ەلوردادا جاڭا تۇرعىن ۇيلەرگە قازاقشا اتاۋ بەرۋ بەلەڭ الا باستادى

استانا. KAZINFORM - ەلورداداعى قۇرىلىس كومپانيالارى جاڭا سالىنعان تۇرعىن ۇيلەرگە قازاقشا اتاۋ بەرە باستادى. بۇل تۋرالى استانا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ايتتى.

- سوڭعى 2 جىلدىڭ كولەمىندە قالاداعى تۇرعىن ۇيلەردىڭ اتاۋلارىنا بايلانىستى ءىرى قۇرىلىس كومپانيالارىمەن كەزدەسۋ وتكىزدىك. بۇعان دەيىن 60-70 پايىزعا جۋىق شامادا تۇرعىن ۇيلەردىڭ اتتارى نەشە ءتۇرلى شەتەلدىك اتاۋمەن قويىلىپ كەلگەن. باسشىلىقتىڭ دا الەۋەتىن سالىپ، ءوزىمىز دە بىرنەشە دۇركىن كەزدەسۋدىڭ ناتيجەسىندە ءىرى قۇرىلىس كومپانيالارى ۇيلەرىنىڭ 60-70، كەيبىرى 80 پايىزعا جۋىعىنا ءداستۇرلى اتاۋلاردى قويىپ جاتىر، - دەدى ول قالالىق ءماسليحاتتىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيانىڭ وتىرىسىندا.

سونىمەن قاتار ول بالاباقشالار مەن مەكتەپتەرگە باراتىن بالالاردىڭ اتا-انالارىمەن كەزدەسۋلەر ءجيى وتكىزىلە باستاعانىن ايتتى.

- 2021-2022 وقۋ جىلىندا قالامىزدا قازاق سىنىبىندا وقيتىن وقۋشىلاردىڭ سانى 52 پايىز بولسا، سوڭعى وقۋ جىلىندا 65 پايىزعا كوتەرىلدى. دەگەنمەن، ىستەيتىن جۇمىس ءالى كوپ. مىسالى، سوڭعى جىلى قالالىق ءبىلىم باسقارماسىنا قاراستى مەملەكەتتىك بالاباقشالارعا جاڭادان كەلگەن بۇلدىرشىندەر تولىقتاي قازاق تىلىنە قابىلداندى. بۇل ءۇردىستى مۇمكىندىگىنشە الداعى ۋاقىتتا جالعاستىرساق دەگەن ويىمىز بار، - دەدى ساكەن ەسىركەپ.

ايتا كەتەيىك، بيىل 3 مىڭ ەلوردالىق قازاق ءتىلىن تەگىن ۇيرەنەدى.