ۇلتتىق يدەولوگيانىڭ جاڭا باعدارى
اتىراۋ. KAZINFORM – ق ر پارلامەنتى سەناتىنىڭ ءتوراعاسى ماۋلەن اشىمبايەۆ مەملەكەت باسشىسىنىڭ ۇلتتىق قۇرىلتايدىڭ ءۇشىنشى وتىرىسىندا كوتەرگەن ماسەلەلەرىنە قاتىستى پىكىر ءبىلدىردى.
«اتىراۋ قالاسىندا پرەزيدەنتىمىز قاسىم-جومارت كەمەل ۇلى توقايەۆتىڭ توراعالىعىمەن ۇلتتىق قۇرىلتايدىڭ ءۇشىنشى وتىرىسى ءوتتى. داستۇرگە اينالعان كەلەلى كەڭەستىڭ كەزەكتى جيىنىندا يدەولوگيا سالاسىندا جۇرگىزىلەتىن كەشەندى جۇمىستىڭ ناقتى باعىت-باعدارى ايقىندالدى. بۇل قازىرگىدەي جاھاندانۋ كەزەڭىندە تاريحي تامىردان اجىراماي، ۇلتتىڭ وزىندىك كەلبەتىن ساقتاۋ قالۋ ءۇشىن اسا ماڭىزدى قادام ەكەنى انىق. شىن مانىندە، ەلدىڭ ءوسىپ-وركەندەپ، وزىق مەملەكەتتەردىڭ قاتارىنا قوسىلۋى ءۇشىن ەكونوميكالىق جەتىستىكتەر ازدىق ەتەدى. بۇل رەتتە حالىقتىڭ بىرەگەيلىگىن ايشىقتايتىن قۇندىلىقتار ايرىقشا ماڭىزعا يە. مەملەكەت باسشىسى قۇرىلتايدا وسى ماسەلەگە باسا نازار اۋداردى»، - دەدى ماۋلەن اشىمبايەۆ.
سونداي-اق ول سوزىندە پرەزيدەنتىمىز ءوز سوزىندە بۇل باعىتتاعى ءبىرقاتار ماسەلەگە توقتالعانىن اتاپ ءوتتى.
سونىڭ ىشىندە قوعامداعى بەرەكە-بىرلىكتى ساقتاۋ ەلدىكتى نىعايتۋ جولىنداعى نەگىزگى مىندەتتەردىڭ ءبىرى ەكەنىن ايتتى. مەملەكەت باسشىسى اتاپ وتكەندەي، وسى ىستە زيالى قاۋىمعا ايرىقشا جاۋاپكەرشىلىك جۇكتەلەدى. راسىمەن، اعا بۋىننىڭ اۋىزبىرشىلىگى تۇتاس ەلدىڭ ىنتىماعىنا اسەر ەتەتىنى ءسوزسىز.
قۇرىلتايدا مەملەكەتتىك تىلگە قاتىستى ماسەلە دە نازاردان تىس قالعان جوق. پرەزيدەنتىمىز قازاق ءتىلىنىڭ عىلىم تىلىنە اينالىپ كەلە جاتقانىن جانە ءتىلىمىزدىڭ قولدانۋ اياسىن كەڭەيتە ءتۇسۋ مەملەكەتتىك ساياساتتىڭ باستى باعىتى بولىپ قالاتىنىن ايتتى. بۇل ىستە كرەاتيۆتى يندۋستريانىڭ ماڭىزى ەرەكشە. وسىعان وراي الداعى ۋاقىتتا اتالعان سالاداعى كەشەندى جۇمىستار جالعاسا بەرەدى.
سونداي-اق مەملەكەت باسشىسى قوعامدا كىتاپ وقۋ مادەنيەتىن ورنىقتىرۋ ءۇشىن قۇرىلتاي مۇشەلەرىنىڭ ۇلتتىق كىتاپ كۇنىن بەلگىلەۋ تۋرالى ۇسىنىسىنا قولداۋ ءبىلدىرىپ، ونى مازمۇندى ءارى ناتيجەلى وتكىزۋ كەرەكتىگىن ايتتى.
ەلدىڭ يدەولوگيالىق كەڭىستىگىن كەڭەيتۋ جولىندا مادەني مۇرانى ساقتاۋ، ءتول تاريحىمىز بەن كورنەكتى تۇلعالارىمىزدى دارىپتەۋ ءىسى دە باسىمدىققا يە. سول سەبەپتى پرەزيدەنتىمىز بيىل جوشى ۇلىسىنىڭ نەگىزى قالانعانىنا 800 جىل تولىپ وتىرعانىن نازارعا الىپ، ەلىمىزدى الەمگە تانىتۋ ءۇشىن التىن وردا برەندىن جان-جاقتى جانە كەڭىنەن پايدالانۋ قاجەت ەكەنىن اتاپ ءوتتى.
ۇلتتىڭ جاڭا ساپاسىن قالىپتاستىرۋ جولىندا جاعىمسىز ادەتتەردەن ارىلۋدىڭ ماڭىزى زور. قازىرگى تاڭدا ءتۇرلى ۇردىستەرگە بايلانىستى قوعامعا ءقاۋىپتى جاڭا كەسەلدەر پايدا بولعانى بەلگىلى. مەملەكەت باسشىسى وسى ماسەلەگە ەرەكشە توقتالىپ، ەسىرتكى ساۋداسى، لۋدومانيا، تۇرمىستىق زورلىق- زومبىلىق، بۋللينگ پەن اگرەسسيا، ۆانداليزم جانە ىسىراپشىلدىق سياقتى ەلدىڭ ىرگەلى جىلجۋىنا تۇساۋ بولاتىن دەرتتەرگە توسقاۋىل قويۋ كەرەكتىگىن ايتتى.
قاسىم-جومارت كەمەل ۇلى ۇلت تامىرىنا بالتا شاباتىن مۇنداي ادەتتەردەن تۇبەگەيلى قۇتىلۋ ءۇشىن زاڭدى كۇشەيتىپ، جازانى قاتايتىپ، باتىل قادامدار جاساۋ قاجەت ەكەنىن اتاپ ءوتتى.
سونىمەن قاتار پرەزيدەنتىمىز ۇلتتىڭ جاڭا كەلبەتىن ايقىندايتىن نەگىزگى قۇندىلىقتارعا دا توقتالدى. ولار: تاۋەلسىزدىك جانە وتانشىلدىق، بىرلىك جانە ىنتىماق، ادىلدىك جانە جاۋاپكەرشىلىك، زاڭ جانە ءتارتىپ، ەڭبەكقورلىق جانە كاسىبي بىلىكتىلىك، جاسامپازدىق جانە جاڭاشىلدىق.
ەلىمىزدە جالپىۇلتتىق قۇندىلىقتار جۇيەسىن بەكىتۋ، قوعامدا جاڭا ەتيكا قالىپتاستىرۋ، پرەزيدەنتىمىز ايتقان «ادال ازاماتقا» لايىقتى ۇرپاق تاربيلەۋدە اتالعان قاعيدالار نەگىزگى باعىت بولارى انىق.
«سوندىقتان مەملەكەت باسشىسى ايقىنداپ بەرگەن جاڭا يدەولوگيالىق باعدار اياسىنا بۇكىل قوعام بولىپ توپتاسىپ، جاڭا مىندەتتەردى ىسكە اسىرۋدا جۇدىرىقتاي جۇمىلۋىمىز كەرەك. بۇل رەتتە پارلامەنت، ونىڭ ىشىندە سەنات زاڭنامالىق باعىتتاعى جۇمىستى ساپالى ءارى ۋاقىتىلى جۇرگىزۋگە دايىن ەكەنىن اتاپ وتكىم كەلەدى. الداعى ۋاقىتتا حالقىمىز وسى باعىتتا بىرلىك پەن پرەزيدەنتىمىز ايتقان «ادال ادام - ادال ەڭبەك - ادال تابىس» ءۇش تاعانىنا تابان تىرەپ ارەكەت ەتسە، وزىق ويلى ۇلت بولىپ قالىپتاساتىنى ءسوزسىز. سول سەبەپتى، بارشاڭىزدى ەلدىكتى نىعايتاتىن ىسكە بەيجاي قاراماي، بەلسەندىلىك تانىتۋعا شاقىرامىن»، - دەدى سەنات ءتوراعاسى.
