پاۆلودار تەاترىندا «پەرى قاتىن» دراماسى ساحنالاندى
پاۆلودار. KAZINFORM - ج. ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترىنىڭ ۇجىمى كورەرمەنگە نەمىس دا بەرتولت برەحتىڭ «پەرى قاتىن» درامالىق ابسۋردىن ۇسىندى.
پرەمەرالىق قويىلىمنىڭ قويۋشى رەجيسسەرى - ازيا جانە ەۋروپا ەلدەرىندەگى تەاتر ۇجىمدارىنىڭ تاۋەلسىز رەجيسسەرى وۆلياكۋلي حودجاكۋلي.
قويىلىمدى اۋدارعان - اسىلبەك يحسانوۆ.
شىعارماداعى وقيعا ورتالىق ەۋروپاداعى 1618-1648 -جىلدار ارالىعىندا ورىن العان وتىز جىلدىق سوعىس بارىسىندا وربىگەنى ءمالىم. ال جۇسىپبەك تەاترىنىڭ نۇسقاسى بويىنشا ساحنالانعان قويىلىم سوعىستاعى جاعداي ادامزات تاريحىنىڭ كەز كەلگەن مەرزىمىندە ورىن الۋى مۇمكىن ەكەنىنە مەڭزەيدى.
پەرى ايەل ءوز قۇرساعىنان شىققان ءۇش بالاسىنا قاۋىپ ءتوندىرىپ تۇرعان سوعىس ەسەبىنەن بايۋدى كوزدەيدى. باستى كەيىپكەر - بەكتورى ايۋكەنىڭ بالاۋسا ەسىمدى مىلقاۋ قىزى، التىن كەكىل جانە ۇيرەك ەسىمدى ۇلدارى بار. ۇلدىڭ ۇلكەنى التىن كەكىل - داڭعوي، ماقتانشاق، ال كىشىسى جۋاستاۋ، ءبىراق الاڭعاسارلاۋ جىگىت. اناسى كۇيمەمەن ەل ارالاپ، ساۋدا جاساپ، بالالارىن جانىنا ەرتىپ جۇرەدى. بىردە اسكەرگە سولدات جيناۋشىلار ساۋ ەتە ءتۇسىپ، بۇلاردىڭ ومىرىندە الاساپىران ۋاقىت باستالدى.
ءوز پايداسىن بالالارىنىڭ ومىرىنەن بيىك قويعان ەسىرگەن انا اقىر-سوڭى بارلىق بالاسىنان ايرىلادى.
درامالىق ابسۋردتا دالا تەاترى، پلاستيكالىق تەاتر، ءبي تەاترى جانە مۋزىكالىق تەاتر سياقتى بىرنەشە جانردىڭ توعىسى بار. كەيدە توتەننەن زاماناۋي ءبيدىڭ ىرعاعى ىلەستىرىپ اكەتسە، ەندى بىردە «قىز جىبەكتىڭ» ارياسى، «سۇگىردىڭ تەرمەسى» ورىندالىپ جاتتى. وسىنىڭ بارلىعىن رەجيسسەر مەن اكتەرلەر قيۋلاستىرىپ، كەلىستىرە بىلگەنى دە شەبەرلىك.
اتاپ وتەرلىگى، «پەرى قاتىن» بەرتولت برەحتىڭ «ەسىرگەن شەشەي جانە ونىڭ بالالارى» شىعارماسى مەن وزگە دە تۋىندىلارىنىڭ جەلىسى بويىنشا ساحنالاندى.
پرەمەراعا جۇرگەنوۆ اتىنداعى قازاق ۇلتتىق ونەر اكادەمياسى تەاتر ونەرىنىڭ تاريحى مەن تەورياسى كافەدراسىنىڭ اعا وقىتۋشىسى، ونەرتانۋ ماگيسترى ايجان احمەت ارنايى كەلىپ، اكتەرلەردىڭ ونەرىنە ءوز باعاسىن بەردى.
ەسكە سالا كەتەيىك، مەملەكەت باسشىسى بيزنەس وكىلدەرىن ايماقتىق تەاترلاردى قولداۋعا شاقىردى.
اۆتور
مۇرات اياعان
