لوندوندا ۇلى بريتانيا مەن ۋكراينا اراسىنداعى كەلىسسوزدەر قالاي ءوتتى

استانا. KAZINFORM — سارسەنبىدە لوندوندا ۋكراينا، ا ق ش جانە ەۋروپا دەلەگاتسيالارىنىڭ قاتىسۋىمەن كەلىسسوزدەر ءوتتى، وندا ا ق ش- تىڭ بەيبىت رەتتەۋ جونىندەگى ۇسىنىستارى تالقىلاندى. بۇل تۋرالى BBC حابارلادى.

لوندونداعى كەزدەسۋدىڭ مارتەبەسى ايتارلىقتاي تومەندەدى، سەبەبى وعان ا ق ش مەملەكەتتىك دەپارتامەنتىنىڭ باسشىسى ماركو رۋبيو كەلمەدى.

ۋكراينا پرەزيدەنتى زەلەنسكييدىڭ كەڭسەسىنىڭ باسشىسى اندرەي ەرماكتىڭ ايتۋىنشا، ۇلى بريتانيانىڭ، فرانسيانىڭ جانە گەرمانيانىڭ ۇلتتىق قاۋىپسىزدىك جانە سىرتقى ساياسات بويىنشا كەڭەسشىلەرىمەن لوندونداعى كەزدەسۋدە ۋكراينادان ونىڭ ءوزى، سىرتقى ىستەر ءمينيسترى اندرەي سيبيگا جانە قورعانىس ءمينيسترى رۋستەم ۋمەروۆ قاتىستى.

ۇلى بريتانيادان پرەمەر-ءمينيستردىڭ ۇلتتىق قاۋىپسىزدىك بويىنشا كەڭەسشىسى دجوناتان پاۋەلل، فرانسيادان پرەزيدەنتتىڭ ديپلوماتيالىق كەڭەسشىسى ەممانۋەل بونن، گەرمانيادان كانسلەردىڭ سىرتقى ساياسات جانە قاۋىپسىزدىك بويىنشا كەڭەسشىسى يەنس پلەتنەر قاتىستى.

كەزدەسۋ ۇلى بريتانيا سىرتقى ىستەر ءمينيسترى دەۆيد لەمميدىڭ شاقىرۋىمەن ۇلى بريتانيانىڭ سىرتقى ىستەر مينيسترلىگىنىڭ رەسمي رەزيدەنتسياسىندا ءوتتى.

- بۇل ەكىنشى كەزدەسۋ بولدى، الدىڭعىسى پاريجدە ءوتتى. بۇگىن ءبىز ۋكراينادا ءادىل جانە تۇراقتى بەيبىتشىلىككە قول جەتكىزۋ ءۇشىن تەرەڭ ديالوگتى جالعاستىردىق. ءبىز ا ق ش پرەزيدەنتى دونالد ترامپتىڭ بەيبىتشىلىككە دەگەن كۇش-جىگەرىن قولدايتىنىمىزدى اتاپ وتتىك. ءبىز سەرىكتەستەرگە تۇراقتى قولداۋى ءۇشىن جانە سوعىستى تەزىرەك توقتاتۋ ءۇشىن بىرلەسكەن ۇمتىلىستارى ءۇشىن العىسىمىزدى بىلدىرەمىز… الداعى ۋاقىتتا تۇراقتى كونسۋلتاتسيالار وتكىزۋ تۋرالى كەلىستىك — باستى ماقساتقا جەتۋ ءۇشىن: ۋكراينا ءۇشىن ءادىل بەيبىتشىلىك، - دەپ جازدى ەرماك Telegram ارناسىندا.

بۇرىن ا ق ش پرەزيدەنتى دونالد ترامپ جەكسەنبىدە رەسەي مەن ۋكراينا وسى اپتادا «بەيبىت كەلىسىمگە قول جەتكىزۋى مۇمكىن» دەپ مالىمدەگەن بولاتىن.