ەلوردانىڭ جەكە تابىسى 1 تريلليون تەڭگەدەن استى - جەڭىس قاسىمبەك

استانا. KAZINFORM - استانا قالاسى ەكونوميكاسىنىڭ نەگىزگى درايۆەرى - شاعىن جانە ورتا بيزنەس، ول ەلوردا ەكونوميكاسىنىڭ 72,1 پايىزىن قۇرايدى.

- الەۋمەتتىك- ەكونوميكالىق كورسەتكىشتەر بويىنشا وڭ ديناميكا بايقالادى. قالا ەكونوميكاسى وسۋدە. جالپى وڭىرلىك ءونىم ءبىرىنشى جارتىجىلدىقتىڭ قورىتىندىسى بويىنشا 7 پايىزدى قۇرادى (5,4 تريلليون تەڭگە). بيىل جالپى وڭىرلىك ءونىم سەكتورىنىڭ ۇلەسى 13,9 پايىزدان 15,7 پايىزعا دەيىن ءوسۋى بايقالادى. بۇل ونەركاسىپ جانە قۇرىلىس سالالارىنىڭ بەلسەندى دامۋىنىڭ ارقاسىندا بولىپ وتىر. نەگىزگى درايۆەر شاعىن جانە ورتا بيزنەس، ياعني ەلوردا ەكونوميكاسىنىڭ 72,1 پايىزىن قۇرايدى. بۇل رەسپۋبليكا بويىنشا ەڭ جوعارى كورسەتكىش، - دەدى ەلوردا اكىمى جەڭىس قاسىمبەك ەلوردانىڭ الەۋمەتتىك-ەكونوميكالىق دامۋى تۋرالى ەسەپ بەرە تۇرىپ.

اكىمنىڭ ەسەبىنشە، قالادا 247 مىڭنان استام بيزنەس سۋبەكتىلەرى بار.

- ەلوردانىڭ جەكە تابىسى العاش رەت 1 تريلليون تەڭگەدەن استى. ينۆەستيتسيا كولەمى 1,6 تريلليون تەڭگەدەن اسىپ، 20,4 پايىزعا ۇلعايدى. بۇل سومانىڭ 70 پايىزدان استامى جەكە ينۆەستيتسيا ەسەبىنەن. ەلوردانىڭ قۇرىلىس سەكتورىنىڭ قارقىنى 870 ميلليارد تەڭگەدەن استى. 11 ايدىڭ ىشىندە 3,6 ميلليون شارشى مەتر تۇرعىن ءۇي پايدالانۋعا بەرىلدى، بۇل وتكەن جىلمەن سالىستىرعاندا 6,4 پايىزعا كوپ. جىل قورىتىندىسى بويىنشا بۇل كورسەتكىش 4 ميلليون شارشى مەترگە ارتىق، - دەيدى ول.

ايتا كەتەيىك، كەشە حابارلاعانىمىزداي استانادا قۇرىلىسى ۇزاققا سوزىلعان كەزەكتى ەكى تۇرعىن ءۇي كەشەنى اياقتالدى.