ەلوردادا ەسىرتكى جارنامالارىن ءوشىرۋ ءىس-شاراسى ءوتتى
استانا. KAZINFORM - ەلوردانىڭ الماتى اۋدانىندا قۇقىق بۇزۋشىلىقتىڭ الدىن الۋ ءىس-شاراسى ءوتتى، دەپ حابارلادى استانا اكىمدىگىنىڭ رەسمي سايتى.
رەيدتىك ءىس-شارانى الماتى اۋدانىنىڭ اكىمدىگى، پروكۋراتۋراسى جانە پوليتسيا باسقارماسى ۇيىمداستىردى. «جاستار رەسۋرستىق ورتالىعى» كوممۋنالدىق مەملەكەتتىك مەكەمەسىنە قاراستى ۆولونتەرلەر دە كومەككە كەلدى.
«بۇگىنگى ءىس-شارانىڭ ناقتى باعىتى-ناركوتيكالىق جانە سينتەتيكالىق زاتتاردىڭ جارناماسىن جويۋ. ياعني، اۋدانداعى ۇيلەر مەن مەكەمەلەردىڭ قابىرعالارىنا، تروتۋارلار مەن جولعا جازىلعان، ناركوتيكالىق جانە سينتەتيكالىق زاتتاردىڭ جارناماسى بولۋى مۇمكىن ءتۇرلى گراففيتي، QR كودتار، جازبالار، سۋرەتتەر ءوشىرىلدى. ءار نۇكتەلەرگە بارىپ، سۋرەتتەر مەن جازبالاردى وشىرۋگە بىزگە ۆولونتەرلەر دە قول ۇشىن بەرۋدە. قازىرگى كەزدە جازبالار مەن سۋرەتتەردىڭ پوليتسيا انىقتاعان 15 كە جۋىق ءتۇرى بەلگىلى. بۇنداي بەلگىسى بار گراففيتي، QR كودتاردى بىردەن وشىرەمىز. سونداي-اق باسقا دا سىزبالاردى تازالايمىز، ويتكەنى بۇل ۆانداليزمگە جاتادى»، - دەدى الماتى اۋدانى اكىمدىگى ىشكى ساياسات ءبولىمىنىڭ باسشىسى ايبىن ايدىن ۇلى.
ەسكە سالا كەتەيىك، بۇعان دەيىن استانادا 2 جىلدان بەرى جاسىرىن جۇمىس ىستەگەن ماينينگ فەرماسى انىقتالعانىن جازعان ەدىك.
