ەلوردادا ازىق-تۇلىك باعاسىن ۇستاپ تۇرۋ ءۇشىن 13 ميلليارد تەڭگە ءبولىندى
استانا. KAZINFORM - ەلوردادا ازىق- تۇلىك باعاسىن ۇستاپ تۇرۋ ءۇشىن 13 ميلليارد تەڭگە ءبولىندى. استانا قالالىق ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جانابايەۆ ايتتى.
«بۇگىندە الەۋمەتتىك ماڭىزى بار ازىق-تۇلىك باعاسىنىڭ وسۋىنە جول بەرمەۋ ءۇشىن بيۋدجەتتەن 13 ميلليارد تەڭگە ءبولىندى»، - دەدى ول استانا قالاسىنىڭ كوممۋنيكاتسيالار قىزمەتىندەگى بريفينگتە.
ونىڭ دەرەگىنشە، قالا اكىمدىگى الەۋمەتتىك ماڭىز بار ازىق-تۇلىكتىڭ بارلىق 19 ءتۇرى بويىنشا 25 مىڭ توننانىڭ ونىمىنە كەلىسىمشارت جاساعان. ولاردىڭ باسىم بولىگىن كوكونىستەر قۇرايدى جانە باعانىڭ كوتەرىلۋىنە جول بەرمەۋگە سەپتىگىن تيگىزىپ وتىر.
قازىرگى ۋاقىتتا ەلوردادا وتكەن جىلدىڭ ونىمىنەن 5,4 مىڭ توننا كارتوپ، 919 توننا ءسابىز، 2 مىڭ توننا پياز، 1,2 مىڭ توننا قىرىققابات بار. بۇعان قوسا، 2024 -جىلدىڭ مامىر مەن شىلدە ايلارىندا تاعى دا 1350 مىڭ توننا كوكونىس الۋعا كەلىسىمشارت جاسالماق.
