ەلورداداعى پارادقا ەل وڭىرلەرىنەن سوعىس ارداگەرلەرى كەلدى
استانا. KAZINFORM - ۇلى جەڭىستىڭ 80 جىلدىعىنا ارنالعان اسكەري پارادقا ەل وڭىرلەرىنەن سوعىس ارداگەرلەرى كەلدى.
قازىر ەل اۋماعىندا 105 سوعىس ارداگەرى بار. ولار 80 جىلدان بەرى بەيبىتشىلىكتىڭ قادىر-قاسيەتىن قازىرگى ۇرپاققا ايتىپ، ءتۇسىندىرىپ كەلەدى. وسى ورايدا بۇگىنگى اسكەري پارادقا 6 سوعىس ارداگەرى ارنايى كەلىپ، قاتىسىپ وتىر.
اتاپ ايتقاندا، استانا قالاسىنان رزاعۇل بايكەشيەۆ، الماتى قالاسىنان ۆلاديمير بەلوزەروۆ، قوسشى قالاسىنان نۇرقاسىم اجىتايەۆ، قوستاناي قالاسىنان قاسىمحان الدابەرگەنوۆ، وسكەمەن قالاسىنان قۇرمات راحيموۆ، قاراعاندى قالاسىنان گريگوريي ستەپەنكو كەلدى.
بۇدان بۇرىن 2025 -جىلعى 1-ساۋىردەگى جاعداي بويىنشا قازاقستاندا ەكىنشى دۇنيەجۇزىلىك سوعىسىنىڭ 111 ارداگەرى، سونداي-اق ۇلى جەڭىسكە ۇلەس قوسقان باسقا ساناتتاعى 41468 ارداگەر تۇرىپ جاتقانىن جازعان ەدىك.
ەسكە سالساق، بيىل اقپان ايىندا ۇلتتىق ۇلان ساربازدارى 101 جاستاعى ارداگەر رزاعۇل بايكەشيەۆتى ارنايى قۇتتىقتاعان ەدى.
