ەلوردانىڭ باس جوسپارى اياسىندا قانشا تۇرعىن ءۇي سالىنادى
استانا. KAZINFORM - استانا قالاسىنىڭ 2035-جىلعا دەيىنگى باس جوسپارى اياسىندا بىرنەشە مەملەكەتتىك تۇرعىن ءۇي سالىنادى.
بۇل تۋرالى «استانا باس جوسپارى» عىلىمي-زەرتتەۋ جوبالاۋ ينستيتۋتىنىڭ باس ديرەكتورى رۋسلان جاقىپوۆ ءمالىم ەتتى.
«باس جوسپاردا 43 مەملەكەتتىك تۇرعىن ءۇي، 20 جاتاقحانا، 11 جالعا بەرىلەتىن تۇرعىن ءۇي جانە 12 مەملەكەتتىك كرەديتتىك تۇرعىن ءۇي سالۋ كوزدەلگەن. ونىڭ ىشىندە 18 تۇرعىن ءۇي وبەكتىسىن 2025-جىلى سالۋ كوزدەلىپ وتىر»، - دەدى رۋسلان جاقىپوۆ ەلوردا ءماسليحاتى جانىنداعى قوعامدىق كەڭەس وتىرىسىندا.
ودان ءارى استانا باس جوسپارى مەكەمەسىنىڭ باسشىسى جاڭا ءورت دەپولارى سالىناتىنىن ايتتى.
«2030-جىلعا دەيىن 19 ءورت دەپوسىن سالۋ جوسپارلانىپ وتىر. ونىڭ ىشىندە 3 وبەكتى قۇرىلىسى اياقتالۋعا جاقىن، ولار ۇركەر، ءوندىرىس جانە كوكتالدا ورنالاسقان. سونىمەن قاتار 2030-جىلعا دەيىن 5 ءورت ءسوندىرۋ ءبولىمى قايتا جوندەۋدەن وتەدى جانە ءبىر ءورت ءسوندىرۋ ستانساسى مەن وقۋ-جاتتىعۋ ورتالىعى سالىنادى»، - دەيدى ول.
ايتا كەتەيىك، بۇگىن استانا باس جوسپارى مەكەمەسىنىڭ قابىرعاسىندا قوعامدىق كەڭەس وتىرىسى ءوتتى. ول جەردە ەلوردانىڭ 2035-جىلعا دەيىن باس جوسپارىن ىسكە اسىرۋ بارىسى تالقىلاندى. جوبانىڭ ماقساتى - جيناقى ءارى ءتيىمدى قالا قۇرۋ.
بۇعان دەيىن 2025-جىلى استانادا كارىز سۋىن تازالايتىن جۇيە قۇرىلىسى سالىناتىنىن حابارلاعان ەدىك.
ەسكە سالا كەتسەك، استانا قالاسىنىڭ 2035-جىلعا دەيىنگى باس جوسپارى بىلتىر قاراشادا تالقىلاۋعا شىعارىلدى.
جوسپار كەلەشەكتەگى كەشەندى دامۋدى، اۋماقتى جوسپارلى ۇيىمداستىرۋدى، الەۋمەتتىك جانە ينجەنەرلىك-كولىك ينفراقۇرىلىم جۇيەسى باعىتتارىن ايقىندايتىن نەگىزگى قۇجات.
