ەلوردادا جەڭىس كۇنىنە وراي وتشاشۋ بولدى
استانا. KAZINFORM - ەكىنشى دۇنيەجۇزىلىك سوعىس جەڭىسىنىڭ 80 جىلدىعىنا وراي استانا قالاسىندا وتشاشۋ بولدى.
وتشاشۋ ساعات 22.00 دە ەكى جەردە ۇيىمداستىرىلدى، ياعني بوتانيكالىق باقتا جانە «اتىراۋ» كوپىرىنە ىرگەلەس اۋماعىندا اتىلدى. ءار جەردە 4 مىڭعا جۋىق رەت وتشاشۋ جارقىرادى.
بوتانيكالىق باققا جينالعان ەلوردا تۇرعىندارى مەن قوناقتارىنىڭ قاراسى كوپ بولدى. مەرەكەلىك وتشاشۋدى تاماشالاۋعا استانالىقتاردىڭ دەنى وتباسىمەن كەلگەن.
ايتا كەتەيىك، جەڭىس كۇنىنە ورايلاستىرىلعان وتشاشۋ دەمەۋشىلىك قارجى ەسەبىنەن ۇيىمداستىرىلدى.
ەسكە سالايىق، استانادا 7-مامىر - وتان قورعاۋشىلار كۇنى جانە 9-مامىر - جەڭىس كۇنىنە ارنالعان 100 دەن استام ءتۇرلى ءىس-شارا ءوتتى. ونىڭ ىشىندە كونسەرتتەر، عىلىمي كونفەرەنسيالار، مەكتەپتەردە تاربيە ساعاتتارى، تەاترلاندىرىلعان قويىلىمدار تاعى سول سياقتى ءىس-شارالار بار.
بۇعان دەيىن ەلوردادا جەڭىستىڭ 80 جىلدىعىنا وراي مەرەكەلىك وتشاشۋ بولاتىنىن حابارلاعان بولاتىنبىز.
مەملەكەت باسشىسى قازاقستاندىقتاردى جەڭىس كۇنىمەن قۇتتىقتادى.
7-مامىردا ەلورداداعى «قازاق ەلى» الاڭىندا مەملەكەت باسشىسى - قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆتىڭ قاتىسۋىمەن جەڭىستىڭ 80 جىلدىعىنا ارنالعان اسكەري پاراد ءوتتى.
