ەلوردادا مەملەكەت قاجەتىنە 58 جەر تەلىمى الىنادى
استانا. KAZINFORM - بۇگىن ەلوردا ءماسليحاتىنىڭ كەزەكتەن تىس سەسسياسىندا جەر ۋچاسكەلەرىن مەملەكەت قاجەتىنە الۋعا بايلانىستى جەر تەلىمدەرىن نەمەسە وزگە دە جىلجىمايتىن مۇلىكتى يەلىكتەن شىعارۋ شارتتارىنىڭ جوبالارىن كەلىسۋ ماسەلەسى قارالدى.
ايتا كەتەيىك، جاقىندا ءماسليحاتتىڭ تۇراقتى كوميسسياسىنىڭ قاراۋىنا مەملەكەت قاجەتىنە الۋعا بايلانىستى يەلىكتەن شىعارىلاتىن جەر ۋچاسكەلەرىنىڭ تىزبەسى ۇسىنىلعان بولاتىن. سونىمەن قاتار، پايدالانۋعا بەرۋ جوسپارلانعان الەۋمەتتىك نىساندار، ءبىرقاتار كوشەلەر، مەكتەپتەر، شاعىن اينالما جولدىڭ ەكى ۋچاسكەسى، اكىمشىلىك عيماراتتىڭ تىزبەسى تانىستىرىلدى.
بۇگىن ءماسليحاتتىڭ سەسسياسىندا استانا قالاسى تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ باسشىسى ءانۋار سايپوۆ الىناتىن جەر تەلىمدەرىنە قاتىستى تۇسىنىك بەردى.
- تۇرعىن ءۇي باسقارماسى ءماسليحات سەسسياسىنىڭ قاراۋىنا 1 ميلليارد 260 ميلليون تەنگە سوماسىندا جالپى اۋدانى 15 گەكتار، 16 وبەكت بويىنشا 58 جەر ۋچاسكەسىن ساتىپ الۋ جونىندەگى شارتتىڭ جوباسىن ۇسىنادى، - دەدى ءانۋار سايپوۆ.
جەر ۋچاسكەلەرىن ساتىپ الۋ كەلەسى قۇرىلىس نىساندارى بويىنشا جۇزەگە اسادى:
- ماڭگىلىك ەل جانە سىعاناق داڭعىلدارىنىڭ قيىلىسى؛
- توقپانوۆ كوشەسى ماڭىنداعى مەكتەپ؛
- قالداياقوۆ جانە نۇرماعامبەتوۆ كوشەلەرىنىڭ قيىلىسىنداعى بالاباقشا؛
- №48، 69، ا106 جانە ا108 اۋماعىندا ءا. مارعۇلان اتىنداعى ارحەولوگيا ينستيتۋتىنىڭ كەشەنى؛
- ايتماتوۆ جانە قورعالجىن كوشەسى قيىلىسىنداعى اكىمشىلىك عيمارات؛
- اقان سەرى كەشەسىندەگى بالاباقشا قۇرىلىسى؛
- C645 جانە ەڭلىك- كەبەك كوشەسى قيىلىسىنداعى مەكتەپ؛
- بايتۇرسىنوۆ جانە ناجىمەدەنوۆ داڭعىلدارى اراسىنداعى ا-50 مەن ا51 كوشەلەرى؛
- تىلەنديەۆ داڭعىلىنان كونستيتۋتسيا كوشەسىنە دەيىنگى شاعىن اينالما جول؛
- پۋشكين كوشەسىنەن كونستيتۋتسيا كوشەسىنە دەيىنگى شاعىن اينالما جول؛
- حۋسەين بەن تالال جانە قابانباي باتىر داڭعىلدارى قيىلىسىنداعى اكىمشىلىك عيمارات.
ءانۋار سايپوۆتىڭ ايتۋىنشا، جەر ۋچاسكەلەرىنىڭ مەنشىك يەلەرى ۇسىنىلعان وتەماقى سوماسىمەن تانىستىرىلدى.
بۇدان بۇرىن حابارلانعانداي، بيىل قاڭتار ايىنىڭ اياعىندا زەينۇلقابدەن تابيعات استانا قالاسى ماسليحاتىنىڭ ءتوراعاسى بولىپ سايلاندى.
