ەلوردادا 2 مىڭ گەكتار جەردەگى ەسكى قۇرىلىس سۇرىلەدى

استانا. KAZINFORM - «استانا باس جوسپارى» عىلىمي- زەرتتەۋ جوبالاۋ ينستيتۋتىنىڭ باس ديرەكتورى رۋسلان جاقىپوۆ ەلوردادا رەنوۆاتسيا باعدارلاماسىنىڭ ىسكە اسۋ بارىسىمەن تانىستىردى.

«باس جوسپاردا ەسكى وبەكتىلەردى ءسۇرۋ باعدارلاماسى قاراستىرىلعان. سۇرىلگەن ەسكى وبەكتىلەردىڭ ورنىنا الەۋمەتتىك وبەكتىلەر، تۇرعىن ۇيلەر جانە كوشەلەر سالۋ جوسپارلانعان. جوبادا اياسىندا 2035 -جىلعا دەيىن شاشامەن 2 مىڭ گەكتار جەردەگى ەسكى قۇرىلىستى ءسۇرۋ قاراستىرىلعان.

جۇمىس كەزەڭ-كەزەڭىمەن جۇرەدى، العاشىندا 494,2 گەكتار، ەكىنشى كەزەڭدە 1019 گەكتار جانە ءۇشىنشى كەزەڭدە 465,6 گەكتار كولەمدە وبەكتىنى ءسۇرۋ كوزدەلگەن»، - دەدى رۋسلان جاقىپوۆ ەلوردا ءماسليحاتى جانىنداعى قوعامدىق كەڭەس وتىرىسىندا.

ونىڭ ايتۋىنشا، رەنوۆاتسيا قارقىنى ينۆەستيتسياعا جانە ەلدەگى ماكروەكونوميكالىق جاعدايعا بايلانىستى.

«جالپى ەلوردانىڭ باس جوسپارى اياسىندا 2024-2030 -جىلدار ارالىعىندا 673 تۇرعىن ءۇي وبەكتىسى، 201 ءبىلىم بەرۋ جانە 131 كوممەرتسيالىق وبەكتى سالىنادى. سونىمەن قاتار 337,2 شاقىرىم جول جانە 333 شاقىرىم ينجەنەرلىك جەلى سالىنادى جانە قايتا جوندەلەدى»، - دەيدى ول.

ەلوردانىڭ باس جوسپارى اياسىندا قانشا تۇرعىن ءۇي سالىناتىنى بەلگىلى بولدى.

سونداي-اق 2025 -جىلى استانادا كارىز سۋىن تازالايتىن جۇيە قۇرىلىسى سالىناتىنىن حابارلاعان ەدىك.

ايتا كەتەيىك، بۇگىن استانا باس جوسپارى مەكەمەسىنىڭ قابىرعاسىندا قوعامدىق كەڭەس وتىرىسى ءوتتى. ول جەردە ەلوردانىڭ 2035 -جىلعا دەيىن باس جوسپارىن ىسكە اسىرۋ بارىسى تالقىلاندى. جوبانىڭ ماقساتى - جيناقى ءارى ءتيىمدى قالا قۇرۋ.

اۆتور

داۋلەت ىزتىلەۋ