ەلوردادا بەلگىسىز ەر ادام مينيسترلىكتەر ءۇيىن ورتەمەك بولدى

استانا. KAZINFORM - بۇگىن تاڭعى ساعات 8 شاماسىندا استاناداعى مينيسترلىكتەر ءۇيىنىڭ 11-كىرەبەرىسىندە ءورت شىقتى. بەلگىسىز ەر ادام وقۋ-اعارتۋ مينيسترلىگىنىڭ عيماراتىنا كىرىپ، تۋرنيكەتكە جانعىش قوسپا لاقتىرعان.

- مينيسترلىكتەر ءۇيىنىڭ كىرەبەرىسىندە ءورت شىعارعان 24 جاستاعى ازامات انىقتالىپ، پوليتسيا قىزمەتكەرلەرى ۇستادى. اتالعان فاكت بويىنشا سوتقا دەيىنگى تەرگەپ-تەكسەرۋ باستالدى. وقيعانىڭ ءمان-جايى انىقتالىپ جاتىر، - دەپ حابارلادى استانا قالالىق پوليتسيا دەپارتامەنتىنىڭ باسپا ءسوز قىزمەتى.

ءورتتى قالالىق توتەنشە جاعدايلار دەپارتامەنتىنىڭ قىزمەتكەرلەرى جەدەل سوندىرگەن. سونداي-اق ۆەدومستۆونىڭ مالىمەتىنشە، زارداپ شەككەندەر جوق.

ەسكە سالساق، ەلوردادا ءبىر كۇندە 4 بالا تەرەزەدەن قۇلاپ، ەكەۋى مەرت بولدى.