ۇلى بريتانيا ترامپتى قالاي قارسى الماق
استانا. KAZINFORM - ۇلى بريتانيا تاريحىندا العاش رەت شەتەلدىك كوشباسشى ەكىنشى مارتە مەملەكەتتىك ساپارمەن كەلۋگە شاقىرتۋ الىپ وتىر.
ساپار باعدارلاماسى
ۇلى بريتانياعا مەملەكەتتىك ساپار - بۇل شەتەلدىك كوشباسشىنى پروتوكولدىق قابىلداۋدىڭ ەڭ جوعارى دەڭگەيدەگى ءراسىمى. ول ەكىجاقتى قارىم-قاتىناستاردىڭ تەرەڭدىگىن كورسەتەتىن، ال دايىندىق بىرنەشە ايعا سوزىلاتىن مۇقيات ۇيىمداستىرىلعان سالتاناتتى شارالار جيىنتىعى.
ترامپ پەن ونىڭ جۇبايى مەلانيا لوندونعا سەيسەنبى كۇنى كەشكە كەلەدى. سارسەنبى كۇنى تاڭەرتەڭ ولاردى ۆيندزور قامالىندا كۇتەدى. ا ق ش پرەزيدەنتىن كورولدى قۇرمەتتەگەندەي قارسى الادى: زەڭبىرەكتەن دۇركىن-دۇركىن وق اتىلىپ، گۆارديا قاراۋىلى ساپ تۇزەيدى، كوپتەگەن تۋ تىگىلىپ، وركەستر مەن ۆولىنكاشىلار ونەر كورسەتەدى، جويعىش ۇشاقتار ۇشىپ ءوتىپ، سالتاناتتى تۇسكى اس پەن كەشكى بانكەت ۇيىمداستىرىلادى.
ۇلى بريتانيا ەڭ ءىرى ساۋدا ارىپتەسى سانالاتىن مەملەكەتتىڭ باسشىسىن ەرەكشە قوناقجايلىلىقپەن قارسى الۋعا دايىندالىپ جاتىر. ۇلى بريتانيا ساۋدا-ساتتىعىنىڭ شامامەن 18 پايىزى ا ق ش- قا تيەسىلى.
ساپار اياسىندا ۆيندزور قامالىنا ەكسكۋرسيا ەرەكشە ورىن الماق. وندا ا ق ش تاريحىمەن بايلانىستى كورولدىك كوللەكتسيانىڭ جاۋھارلارى كورسەتىلەدى. سونداي-اق ەرلى-زايىپتىلار اۋليە گەورگي شىركەۋىنە بارىپ، شىركەۋ حورىن تىڭدايدى.
بەيسەنبى كۇنى ترامپ ۇلى بريتانيا پرەمەر-ءمينيسترى كير ستارمەرمەن كەلىسسوزدەر وتكىزەدى. ءبىراق، ۇلى بريتانيا ۇكىمەتىنىڭ باسشىسى الدىمەن وعان قالا سىرتىنداعى چەكەرس رەزيدەنسياسىندا ەكسكۋرسيا ۇيىمداستىرىپ، ۋينستون چەرچيللدىڭ مۇراعاتتارىن كورسەتەدى. ال ەكى جاقتى كونسۋلتاتسيادان كەيىن كوشباسشىلار ىسكەرلىك قابىلداۋعا قاتىسادى.
ترامپ وزىمەن بىرگە ءىرى كاسىپكەرلەر دەلەگاتسياسىن الىپ كەلەدى. ولاردىڭ قاتارىندا Nvidia كومپانياسىنىڭ باسشىسى دجەنسەن حۋانگ، OpenAI باسشىسى سەم التمان، Apple كومپانياسىنىڭ باس ديرەكتورى تيم كۋك، BlackRock ءتوراعاسى لارري فينك جانە Blackstone باسشىسى ستيۆەن شۆارتسمان بار.
بولجام مەن شىندىق
- ەكى ەل كوشباسشىلارى سوڭعى ايلاردا قالىپتاستىرعان بەلسەندى تەحنولوگيالىق جانە ەكونوميكالىق كۇن ءتارتىبى الدىڭعى ورىنعا شىعادى. گازا نەمەسە ۋكراينا ماسەلەلەرى بويىنشا ەلەۋلى ديپلوماتيالىق سەرپىلىس كۇتۋ ورىنسىزداۋ بولار، - دەيدى كورولدىك حالىقارالىق قاتىناستار ينستيتۋتى ا ق ش جانە سولتۇستىك امەريكا باعدارلاماسىنىڭ ديرەكتورى لورەل رەپپ.
ساپاردىڭ باستى ناتيجەسى ا ق ش پەن ۇلى بريتانيانىڭ اۋقىمدى تەحنولوگيالىق سەرىكتەستىك تۋرالى جاريالاۋى بولۋى ىقتيمال. ول جاساندى ينتەللەكت، كۆانتتىق ەسەپتەۋلەر جانە سيرەك كەزدەسەتىن ماسەلەسىنە قاتىستى ورتاق ۇستانىم قالىپتاستىرۋدى كوزدەيدى. سونداي-اق، اتوم ەنەرگەتيكاسى سالاسى بويىنشا دا كەلىسىم ازىرلەنىپ جاتىر. قۇجات جاڭا ينۆەستيتسيالار مەن اتوم ستانسالارىن بىرلەسىپ ازىرلەۋدى قاراستىرادى.
وسى جىلدىڭ مامىرىندا ۇلى بريتانيا ترامپ ەنگىزگەن باج سالىعىنان كەيىن ا ق ش- پەن ساۋدا كەلىسىمىن جاساعان العاشقى ەل بولدى. بۇل قيىندىققا تاپ بولعان بريتان ەكونوميكاسى ءۇشىن ماڭىزدى جەڭىس سانالادى. الايدا، ەل ا ق ش- پەن بۇرىنعىعا قاراعاندا ءالى دە قولايسىز جاعدايدا ساۋدا جاساسىپ وتىر.
بۇعان قوسا، «ەكونوميكالىق وركەندەۋ تۋرالى كەلىسىم» دەپ اتالاتىن قۇجاتتىڭ زاڭدى تۇردە مىندەتتەۋ سيپاتىنا قاراعاندا ساياسي ءمانى باسىم. قازىرگى ۋاقىتتا بۇل كەلىسىم اياسىندا بريتان كولىكتەرىنە سالىناتىن تاريف 25 پايىزدان 10 پايىزعا دەيىن تومەندەتىلدى. ءبىراق 100 مىڭ كولىككە كۆوتا ەنگىزىلدى. ال ايەروعارىش ونىمدەرىنە سالىناتىن باج سالىعى نولگە ءتۇسىرىلدى. ال لوندون بولسا امەريكالىق سيىر ەتى مەن ەتانولعا سالىناتىن 20 پايىز يمپورتتىق باج سالىعىن الىپ تاستادى.
ەندى ستارمەر ا ق ش پرەزيدەنتىمەن جۇزبە-ءجۇز تىلدەسۋ بارىسىندا بريتاندىق بولات، اليۋميني، فارماتسيەۆتيكالىق ونىمدەر جانە شوتلاند ۆيسكيىنە سالىناتىن امەريكالىق تاريفتەردى تومەندەتۋگە تىرىسۋى مۇمكىن. بۇل سالالار بويىنشا ەنگىزىلگەن باج سالىعى بريتاندىق وندىرۋشىلەرگە ميلليونداعان فۋنت ستەرلينگ شىعىن كەلتىرىپ وتىر.
8 -مامىردا ترامپ ا ق ش پەن ۇلى بريتانيا جاڭا ساۋدا كەلىسىمىن جاساسقانىن جاريالاعان ەدى. الايدا سول كەزدە بولات تاريفتەرى ماسەلەسى اشىق قالعان- دى. 26 -ماۋسىمدا لوندون بولات ونىمدەرىن ستراتەگيالىق ماڭىزدى رەسۋرستار تىزىمىنە ەنگىزۋدى جوسپارلاپ وتىرعانى بەلگىلى بولدى.
قىتاي مەن رەسەي كۇن تارتىبىندە
لوندوننىڭ بەيجىڭمەن قارىم-قاتىناسى كەلىسسوزدەردىڭ تاعى ءبىر ماڭىزدى تاقىرىبىنا اينالماق. بۇرىنعى كونسەرۆاتيۆتى پرەمەر-مينيسترلەر بوريس دجونسون، ريشي سۋناك جانە ليز تراسس تۇسىندا قىتايمەن ساياسي بايلانىستار ەداۋىر ناشارلاپ كەتكەن ەدى. دەگەنمەن، دەۆيد كەمەرون بريتاندىق ساياساتتىڭ تۇتقاسىن ۇستاپ تۇرعان 2010-2016 -جىلدارى بۇل قاتىناستاردى بريتان-قىتاي قاتىناستارىنىڭ «التىن ءداۋىرى» دەپ اتاعان بولاتىن.
2024 -جىلى شىلدەدە بيلىككە كەلگەن لەيبوريستەر پارتياسى بۇل باعىتتى كەرى بۇرۋعا تالپىنىس جاساپ جاتىر. وتكەن جىلدىڭ قاراشاسىندا برازيليادا وتكەن ستارمەر مەن ق ح ر ءتوراعاسى ششي جينپيڭنىڭ كەزدەسۋى جاڭا كەزەڭنىڭ سيمۆولىنا اينالدى. سودان بەرى لوندون مەن بەيجىڭ ءبىر-بىرىنە قاراي ساقتىقپەن جاقىنداي باستادى.
قىتايمەن ىنتىماقتاستىقتى جاڭعىرتۋ بريتان ەكونوميكاسىنا قوسىمشا 1 ميلليارد فۋنت ستەرلينگ اكەلۋى مۇمكىن. ال بەس جىلدا ەل جالپى قۇنى 600 ميلليون فۋنت بولاتىن مامىلەلەرگە قول جەتكىزۋدى كوزدەيدى. بۇل جاعداي قىتايدى تەجەۋ ساياساتىن ۇستاناتىن ترامپقا ۇناي قويۋى كۇمان تۋدىرادى.
ۋكرايناداعى جاعداي دا نازار تىس قالماق ەمەس. ازىرشە ترامپتىڭ ۆلاديمير پۋتينمەن الياسكاداعى كەزدەسۋىنەن كەيىن دە، ونىڭ اق ۇيدەگى ۆلاديمير زەلەنسكيمەن جانە ەۋروپالىق كوشباسشىلارمەن كەلىسسوزدەرىنەن كەيىن دە ايتا قويارلىقتاي ىلگەرىلەۋشىلىك بايقالمايدى.
وتكەن دەمالىس كۇنى ترامپ ناتو- عا مۇشە بارلىق ەل رەسەيلىك مۇنايدى ساتىپ الۋىن توقتاتقان جاعدايدا عانا رەسەيگە قارسى «اۋىر» سانكسيالار ەنگىزەتىندىگىن مالىمدەگەن بولاتى.
پرەزيدەنت ترامپتىڭ بەيبىتشىلىكتى مۇمكىندىگىنشە تەز ورناتۋعا ۇمتىلۋى اياسىندا، ستارمەر ءوزىنىڭ ەۋروپالىق وداقتاستارىنىڭ كوزقاراسىن قولدايدى. ولار ەڭ ءبىرىنشى كەزەكتە كيەۆكە بەرىك جانە سەنىمدى كەپىلدىكتەر ۇسىنۋعا باسىمدىق بەرەدى.
ەكى كوشباسشى ءبىر شىنىاياق اعىلشىن شايى ۇستىندە ساۋدا سالاسىنداعى وتە سەزىمتال ماسەلەلەر بويىنشا ورتاق ءتىل تابىسىپ، XXI عاسىردىڭ ەڭ وزىق تەحنولوگيالارى بويىنشا ءبىرىڭعاي ستاندارتتاردىڭ نەگىزىن قالاۋ جولىن تابا الا ما، الدە ا ق ش ءوز جولىمەن ءجۇرۋدى ءجون كورە مە؟ بۇعان جاۋاپتى وسى اپتادا بىلەمىز. قالاي بولعاندا دا، لوندون ترامپقا كورولدىك ءسان-سالتانات زور اسەر قالدىرادى جانە ايرىقشا ەكى جاقتى قاتىناستاردى تەرەڭدەتۋگە نەگىز بولادى دەپ ۇمىتتەنىپ وتىر.
اۆتور
مارلان جيەمباي
