ەلوردادا تۇرعىن ءۇي قاپتاماسىنىڭ وپىرىلۋى: كۇدىكتىلەر قاشان انىقتالاتىنى ايتىلدى

استانا. KAZINFORM - ىشكى ىستەر ءمينيسترىنىڭ ورىنباسارى سانجار ءادىلوۆ ەلورداداعى تۇرعىن ۇيدە كىرپىش قاپتاماسىنىڭ قۇلاۋى بويىنشا ءىستىڭ تەرگەلۋىنىڭ ءمان-جايىن ايتتى.

وسى ورايدا ول بۇل جاعداي قىلمىستىق كودەكستىڭ ەكى بابى بويىنشا تەرگەلىپ جاتقانىن ايتتى.

- جاقىندا عانا ءتيىستى ۋاكىلەتتى مەملەكەتتىك ورگاندارمەن كەزدەسۋ وتكىزدىك. ايدىڭ سوڭىنا دەيىن استانا قالاسى سوت ساراپتاماسى ورتالىعى تەكسەرىپ جاتقان كەشەندى قۇرىلىس ساراپتاماسىنىڭ قورىتىندىسىن الامىز، - دەدى سانجار ءادىلوۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

بۇل تۇرعىدا ول ساراپتاما قورىتىندىسىنان كەيىن كىمنىڭ كۇدىكتى رەتىندە تانىلاتىنى انىقتالاتىنىن اتاپ ءوتتى.

ەستەرىڭىزگە سالا كەتسەك، 8-قاراشادا ەلوردادا تۇرعىن ءۇي كەشەنىنىڭ قاسبەتىندەگى كىرپىش قاپتاماسى مەن كونديتسيونەر قوندىرعىسىنىڭ بولىگى قۇلاپ، سالدارىنان 5 ادام زارداپ شەكتى. زارداپ شەككەندەردىڭ ءبارى № 1-كوپسالالى اۋرۋحاناعا جەتكىزىلدى.

18-قاراشا كۇنى جاراقات العان فەلدشەر ۇلدانا مىرزۋان كوز جۇمدى.