ەلوردادا جۇمىس ىستەيتىن جاستار جالعا بەرىلگەن باسپانادان تۇراقتى باسپاناسىنا قالاي كوشە الادى
استانا. KAZINFORM - وسىدان بەس جىل بۇرىن استانادا جۇمىس ىستەيتىن جاستارعا ساتىپ الۋ قۇقىعى جوق العاشقى جالعا بەرىلەتىن تۇرعىن ءۇي باعدارلاماسىن ىسكە قوستى.
بۇل مىڭداعان قالا تۇرعىنىنا بەس جىل ىشىندە ءوز ۇيلەرىنە اقشا جيناۋعا مۇمكىندىك بەردى. استانا اكىمدىگىنىڭ مالىمەتىنشە، ولار ەندى «ەلوردا جاستارى» باعدارلاماسى بويىنشا پاتەرىن ساتىپ الا الادى.
2019-جىلدان بەرى جۇمىس ىستەيتىن جاستارعا ارنالعان بەس جىلدىق جالعا بەرىلەتىن باسپانا باعدارلاماسىنا قاتىسۋعا 17 مىڭعا جۋىق ادام ءوتىنىش بىلدىرگەن. وسى ۋاقىت ىشىندە ولارعا ءۇش مىڭنان استام پاتەر بەرىلدى.
جالدامالى پاتەردى العاش العانداردىڭ قاتارىندا نۇرلىبەك مۇراتوۆ تا بار. جاس مامان رەتىندە 2020-جىلى باسپانالى بولدى. كەلىسىمشارت اياقتالماي جاتىپ-اق، بىرنەشە جىلدىڭ ىشىندە ول يپوتەكا بويىنشا باستاپقى جارناعا اقشا جيناپ، جەكە پاتەرىن ساتىپ الدى.
- بۇل باعدارلاما جۇمىس ىستەيتىن جاستار ءۇشىن باسپاناعا قولجەتىمدى بولۋىمەن وتە ىڭعايلى جانە ءتيىمدى. اي سايىنعى تولەم - ءبىر بولمەلى بولسا 10000 دەيىن. وتاعاسى رەتىندە مەن ەشقانداي اۋىرتپالىق سەزىنگەن جوقپىن، - دەدى ول.
«ەلوردا جاستارى» باعدارلاماسى اياسىندا ەڭبەك شارتى جارامدى جاستارعا، سونداي- اق ءبىلىم، دەنساۋلىق ساقتاۋ، سپورت، مادەنيەت، الەۋمەتتىك قورعاۋ، پوليتسيا جانە ت. ب. سالالاردا جۇمىس ىستەيتىن 35 جاسقا دەيىنگى ازاماتتارعا باسىمدىق بەرىلەدى. نەگىزگى شارت - استانادا تۇراقتى تىركەۋدىڭ بولۋى، سوڭعى بەس جىلدا جىلجىمايتىن مۇلىكتىڭ بولماۋى جانە ءتيىستى تابىس.
- ولار 18 ميلليونعا دەيىن پاتەر تابا الادى. ال باستاپقى تولەم %10 - 1 ميلليون 800 مىڭ، ول 19 جىلعا، 5 پايىزبەن بەرىلەدى. مەنىڭ ويىمشا، بۇل وتە ءتيىمدى. سونداي-اق ولار قايتالاما جانە باستاپقى نارىقتان دا پاتەر ساتىپ الا الادى، - دەپ اتاپ ءوتتى ەلوردالىق جاستار ساياساتى ماسەلەلەرى باسقارماسىنىڭ باس مامانى بالجان قولعانات.
تولىعىراق اقپارات zhilfond.kz سايتىندا جانە تۇرعىن ءۇي قورىنىڭ الەۋمەتتىك جەلىلەردەگى رەسمي پاراقشالارىندا جاريالانادى.
