ەلوردا ىرگەسىندە شىرعا تارتۋدان جارىس ءوتتى
ەلوردا ىرگەسىندە شىرعا تارتۋ جارىسى ءوتتى. جۇيرىكتىگى بايقالاتىن باسەكەگە يەلەرى 100 دەن استام تازى اكەلگەن. ايتا كەتەلىك، تازى جۇگىرتىپ، قۇس سالعان قازاق ونەرى دامىپ كەلەدى.
بيىلدان باستاپ، حالىقارالىق كينولوگيا فەدەراتسياسى قازاقستاندى جەتى قازىنانىڭ ءبىرى سانالاتىن تازى تۇقىمىنىڭ يەسى دەپ رەسمي تۇردە تانىعانى بەلگىلى. بۇل جولعى شىرعا تارتۋ جارىسىنا 110 گە جۋىق تازى قوسىلدى. ونىڭ 64 ءى ارلان. ەلوردا ىرگەسىندەگى جىبەك جولى اۋىلى ماڭىندا جەتى قازىنانىڭ ءبىرى سانالاتىن يت تۇقىمى جىنىسىنا قاراي ەكى توپقا ءبولىنىپ، 800 مەترگە جۇگىردى.
شىڭعىس بەگالى ۇلى، يتبەگى:
- ەكى توپقا ءبولىپ، شىرعا تارتىپ، 800 مەترگە جۇگىرتىپ جاتىرمىز. 64 ارلان بولسا، سونى سەگىز توپقا بولدىك. ءار توپتان ءبىرىنشى كەلگەن تازىلار فينالعا شىعادى. اقتىق سايىستا سەگىز تازى كەزدەسەدى. شىرعا تارتۋعا بەس جاسار ءمۇسىلىم دە ءوزىنىڭ باپتاعان تازىسىن اكەلگەن. كىشكەنتاي يتبەگى دە جۇلدەدەن ءۇمىتتى. تازىسىنا سەنىپ وتىر.
ءمۇسىلىم بازىل، يتبەگى:
- مەنىڭ ءيتىمنىڭ اتى قارشىعا. مەن ونى جارىسقا قوسۋعا الىپ كەلدىم. وسكەندە تازىلاردى باعامىن. قيقۋعا قيقۋ قوسپاق بولىپ كەلگەن يتبەگى قاراعاندىلىق رامازان سادىق ۇلى دا وسىندا. جاسى سەكسەنگە تاياعان اقساقالدىڭ ايتۋىنشا التى جاسىنان باستاپ تازى باپتاعان. ول ءدۇبىرلى دودادا توعىز ايلىق كوكقۇسىنىڭ باعىن سىنادى.
رامازان سادىق ۇلى، يتبەگى:
- تازى جاناشىرلارىنىڭ تويى بۇل. شىن نيەتىمىزبەن تويعا كەلدىك. تازىمىز ەگەمەندىگىن الىپ جاتىر، قۇدايعا ءتاۋبا. ەندى ۇكىمەتىمىز تازى جۇگىرتەتىن الاڭ جاساپ بەرسە، جاقسى بولار ەدى. شىرعا تارتۋعا اباي وبلىسىنان كەلگەن سەرىك سلاتوۆتىڭ جولبارىس اتتى تازىسى توپ جاردى. ەكىنشى ورىندا نۇرلىبەك ءجامانعاريننىڭ، ءۇشىنشى ورىنعا اسحات اۋتايەۆتىڭ تازىلارى الدى.
اسانتەمىر قارشىعا ۇلى، ءتىلشى:
- تازى تۇقىمىنىڭ يەسى قازاقستان بولىپ تانىلدى. مۇنى حالىقارالىق كينولوگيا فەدەراتسياسى دا رەسمي تۇردە مويىندادى. تازىسىن باپتاعان، تۇقىمىن ساقتاعان ەلدىڭ ەندى بايراعى بيىك بولا بەرمەك.
اسانتەمىر قارشىعا ۇلى، باعدات قايىركەن
