تۇرمەدەگى بۇرىن-سوڭدى بولماعان قاتەلىك: ءبىر جىلدا 262 تۇتقىن زاڭسىز بوساتىلعان
استانا. KAZINFORM - ۇلى بريتانيا باتىس ەۋروپاداعى ەڭ كوپ تۇتقىن سانى بار ەلدەردىڭ كوشىن باستاپ تۇر، دەپ حابارلايدى Kazinform اگەنتتىگىنىڭ ءتىلشىسى.
ۇلى بريتانيادا 2024 -جىلدىڭ ناۋرىزىنان 2025 -جىلدىڭ ناۋرىزىنا دەيىن تۇرمەلەردەن قاتەلىكپەن 262 ادام بوساتىلعان. بۇل - ەل تاريحىنداعى ەڭ جوعارى كورسەتكىش، دەپ جازدى The Sun باسىلىمى قىلمىستىق-اتقارۋ قىزمەتى حابارلايدى.
مالىمەتكە سايكەس، ءبىرقاتار تۇتقىندار بيۋروكراتيالىق قاتەلىكتەردىڭ سالدارىنان بوستاندىققا شىقسا، كەيبىرەۋلەرى جەتكىلىكتى نەگىزسىز شارتتى تۇردە مەرزىمىنەن بۇرىن بوساتۋ باعدارلاماسىنا ەنگىزىلگەن. اتالعان باعدارلامانى بيلىكتەگى لەيبوريستىك پارتيا ىسكە قوسقان ەدى.
وپپوزيتسيا وكىلدەرى جاعدايدى سىنعا الدى. كونسەرۆاتيۆتىك پارتيا دەپۋتاتى الەك شەلبرۋك كورسەتكىشتەردى «الاڭداتارلىق» دەپ اتاپ، قىركۇيەككە دەيىن ادىلەت ءمينيسترى قىزمەتىن اتقارعان شابانا ماحمۋدتى جاۋاپكەرشىلىكتى موينىنا الۋعا شاقىردى.
بريتان ادىلەت مينيسترلىگى ءوز كەزەگىندە ارنايى جۇمىس توبىن قۇرىپ، قاتەلىكتەردى تۇزەتۋگە ۋادە بەردى.
ايتا كەتسەك، 2024 -جىلدىڭ قىركۇيەگىنەن 2025 -جىلدىڭ ناۋرىزىنا دەيىن شامامەن 26,5 مىڭ تۇتقىن ەلدەگى پەنيتەنتسيارلىق جۇيەنىڭ شامادان تىس جۇكتەمەسىن ازايتۋ ءۇشىن مەرزىمىنەن بۇرىن بوساتىلعان.
سوڭعى جاعداي وتكەن جازداعى انتييمميگرانتتىق تارتىپسىزدىكتەردەن كەيىن ۋشىعا ءتۇستى. سول كەزدە انگليا مەن ۋەلس تۇرمەلەرىندە وتىرعانداردىڭ سانى 2011 -جىلدان بەرگى رەكوردتىق دەڭگەيگە جەتكەن. وسىعان بايلانىستى ادىلەت مينيسترلىگى جۇكتەمەنى ازايتۋ شارالارىن قابىلدادى. سونىڭ ىشىندە شارتتى تۇردە مەرزىمىنەن بۇرىن بوساتۋعا رۇقسات ەتىلەتىن شەكتى مەرزىم سوت ۇكىمىنىڭ %50 ىنان %40 ىنا دەيىن قىسقارتىلدى.
