ەلورداداعى EXPO قالاشىعى سيفرلىق دامۋ مينيسترلىگىنىڭ قاراماعىنا وتەدى
استانا. KAZINFORM - ەلورداداعى EXPO قالاشىعى سيفرلىق دامۋ مينيسترلىگىنىڭ قاراماعىنا وتەدى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ ايتتى.
- ءبارى راس، QazExpoCongress كومپانياسىن سيفرلىق دامۋ مينيسترلىگىنىڭ قاراۋىنا بەرۋ تۋرالى شەشىم ۇكىمەت قاۋلىسىمەن قابىلداندى. وسى جىلدىڭ 1-شىلدەسىنەن ءوتۋى ءتيىس. وسىناۋ ەكسپو قالاشىعىن ودان ارى قاراي دامىتۋعا قاتىستى جوسپارىمىز بار. بۇل ەلىمىزدىڭ ەكونوميكاسىن دامىتۋ ءۇشىن ءوزىنىڭ يننوۆاتسيالىق ۇلەسىن قوساتىن قالاشىققا اينالۋى ءتيىس، - دەدى مينيستر پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرىنىڭ ساۋالىنا وراي.
بۇگىن پارلامەنت پالاتالارىنىڭ بىرلەسكەن وتىرىسىندا ۇكىمەت جانە جوعارى اۋديتورلىق پالاتانىڭ 2024 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرى بەكىتىلدى.
وتىرىس سوڭىندا پرەمەر- مينيستر ولجاس بەكتەنوۆ ۇكىمەت ءوز جۇمىسىندا مەملەكەت مۇددەلەرىن ءاردايىم ءبىرىنشى ورىنعا قوياتىنىن ايتتى.
- ۇكىمەت جۇمىسىندا جەتىستىكتەر دە، قاتەلىكتەر دە بولادى. ءومىر بولعاننان كەيىن قاتەلىكسىز بولمايدى. ءبىراق، ەڭ باستى ايتاتىنىم، ۇكىمەت ءوز جۇمىسىندا مەملەكەت مۇددەلەرىن ءاردايىم ءبىرىنشى ورىنعا قويادى. سوندىقتان الداعى ۋاقىتتا دا ورتاق جۇمىسىمىز جەمىستى بولسىن، - دەدى ولجاس بەكتەنوۆ.
