ەلوردادا سلوۆەنيا پرەزيدەنتىنىڭ باستاماسىمەن سۋرەت كورمەسى وتەدى

استانا. KAZINFORM - سلوۆەنيا پرەزيدەنتىنىڭ باستاماسىمەن ەلورداداعى مەكتەپتەردىڭ بىرىندە «جاس بال ارالارى بەيبىتشىلىكتى جاقتايدى» تاقىرىبى بويىنشا سۋرەت كورمەسى وتەدى.

بۇل تۋرالى اقوردادا ەلىمىزگە رەسمي ساپارمەن كەلگەن سلوۆەنيا پرەزيدەنتى ناتاشا پيرتس-مۋسارمەن كەلىسسوزدەردەن كەيىنگى ب ا ق وكىلدەرىنە ارنالعان بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ اتتى.

- ەرتەڭ سلوۆەنيا پرەزيدەنتىنىڭ باستاماسىمەن ەلورداداعى مەكتەپتەردىڭ بىرىندە «جاس بال ارالارى بەيبىتشىلىكتى جاقتايدى» تاقىرىبى بويىنشا سۋرەت كورمەسى وتەدى. وزدەرىڭىزگە ءمالىم، سلوۆەنيانىڭ قورشاعان ورتانى قورعاۋعا قاتىستى باستاماسىن ب ۇ ۇ- نىڭ باس اسسامبلەياسى دا قولدادى. 20-مامىر دۇنيەجۇزىلىك بال ارالارى كۇنى بولىپ بەلگىلەندى. ەكى ەلدىڭ وقۋشىلارىن حالىقارالىق دەڭگەيدەگى وسىنداي جوبالارعا تارتۋ ەكولوگيا جانە مادەنيەت سالاسىنداعى ىنتىماقتاستىقتى كۇشەيتەدى دەپ سەنەمىن، - دەدى قاسىم-جومارت توقايەۆ.

مەملەكەت باسشىسى وزەكتى حالىقارالىق جانە ايماقتىق ماسەلەلەر دە نازاردان تىس قالماعانىن باس ايتتى.

- قازاقستان مەن سلوۆەنيا اراسىندا جاھاندىق دەڭگەيدە تىعىز بايلانىس ورناعان. كوپتەگەن وزەكتى ماسەلە بويىنشا ۇستانىمدارىمىز ورتاق. ءقازىر گەوساياسي جاعداي وتە كۇردەلى. پرەزيدەنت پيرتس-مۋسار ەكەۋىمىز الەمدەگى قاقتىعىستاردى ب ۇ ۇ جارعىسى مەن حالىقارالىق قۇقىق قاعيداتتارىنا ساي بەيبىت جولمەن شەشۋ قاجەت ەكەنىن قۇپتادىق. كوپجاقتى قۇرىلىمدار اياسىندا ىقپالداستىقتى ودان ارى كۇشەيتۋگە مۇددەلى ەكەندىگىمىزدى راستادىق، - دەدى پرەزيدەنت.

وسى ورايدا قاسىم-جومارت توقايەۆ الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ب ۇ ۇ- نىڭ ايماقتىق ورتالىعىن اشۋ تۋرالى باستامانى قولداعانى ءۇشىن سلوۆەنيا تاراپىنان ريزاشىلىعىن بىلدىرگەنىن ايتتى.

- جالپى، بۇگىنگى كەلىسسوزدەر جەمىستى بولدى دەپ كۇمانسىز ايتۋعا بولادى. وسى ساپاردىڭ ناتيجەسىندە قازاق-سلوۆەن ىقپالداستىعى نىعايىپ، جاڭا دەڭگەيگە كوتەرىلەدى دەپ سەنەمىن. بىرلەسكەن كۇش-جىگەرىمىزدىڭ ارقاسىندا ءبىز ورتاق ماقساتتارعا قول جەتكىزەمىز، - دەدى مەملەكەت باسشىسى.