ۇلى بريتانيا قازاقستاندىقتار ءۇشىن ۆيزا باعاسىن قىمباتتاتادى

بولاشاقتا ۇلى بريتانياعا ۆيزا الۋعا ءوتىنىش بەرگەلى جۇرسەڭىز - باعا ءسىز ويلاعاننان قىمبات بولۋى مۇمكىن، سەبەبى ەل كەلەسى ايدان باستاپ ۆيزانىڭ بارلىق ءتۇرىنىڭ باعاسىن %15 قىمباتتاتۋدى جوسپارلاپ وتىر، دەپ حابارلايدى قازاقپارات ەل ۇكىمەتىنە سىلتەمە جاساپ.

بۇل جاڭالىق الەمنىڭ تۇكپىر-تۇكپىرىنىڭ ستۋدەنتتەرى مەن تۋريستەرىنە قاتىستى. ونىڭ ىشىندە ۇلى بريتانياعا كىرۋ جانە ەلدە بولۋ ءۇشىن ۆيزا سۇرالاتىن قازاقستاندىقتار دا بار.

جاڭا زاڭ بويىنشا، ماسەلەن، التى ايدان اسپايتىن قوناق ۆيزاسى 15 فۋنت ستەرينگكە قىمباتتاپ، قۇنى 115 فۋنت ستەرلينگ (شامامەن 67 مىڭ تەڭگە) بولادى. سونىمەن قاتار، 2، 5 جانە 10 جىلدىق قوناق ۆيزالارىنىڭ دا باعاسى وسەدى.

ۇلى بريتانيادان تىس جەردە ستۋدەنت ۆيزاسىن الۋعا ءوتىنىش بەرۋ دە ايتارلىقتاي قىمباتتايدى. ەلدە وقيتىندار 490 فۋنت ستەرلينگ (288 مىڭ تەڭگە) تولەۋى كەرەك.

بۇل - ەل ىشىندە ۆيزا الۋ ءۇشىن بەرىلەتىن ءوتىنىش باعاسىمەن بىردەي بولادى.

وزگەرىستەر رەيسىن اۋىستىرۋ نەمەسە قاجەت جەرىنە جەتۋ ماقساتىندا باسقا كولىككە وتىرۋ ءۇشىن ەلگە كىرگىزەتىن ترانزيتتىك ۆيزاعا قاتىستى ەمەس.

شىلدەدە ۇلى بريتانيا پرەمەر-ءمينيسترى مەملەكەتتىك سەكتورداعى جالاقىنى كوتەرۋ ءۇشىن ۆيزا باعاسى قىمباتتايتىنىن ايتقان بولاتىن.

جالپى قوسىمشا ۆيزا جيناعى ەل ەكونوميكاسىنا 1 ميلليارد ەۋرودان ارتىق تابىس اكەلەدى، دەپ حابارلادى Euronews.