ەلوردادا «BaiQymyz» ۇلتتىق تاعامدار گاستروفەستيۆالى ءوتىپ جاتىر
استانا. KAZINFORM - گاستروفەستيۆالدى ۇيىمداستىرۋشىلار حالقىمىزدىڭ ءداستۇرلى تاعام مادەنيەتىن، سونىڭ ىشىندە قىمىز ءوندىرۋ ءداستۇرىن جاڭعىرتىپ، حالىقارالىق دەڭگەيگە ىلگەرىلەتۋ ماقساتىن كوزدەپ وتىر.
بۇگىن ەلورداداعى «قازانات» يپپودرومىندا ەلىمىزدە العاش رەت «BaiQymyz - باپتالعان قىمىز ۇلتتىق تاعامدار گاستروفەستيۆالى» اتتى ءىرى كولەمدەگى مادەني-اگرارلىق ءىس-شارا باستالدى.
ەكى كۇن بويى وتەتىن شاراعا 50-60 مىڭ ادام كەلەدى دەپ كۇتىلەدى. بايقاۋعا ءار وڭىردەن 50 دەن استام قىمىز ءوندىرۋشى قاتىسىپ جاتىر. ۇيىمداستىرۋشىلار فەستيۆالدى وكتوبەرفەست سياقتى حالىقارالىق ۇلگىدەگى مادەني-اگرارلىق برەندكە اينالدىرۋدى كوزدەپ وتىر. قوناقتار ەكى كۇن بويى ءتۇرلى قىمىزدان ءدام تاتىپ، جىلقى كورمەسىن تاماشالاپ، ەتنو-مادەني باعدارلامالاردى تاماشالاي الادى.
- بۇگىن بىزدە قىمىز مەرەكەسى. بۇل ۇلتتىق تاعام مەن داستۇرگە قۇرمەت، ءار داستارقاندا قىمىز بولۋ كەرەك، بۇگىنگى فەستيۆال قىمىزدى ناسيحاتتاۋ ماقساتىندا ۇيىمداستىرىلىپ وتىر. قىمىز جارىسىنان بولەك، مادەني ءىس-شارالار ءوتىپ جاتىر. استانا تۇرعىندارى مەن قوناقتارى، شەتەلدەن كەلگەن تۋريستەر ۇلتتىق سۋسىننىڭ ءدامىن تاتىپ، وزىنە ۇناعان قىمىزعا داۋىس بەرە الادى، - دەدى «BaiQymyz» ۇلتتىق تاعامدار گاستروفەستيۆالى يدەياسىنىڭ اۆتورى، ۇيىمداستىرۋشى جۇماجان قالتايەۆ.
سونداي-اق قىمىز وندىرۋشىلەر «ەڭ ۇزدىك قىمىز» اتاعى ءۇشىن تالاسادى. جۇلدە قورى - 45 ميلليون تەڭگە (I ورىن - 20 ميلليون تەڭگە، II ورىن - 15 ميلليون تەڭگە، III ورىن - 10 ميلليون تەڭگە).
بايقاۋدىڭ ماقساتى - ەلىمىزدەگى ەڭ ساپالى ءارى شيپالى قىمىزدى انىقتاۋ. نەگىزگى ماقسات - قىمىزدى دەنساۋلىق پەن قوناقجايلىقتىڭ سيمۆولى رەتىندە تانىتۋ، سونىمەن قاتار اگروتۋريزم مەن جىلقى شارۋاشىلىعىن دامىتۋعا سەرپىن بەرۋ.
فەستيۆال اياسىندا وتەتىن جىلقى كورمەسىندە قازاقتىڭ بايىرعى تۇقىمدارى - جابى، كوشىم، قوستاناي، مۇعالجار، اداي جانە سپورتتىق باعىتتاعى اتتار كوپشىلىك نازارىنا ۇسىنىلدى.
قولونەر شەبەرلەرى ەر-توقىم، قامشى، ات ابزەلدەرى سياقتى تاريحي بۇيىمدارىن كورسەتىپ جاتىر. سول سياقتى كەلۋشىلەردىڭ بۇيىمداردى ساتىپ الۋ مۇمكىندىگى بار. كورمەنىڭ باستى ەرەكشەلىگى - بىرەگەي بۇيىمدار مەن جىلقى اۋكتسيونى.
ودان بولەك، فەستيۆال اياسىندا عىلىمي كونفەرەنتسيا ۇيىمداستىرىلعان. ول جەردە قىمىزدىڭ ەمدىك قاسيەتتەرى، جىلقى شارۋاشىلىعى مەن ءداستۇرلى مال شارۋاشىلىعىنىڭ دامۋ بولاشاعى تالقىلانىپ جاتىر. عىلىمي كونفەرەنتسيادا گەرمانيا، رەسەي، قىرعىزستاننان كەلگەن عالىمدار، دارىگەرلەر، ۆەتەرينارلار مەن كاسىپكەرلەر بايانداما جاساپ جاتىر. قاتىسۋشىلار اراسىندا نەمىس جىلقى شارۋاشىلىعى مامانى حانس تسولمان، مەديتسينا عىلىمدارىنىڭ دوكتورى باقىتجان بيىمبەتوۆ، ەتنوگراف ايگەرىم مۇساعاجينوۆا جانە باسقا دا ساراپشىلار بار.
شەبەرلىك ساباقتار بارىسىندا قاتىسۋشىلارعا قىمىز دايىنداۋ، ساقتاۋ، اشىتۋ، سونداي-اق ونى كاپسۋلا تۇرىندە ءوندىرۋدىڭ زاماناۋي ادىستەرى تانىستىرىلىپ جاتىر. سونىمەن قاتار، تەرى يلەۋ، ات ابزەلدەرى مەن تۇرمىستىق بۇيىمداردى جاساۋ بويىنشا دا قولونەر شەبەرلەرى بىلگەنىن ۇيرەتەدى.
سونداي-اق، باعدارلاما شەڭبەرىندە اۋدارىسپاق، جىلقى ۇيرەتۋ، قۇماي تازى سايىسى، شالما سالۋ سىندى ۇلتتىق سپورت تۇرلەرىنەن جارىس ءوتىپ جاتىر. سول سياقتى مەشكەيلەر سايىسى مەن جىلىك سىندىرۋ سەكىلدى ەرەكشە شارالار فەستيۆال كورىگىن قىزدىرماق.
ايتا كەتەيىك، ەڭ ۇزدىك قىمىزدى انىقتاۋ 4 كريتەري بويىنشا باعالانادى. سونىڭ ءبىرى - حالىق داۋىسى، ياعني كەز كەلگەن ادام QR كود ارقىلى ۇزدىك قىمىزدى تاڭداي الادى.
QR ارقىلى حالىقتىڭ داۋىس بەرۋى:
2025-جىل 19-شىلدە:
ساعات 11:30 - 21:00
2025-جىل 20-شىلدە
ساعات 10:00 - 15:00.
بيىل ماۋسىمدا بوزوق قورىق-مۋزەيىندە «قىمىزمۇرىندىق» فەستيۆالى وتكەن ەدى.
