ۇلى بريتانيادا اۆتوكولىك ۇرلىعى %75 عا ارتتى
استانا. KAZINFORM - ۇلى بريتانيادا ۇرلانعان اۆتوكولىكتەردىڭ ءبىر بولىگى بىرىككەن اراب امىرلىكتەرى مەن گرۋزياعا جونەلتىلىپ، سول جەرلەردەن باسقا ەلدەرگە قايتا ساتىلادى، دەپ حابارلايدى Kazinform اگەنتتىگىنىڭ ءتىلشىسى.
سوڭعى ون جىلدا ۇلى بريتانيادا كولىك ۇرلىعى %75 عا ءوسىپ، جىلىنا شامامەن 130 مىڭ وقيعاعا جەتكەن. بۇل مالىمەتتەر قورعانىس سالاسىنداعى كورولدىك بىرىككەن زەرتتەۋلەر ينستيتۋتىنىڭ «ۇلىبريتانياداعى ۇيىمداسقان اۆتوكولىك ۇرلىعى: ۇردىستەر مەن سىن- قاتەرلەر» اتتى بايانداماسىندا كەلتىرىلگەن.
ۇرلىقتار تولقىنىنىڭ ارتىندا جوعارى تەحنولوگيامەن جابدىقتالعان قىلمىستىق سينديكاتتار تۇر. ولار زاماناۋي سيفرلىق قۇرالداردى پايدالانىپ، شىنايىعا وتە ۇقساس قۇجاتتاردى قولدان جاسايدى، كولىكتەردىڭ سايكەستەندىرۋ نومىرلەرىن وزگەرتەدى، شەتەلگە كولىك تاسىمالداۋدىڭ ءتيىمدى حالىقارالىق سىزبالارىن قولدانادى جانە بۇل رەتتە بريتاندىق قۇقىق قورعاۋ ورگاندارىنىڭ ءالسىز ءارى ۇيلەستىرىلمەگەن ارەكەتتەرىن ءتيىمدى پايدالانادى.
- اۆتوكولىك ۇرلىعى ەندى ۇساق، كەزدەيسوق قىلمىس ەمەس. بۇل- ىشكى جانە حالىقارالىق اسپەكتىلەرى بار، تابىسى جوعارى، تاۋەكەلى تومەن، ۇيىمداسقان اۋىر قىلمىستىڭ ءبىر ءتۇرى، - دەپ جازادى زەرتتەۋ اۆتورلارى.
ۇلى بريتانيانىڭ بەدەلدى ساراپتامالىق ورتالىعى دايىنداعان ەسەپتە كولىك ۇرلىعى ەل ەكونوميكاسىنا جىل سايىن شامامەن 2,3 ميلليارد دوللار شىعىن كەلتىرەتىنى جانە بۇل جاعداي 2021 -جىلدان بەرى اۆتوساقتاندىرۋ سىياقىسىنىڭ %82 عا وسۋىنە سەبەپ بولعانى ايتىلعان.
قۇجاتتا ۇلى بريتانيا پورتتارىنان بىرىككەن اراب امىرلىكتەرى، گرۋزيا، كيپر جانە كونگو دەموكراتيالىق رەسپۋبليكاسى سياقتى ەلدەرگە ۇزدىكسىز اۆتوكولىك اعىمى ءجۇرىپ جاتقانى سيپاتتالادى. بۇل ەلدەردەن كولىكتەر كورشىلەس مەملەكەتتەرگە ساتىلادى. ۇرلىقتان باستاپ شەتەلگە جونەلتۋگە دەيىنگى بۇكىل پروتسەسس كەيدە ءبىر تاۋلىكتەن از ۋاقىتتى الادى.
قۇقىق قورعاۋ جۇيەسىنىڭ جاۋابى ءالسىز ءارى رەتسىز بولىپ وتىر، بۇل ستاتيستيكادان كورىنەدى: 2024 -جىلى اۆتوكولىك ۇرلىعىنا قاتىستى ايىپ تاعىلعان ىستەردىڭ ۇلەسى نەبارى %2,6 عانا بولدى. بۇل كورسەتكىش ون جىل بۇرىن %9,2 بولاتىن.
مۇنداي قۇلدىراۋدىڭ باستى سەبەپتەرىنىڭ ءبىرى - كادر تاپشىلىعى، ونىڭ سالدارىنان مامانداندىرىلعان بولىمشەلەردىڭ جۇمىسى السىرەپ وتىر. مىسالى، لوندوندا بۇرىن اۆتوكولىك قىلمىستارىن تەرگەۋمەن اينالىسقان بولىمشە ونداعان قىزمەتكەردەن بىرنەشە وفيتسەرگە دەيىن قىسقارعان.
