىپ قىس كەلگەندە جارىق پەن جىلۋدىڭ باعاسى وسكەلى تۇر. ەنەرگەتيكاعا جاۋاپتى مەكەمەنىڭ ەسەپتەۋىنشە، جاڭا جىلدان باستاپ ءاربىر وتباسىنىڭ ءبىر جىلدىق ورتاشا شىعىنى 5 پايىزعا ارتادى. قىمباتشىلىق انگليا، ۋەلس جانە شوتلاندياداعى جيىرما توعىز ميلليون وتباسىنا اسەر ەتپەك.

باعا تەك سولتۇستىك يرلانديادا وزگەرمەيدى. بىلتىر دا ءدال وسىنداي جاعداي بولعاندا، ۇكىمەت حالىققا قارجىلاي قولداۋ بىلدىرسە، بيىل ونداي كومەك كورسەتىلمەيىن دەپ تۇر. تاۋەلسىز بيۋدجەتتىك جاۋاپكەرشىلىك باسقارماسىنىڭ ەسەپتەۋىنشە، ينفلياتسيانى تەجەۋ ءۇشىن كەمىندە ءۇش-ءتورت جىل كەرەك.

اۆتور

عالىمجان قارامان ۇلى