ەلوردادا اۆتوبۋس جۇرگىزۋشىلەرىنىڭ ارەكەتىن كامەرا ارقىلى باقىلايدى
استانا. KAZINFORM - استانادا قوعامدىق كولىك جۇرگىزۋشىلەرىنىڭ ارەكەتىن باقىلاۋ ءۇشىن بەينەباقىلاۋ كامەرالارى ورناتىلا باستادى.
- قوعامدىق كولىكتەر جۇرگىزۋشىسىنىڭ ارەكەتىن باقىلاۋعا ارنالعان بەينەباقىلاۋ كامەرالارى ورناتىلدى. ەندى بارلىق اۆتوبۋستى قامتۋدى جوسپارلاپ وتىرمىز، بۇل جۇرگىزۋشىنىڭ تەلەفونعا الاڭداماۋىن باقىلاۋ ءۇشىن قاجەت، - دەدى استانا قالاسى پوليتسيا دەپارتامەنتىنىڭ اكىمشىلىك پوليتسيا باسقارماسى جول-كولىك جانە تەحنيكالىق ينسپەكتسيا ءبولىمىنىڭ اعا ينسپەكتورى ماقسات يماشوۆ ەلورداداعى كاسىپكەرلەر پالاتاسى الاڭىندا وتكەن ءىس-شارا بارىسىندا.
ونىڭ ايتۋىنشا، پوليتسيا قىزمەتكەرلەرى كۇندەلىكتى پاترۋلدەۋ كەزىندە قوعامدىق كولىكتەردەگى بەينەباقىلاۋ كامەرالارىنىڭ جاعدايىن تەكسەرىپ تۇرادى.
- ودان بولەك، اۆتوبۋس جولعا شىعار الدىندا قوعامدىق كولىكتىڭ تەحنيكالىق جاعدايى تەكسەرىلىپ، بەينەباقىلاۋ كامەراسىنىڭ دا جۇمىس ىستەپ تۇرعانى قارالادى، - دەيدى ول.
ايتا كەتسەك، ەلىمىزدە قوعامدىق كولىك يەلەرى اۆتوبۋس ىشىنە كامەرا ورناتۋعا مىندەتتەلەدى.
ەسكە سالا كەتسەك، بيىل 2-ماۋسىمدا ەلوردادا جولاۋشىلار اۆتوبۋسى اپاتقا ۇشىراپ، 15 ادام زارداپ شەكتى. سونداي-اق اپات سالدارىنان جەتكىنشەك قىز قوس اياعىنان ايىرىلدى. جول اپاتىنا ايىپتى دەپ تانىلعان جۇرگىزۋشى قاماۋعا الىندى.
