ەلوردادا ليفتىدە بالانى پىشاقتاعان جاس ءوسپىرىمنىڭ اناسى ۇلىن ەمدەۋدەن باس تارتقان

استانا. KAZINFORM - ەلوردادا ليفتى ىشىندە 5 جاسار بالانى پىشاقتاعان پسيحيكالىق اۋىتقۋى بار جاس ءوسپىرىم ەمدى تۇراقتى قابىلداماعان. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ءمالىم ەتتى.

- اناسى بالاسىنىڭ دياگنوزىن قابىلداعىسى كەلمەي، ەمدەۋدەن باس تارتتى. بالادا ەمدەۋدە ۇزىلىستەر بولدى، ول وكىنىشكە قاراي اسقىنۋعا اكەلدى. سوندىقتان قازىر ەمدەۋدەن باس تارتقان جاعدايدا قامقورشىلاردىڭ جاۋاپكەرشىلىگىن كۇشەيتۋ ماسەلەسىن قاراستىرىپ جاتىرمىز، - دەدى اقمارال ءالنازاروۆا ءماجىلىس قابىرعاسىندا وتكەن باسپا ءسوز ءماسليحاتىندا.

ەسكە سالا كەتەيىك، بيىل 11-اقپاندا ەلوردادا جاس ءوسپىرىم ليفتى ىشىندە بالانى پىشاقتاپ تاستاعان ەدى. كەيىن بەلگىلى بولعانداي پىشاقپەن شابۋىلداعان جاس ءوسپىرىم ارنايى ەسەپتە تۇرعان.

دارىگەرلەر زارداپ شەككەن بالاعا دەرەۋ وتا جاساپ، پسيحولوگيالىق كومەك كورسەتتى.

قازىر بالانى پىشاقتاعان جاس ءوسپىرىم پسيحياتريالىق ستاتسيوناردا وتىر.

دەنساۋلىق ساقتاۋ ءمينيسترىنىڭ ورىنباسارى ەرجان نۇرلىبايەۆ جاس ءوسپىرىمنىڭ ورتاعا بەيىم جاعدايدا بولعانىن ايتتى.

سونداي-اق كەيىن انىقتالعانداي ليفتىدە بالانى پىشاقتاعان جاس ءوسپىرىمدى جالعىزباستى انا تاربيەلەپ وتىرعانى بەلگىلى بولدى.

ايتا كەتسەك، ەلوردادا كوپقاباتتى تۇرعىن ۇيلەردىڭ بىرىندە ليفتىدە بالانى پىشاقتاعان جاس ءوسپىرىمنىڭ اناسى پسيحيكالىق دەنساۋلىق ورتالىعىندا ۇلىن ۇرعانى تۋرالى پوليتسياعا شاعىم تۇسىرگەن ەدى.

كەيىن دەنساۋلىق ساقتاۋ ءمينيسترى اقمارال ءالنازاروۆا ەلوردادا ليفتىدە بالانى پىشاقتاعان جاس ءوسپىرىمدى ۇردى دەگەن فاكتىگە قاتىستى تۇسىنىك بەردى.

ىشكى ىستەر ءمينيسترىنىڭ ورىنباسارى ليفتىدە بالانى پىشاقتاعان جاس ءوسپىرىمنىڭ ءىسى ءبىر اي ىشىندە سوتقا جىبەرۋ جوسپاردا بارىن ايتتى.

تاياۋدا عانا ليفتىدە بالانى پىشاقتاعان جاس ءوسپىرىم ىسىنە قاتىستى تاعى ءبىر قىلمىستىق ءىس قوزعالدى.

سونىمەن قاتار جاقىندا بەلگىلى بولعانداي ليفتىدە پىشاق جاراقاتىن العان استانالىق بالا وڭالتۋعا جاتقىزىلادى.

اۆتور

داۋلەت ىزتىلەۋ