ەلوردا ماڭىندا وتباسىمەن قايدا دەمالۋعا بولادى؟

استانا. KAZINFORM – استانا قالاسىندا جىلدان جىلعا تۋريستەر سانى ارتىپ كەلەدى. ەلىمىزدىڭ باس قالاسىندا سوڭعى جىلدارى قانداي وزگەرىس بولدى؟ بولاشاقتا قالاي وزگەرەدى؟ تۋريستەر قاي جەرلەرگە ساياحاتتاي الادى؟

جالپى، استانا ورنالاسقان ايماق وقيعالىق، ىسكەرلىك، مەديتسينالىق تۋريزمگە وتە قولايلى. بۇگىنگى تاڭدا باس شاھاردا تۋريستەردىڭ سانى ايتارلىقتاي ءوسىپ كەلەدى. ماسەلەن، 2023 -جىلدىڭ قورىتىندىسى بويىنشا تۋريستەر سانى وتكەن جىلدىڭ سايكەس كەزەڭىمەن سالىستىرعاندا 12,3 پايىزعا ارتىپ، 1324047 ادامعا جەتكەن. ونىڭ ىشىندە باس قالاعا شەتەلدىك تۋريستەردەن 287126 مىڭ ادام كەلسە، ىشكى تۋريستەردەن ءبىر ميلليونان اسا ادام ساياحاتتاعان. كەلۋشىلەردىڭ كوبى رەسەي، تۇركيا، قىتاي، گەرمانيا جانە ا ق ش مەملەكەتتەرىنەن.

سونداي-اق اۋە جولاۋشىلار اعىنى 25 پايىزعا ارتىپ، 2023 -جىلى 7,5 ميلليون ادامعا جەتتى. ال تەمىرجول اعىنى 15 پايىزعا ءوسىپ، تيىسىنشە 5,5 ميلليون ادامدى قامتىعان.

«نەگىزگى ءوسىم اۋە كولىگىمەن تاسىمالداۋدا تىركەلدى، مۇندا 30 باعىت بويىنشا الەمنىڭ 13 ەلىنە 23 اۆياكومپانيا تىكەلەي حالىقارالىق رەيستەردى ورىندايدى. ۆيزاسىز رەجيم 79 ەلمەن جاڭارتىلدى»، - دەدى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭابايەۆ.

قالادا بۇكىلى 9283 نومىرگە ارنالعان 229 قوناق ءۇي جۇمىس ىستەيدى، 70 ءىرى تۋريستىك نىسان: تەاترلار، مۇراجايلار، ساياباقتار، سوو(ويىن ساۋىق ورتالىعى)، 2100-دەن استام قوعامدىق تاماقتانۋ نىسانى، 2 اقپاراتتىق تۋريستىك دۇڭگىرشەك بار.

«تۋريستەردىڭ قاۋىپسىزدىگىن قامتاماسىز ەتۋ ءۇشىن سەرۆيستىك قىزمەت - ەلوردانىڭ تۋريستىك پوليتسياسى قۇرىلدى. تۋريستىك سالانى دامىتۋ تۇجىرىمداماسىنا سايكەس استانا ەلدىڭ ساياسي، اكىمشىلىك، ىسكەرلىك جانە مادەني ورتالىعى بولىپ سانالادى. وسىعان بايلانىستى، ىسكەرلىك تۋريزم ەلوردادا باسىم باعىت بولىپ بەلگىلەندى. استانادا كونگرەسس-كورمە ينفراقۇرىلىمى جەتكىلىكتى، وسى باعىتتى دامىتۋعا ەرەكشە نازار اۋدارامىز. ەلوردانىڭ ىسكەرلىك تۋريزم يندۋسترياسىن دامىتۋ ماقساتىندا، سونداي-اق ءىس-شارالاردى وتكىزۋ ءۇشىن ءبىز سالالىق قاۋىمداستىقتار مەن كورپوراتيۆتىك سەكتور وكىلدەرىمەن ارىپتەستىك باعدارلامانى ىسكە اسىرامىز. قاتىسۋشىلاردىڭ جالپى سانى 90-نان استام كومپانيا»، - دەدى ماقسات جاڭابايەۆ.

قالانىڭ ەڭ كورىكتى جەرلەرى قانداي؟

- بايتەرەك مونۋمەنتى؛

- قازاقستان رەسپۋبليكاسىنىڭ ۇلتتىق مۇراجايى؛

- استانا وپەرا مەملەكەتتىك وپەرا جانە بالەت تەاترى؛

- ورتالىق مەشىت؛

- حان شاتىر س و و؛

- ەكسپو كونگرەسس-ورتالىعى؛

- بەيبىتشىلىك جانە كەلىسىم سارايى؛

- «Ailand» وتباسىلىق دەمالىس ورتالىعى؛

- «استانا بالەت» تەاترى.

استانادا ماڭىندا قانداي ادەمى جەرلەرگە بارۋعا بولادى؟

بيىلدان باستاپ بۋراباي ۇلتتىق پاركىنىڭ اۋماعى 186 گەكتارعا جۋىق ۇلعايدى. بۋراباي كولى استانادان 250 شاقىرىم جەردە ورنالاسقان. ول جەردە ساياحاتشىلاردى بولەكتاۋ شىڭى باۋراپ الادى. سەبەبى، تاۋ ۇستىنەن كولگە بيىكتەن قاراعاندا اسەم كورىنەدى. ونىمەن قوسا، ۇلتتىق پارك ماڭىنداعى كىشى جانە ۇلكەن شاباقتى مەن شورتاندى كولدەرى دە قىزىقتىرماي قويمايدى. مۇندا سەرۋەندەۋگە جانە ۆەلوسيپەد تەبۋگە بولادى.

قورعالجىن قورىعى

قورعالجىن قورىعى 1968 -جىلى قۇرىلعان ەلىمىزدىڭ ەڭ ءىرى قورىقتارىنىڭ ءبىرى. مەملەكەتتىك قورىق استانا قالاسىنان وڭتۇستىك- باتىسقا قاراي 130 شاقىرىم جەردە ورنالاسقان. مۇندا سۇتقورەكتىلەردىڭ 41 ءتۇرى، قۇستاردىڭ 299 ءتۇرى، بالىقتىڭ 14 ءتۇرى، وسىمدىكتىڭ 343 ءتۇرى كەزدەسەدى. قورعالجىن قورىعى-قىزعىلت قوقيقازداردىڭ سولتۇستىكتە ۇيا سالىپ، جۇمىرتقا باساتىن بىردەن ءبىر مەكەنى. شەتەلدىك جانە قازاقستاندىق تۋريستەر جىل سايىن بۇل جەرگە وسى ەرەكشە قۇستى كورۋ ءۇشىن كەلەدى.

بۇيراتاۋ ساياباعى

اسىل تۇقىمدى بۇعى- مارالدار كورگىڭىز كەلسە، بۇيراتاۋعا ءتۇسسىن جولىڭىز. ساياباق ەرەكشە تابيعاتىمەن دە تانىمال. بۇيراتاۋ استانادان 100 شاقىرىم سولتۇستىك-شىعىسقا قاراي سوزىلىپ جاتقان تابيعي پارك. سونداي-اق ەڭ قىزىعى، مۇندا ەلىمىزدەگى تۇركى تاس مۇسىندەرىنىڭ ەڭ ءىرى كەشەندەرىنىڭ ءبىرى - قۇماي كەشەنى بار. تاس مۇسىندەر، ادەتتە، شىعىس جاعىنداعى تاس قورىمداردىڭ شەتىندە ورنالاسقان. ساياباققا مامىر مەن قىركۇيەك ايلارى ارالىعىندا ساياحاتتاساڭىز بولادى.

ارناساي قويماسى

استانا كورىكتى جەرلەرىنىڭ ءبىرى - ۆياچەسلاۆ(ارناساي) سۋ قويماسى. قويما 1960 -جىلداردىڭ اياعىندا قۇرىلعان. استانادان وڭتۇستىك-شىعىسقا قاراي 66 شاقىرىم جەردە ورنالاسقان. مۇندا كوپشىلىك تابيعاتتا اياسىندا دەمالىپ، بالىق اۋلاپ، سۋعا شومىلۋ ءۇشىن كەلەدى. سۋ قويماسىنىڭ دەمالۋعا ىڭعايلى تىك تە، ەڭىستى دە جاعالاۋلارى بار. كوپتەگەن جەرلەردە كولەڭكەسى مول بيىك اعاشتار بار. كولدىڭ اينالاسىندا بىرنەشە اۋىل بار.

Massaget.kz