ەلوردادا قىزىلشا دەرتىنە قاتىستى جاعداي ءالى دە كۇردەلى

استانادا بالالار، جاس وسپىرىمدەر جانە ەرەسەكتەر اراسىندا قىزىلشاعا قارسى ۆاكسينا الۋ جانە ودان ەمدەۋ جۇمىستارى جالعاسۋدا، دەپ حابارلايدى Kazinform اگەنتتىگى.

«قالادا قىزىلشانىڭ تارالۋى توقتاماي تۇر. كۇن سايىن 45 كە جۋىق جاعداي تىركەلەدى. بۇگىنگى تاڭدا قىزىلشانىڭ 3328 جاڭا جاعدايى تىركەلدى. ونىڭ ىشىندە 1087 جاعداي راستالعان دياگنوز جانە ونىڭ 71 پايىزى (769 جاعداي) 14 جاسقا دەيىنگى بالالار اراسىندا، 11 پايىزى (117 جاعداي) جاس وسپىرىمدەر جانە 18 پايىز ەرەسەكتەر اراسىندا انىقتالدى»، - دەيدى قالانىڭ باس سانيتارى سارقىت بەيسەنوۆا استانا قالالىق ورتالىق كوممۋنيكاتسيالار قىزمەت الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، ناۋقاستار اراسىندا اسىرەسە ۆاكسينا الماعان بالالاردىڭ ۇلەسى ءالى دە جوعارى بولىپ، 67 پايىزدى قۇراپ وتىر.

«قىزىلشا اۋرۋىنا شالدىققانداردىڭ ىشىندە 42 پايىزى نەمەسە 326 ۆيرۋس جۇقتىرعان بالا ۆاكسينا الۋدان باس تارتقان. 28 پايىزى (214) - مەديتسينالىق قارسى كورسەتىلىمى بويىنشا، 20 پايىزى (149) ەگۋ جاسىنا جەتپەگەن جانە 5 پايىزى اتا-انالاردىڭ نەمقۇرايلىلىعىنان ەكپە الماي وتىر»، - دەيدى مامان.

بريفينگتە ايتىلعانداي، قىزىلشاعا قارسى جوسپارلى ۆاكسيناتسيا جالعاسۋدا. 12-15 ايلىق ارالىعىنداعى سابيلەر سانىنان قىزىلشاعا قارسى جوسپارلى ەكپەمەن 92,3 پايىز (22780 بالا) جانە 6-7 جاستاعى بالالار اراسىندا 92,6 پايىز (22700 بالا) قامتىلدى.