«ەلوردا قۇرىلىس» كومپانياسىنىڭ باسشىسى 10 جىلعا سوتتالدى
استانا. KAZINFORM - سوت ۇكىمىنە سايكەس «ەلوردا قۇرىلىس كومپانياسى» ج ش س باس ديرەكتورى ر. كادەسوۆتىڭ مۇلكى تاركىلەنىپ، مەملەكەتكە 170 ميلليون تەڭگە شىعىن وتەلدى.
بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.
«استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى «ەلوردا قۇرىلىس كومپانياسى» ج ش س باس ديرەكتورى ر. ا. كادەسوۆ پەن ازامات و. ب. داۆلەتوۆكە قاتىستى ۇكىم شىعاردى. ر. ا. كادەسوۆ و. ب. داۆلەتوۆ ارقىلى استانا قالاسىندا كوپ پاتەرلى تۇرعىن ءۇي كەشەنىن سالۋ شارتى بويىنشا اۆانس تولەگەنى جانە سمەتانى ۇلعايتقانى ءۇشىن مەردىگەر ۇيىم باسشىسىنان 170 ميلليون تەڭگە سوماسىندا اسا ءىرى مولشەردە پارا العانى ءۇشىن كىنالى دەپ تانىلدى»، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتىندا.
سوت ۇكىمىمەن ر. ا. كادەسوۆتى 10 جىل، و. ب. داۆلەتوۆتى 6 اي مەرزىمگە باس بوستاندىعىنان ايىرۋ جازاسى تاعايىندالدى.
«سوت ر. ا. كادەسوۆتىڭ مۇلكىن قۇنى پارا سوماسىنا تەڭ ءتورت اۆتوكولىك قۇرالى تۇرىندە تاركىلەدى، سونداي-اق مەملەكەت كىرىسىنە 170 ميلليون تەڭگە مولشەرىندە پارا سوماسى ءوندىرىلدى»، - دەيدى ول.
ۇكىم زاڭدى كۇشىنە ەنگەن جوق.
ەسكە سالا كەتسەك، 2020 -جىلى «ەلوردا قۇرىلىس» باسقارماسىنىڭ بۇرىنعى باسشىلارى 200 ميلليون تەڭگەنى جىمقىردى دەگەن كۇدىككە ىلىنگەن ەدى.
اۆتور
داۋلەت ىزتىلەۋ
