لوندوندا شەتەلدىكتەر ناۋرىز كوجە ءپىسىرىپ ۇيرەندى
لوندون. KAZINFORM - شەتەلدىكتەر ۇلى بريتانياداعى قازاق ورتالىعىنىڭ شەبەرلىك ساباعىنا قاتىسىپ، ناۋرىز كوجە ءپىسىرىپ ۇيرەندى. باي مادەنيەتىمىزبەن تانىسىپ، ەلىمىزدىڭ تۋريستىك الەۋەتى تۋرالى اقپارات الدى، دەپ حابارلايدى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى.
دايانا سەربيانىڭ، ستەفاني اۆستريانىڭ جانە نيحال ليۆاننىڭ ازاماتى. ءبىرى اۋدارماشى، ەكىنشىسى كىتاپحاناشى، ءۇشىنشىسى اراب ءتىلىنىڭ مۇعالىمى.
ولارعا ۇلى بريتانياداعى قازاق ورتالىعىنىڭ بەلسەندى وكىلى شولپان كەسيجي جانە لوندوندا جۇمىس بابىمەن ۋاقىتشا تۇرىپ جاتقان قازاقستاندىق قىز-كەلىنشەكتەر ۇلتتىق تاعامنىڭ قۇرامىنا كىرەتىن جەتى ءداندى تاپتىشتەپ ءتۇسىندىرىپ بەردى.
«بۇگىن ءوزىم ءۇشىن جاڭا تاعام ءتۇرىن اشىپ، ەرەكشە اسەر الدىم. ناۋرىز كوجەنىڭ ىشىنە نە قوسىلاتىنىن ۇيرەندىم. ەگەر جەتى ءداندى بولەك- بولەك جەسە، مۇنداي ءدامدى بولماس ەدى. ءتىل ۇيىرەر وتە ءسىڭىمدى كوجە بولدى»، - دەيدى سەربيا ازاماتى دايانا ميلانوۆيچ.
«ىشىنە مولشىلىقتىڭ جورالعىسى سانالاتىن داندەر قوسىلادى ەكەن. بىزدە دە وسىعان ۇقساس كوجە بار. ۇيلەنۋ تويىن جاساپ جاتقان وتباسى وزدەرىنىڭ اۋقاتتى ەكەنىن كورسەتۋ ءۇشىن كوجەنىڭ ىشىنە ءبارىن قوسادى»، - دەيدى اۆستريا ازاماتى ستەفاني باربيەر.
ناۋرىز كوجەدەن بولەك سىيلى قوناقتاردىڭ قۇرمەتىنە ۇلكەن اس تارتىلدى. بۇعان دەيىن جىلقىنىڭ ەتىن جەپ كورمەگەن شەتەلدىكتەر اۋىلدان الدىرىلعان قازى-قارتانىڭ ءدامىن تاتىپ، تاڭدانىستارىن جاسىرمادى.
«جىلقىنىڭ ەتى مەن كۇتكەندەي ەمەس، كەرىسىنشە وتە ءدامدى بولدى. البەتتە، بۇدان كەيىن دە جەپ كورگىم بار. راقمەت! الداعى ۋاقىتتا قازاقستانعا بارىپ، ساياحاتتاعىم كەلەدى. ويتكەنى ەلدەرىڭىز تۋرالى كوپ ەستىدىم. ەندى ءبارىن ءوز كوزىممەن كورۋ - ارمانىم»، - دەيدى ليۆان ازاماتى نيحال نيحايلي.
«ءبىز شەتەلدە تۇرساق تا جۇرەگىمىز قازاقستان دەپ سوعادى. سودان وسىنداي ەلىمىزدى ساعىنىپ، دوستارىمىز، بالالارىمىزبەن بىرگە جينالىپ، ءوزىمىزدىڭ تاعامدارىمىزدى پىسىرەمىز. ال بۇگىن سول شەتەلدىكتەرگە باي ءداستۇرىمىزدى كورسەتىپ، ۇلكەن داستارحان جايدىق»، - دەيدى قازاق ورتالىعىنىڭ وكىلى شولپان كەسيجي.
تۇماندى البيونداعى قازاق ورتالىعىنىڭ اشىلعانىنا كوپ ۋاقىت بولا قويعان جوق. ول باي مادەنيەتىمىزدى، كوركەم ءتىلىمىزدى جانە ۇلتتىق داستۇرلەرىمىزدى جەرگىلىكتى حالىق اراسىندا كەڭىنەن ناسيحاتتاپ، ۇلى بريتانياداعى قانداستارىمىزدىڭ باسىن بىرىكتىرىپ ءجۇر.
الداعى ۋاقىتتا قازاق ءتىلىن ۇيرەتەتىن كۋرس اشۋدى جوسپارلاپ وتىر. سونداي-اق قازاقستاندىق ديزاينەرلەر مەن قولونەرشىلەردى لوندونعا شاقىرىپ، جارمەڭكە وتكىزبەكشى.
اۆتور
عالىمجان قارامان ۇلى
