ۇلتتىق سپورتىمىز قاشان وليمپيادا باعدارلاماسىنا ەنەدى

استانا. KAZINFORM - بيىلدان باستاپ ۇلتتىق سپورت تۇرلەرىنە باسىمدىق بەرىلەدى. ماۋسىم ايىندا كۇشىنە ەنگەن «دەنە شىنىقتىرۋ جانە سپورت تۋرالى» زاڭنىڭ جاڭا رەداكتسياسىندا ۇلتتىق سپورت تۇرلەرى وليمپيادالىق جانە پاراليمپيادالىق سپورت تۇرلەرىمەن ءبىر دەڭگەيدە باسىم باعىتتار قاتارىنا ەنگىزىلدى.

- بيىلدان باستاپ ۇلتتىق سپورت تۇرلەرى باسىم سپورت تۇرلەرىنىڭ قاتارىنا ەنگىزىلدى. كەلەسى جىلدان باستاپ ولارعا جەكە بيۋدجەت بولىنەدى، وقۋ-جاتتىعۋ جيىندارى ۇيىمداستىرىلادى. سونداي-اق عىلىمي- مەديتسينالىق تۇرعىدان قولداۋ كورسەتىلەدى. جاڭا زاڭ اياسىندا سپورتشىلارعا بەرىلەتىن سىياقىلار مەن الەۋمەتتىك قولداۋ قايتا بەكىتىلەدى. وسى ۋاقىتقا دەيىن ۇلتتىق سپورت قاۋىمداستىق دەڭگەيىندە عانا دامىسا، ەندى ءارقايسىسى دەربەس فەدەراتسيا بولىپ قۇرىلادى. بۇل ولارعا ءوز بيۋدجەتىن باسقارۋعا مۇمكىندىك بەرەدى. سونىمەن قاتار ۇلتتىق سپورت بويىنشا باپكەرلەر دايىندايتىن جاڭا ۋنيۆەرسيتەت سالىنىپ جاتىر. ونىڭ باستى ماقساتى - كاسىبي ماماندار مەن مەنەدجەرلەردى دايارلاۋ، - دەيدى تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ رەسمي وكىلى Jibek Joly ارناسىنىڭ «بۇگىن LIVE» باعدارلاماسىنا بەرگەن سۇحباتىندا.

مامان ۇلتتىق سپورتپەن اينالىساتىنداردىڭ باسىم بولىگى اۋىلدىق جەردە تۇراتىنىن ايتادى.

- قازىر ەلىمىزدە 8 ميلليوننان استام ادام سپورتپەن اينالىسادى، سونىڭ 700 مىڭى ۇلتتىق سپورت تۇرلەرىن تاڭدايدى. ءارتۇرلى ايماقتا 1500-گە جۋىق باپكەر جۇمىس ىستەيدى، ولاردىڭ مىڭنان استامى اۋىلدىق جەردە، - دەيدى مەيرامعازى ساپارعاليەۆ.

كوميتەت وكىلى ۇلتتىق سپورتىمىزدى وليمپياداعا ەنگىزۋ ءۇشىن قانداي تالاپتار قويىلاتىنىن ءتۇسىندىردى.

- ۇلتتىق سپورت تۇرلەرىن وليمپيادا باعدارلاماسىنا ەنگىزۋ ءۇشىن ەڭ الدىمەن حالىقارالىق وليمپيادا كوميتەتىنىڭ ماقۇلداۋى قاجەت. سونىمەن قاتار ول سپورت ءتۇرى حالىقارالىق دەڭگەيدە دامىپ، بۇقارالىق سيپات الۋى ءتيىس. بۇل بىردەن جۇزەگە اسا سالاتىن پروتسەسس ەمەس، وعان كوپ جىلدار مەن جۇيەلى جۇمىس كەرەك. ەڭ الدىمەن ۇلتتىق سپورت تۇرلەرىن ازيا ويىندارىنىڭ باعدارلاماسىنا ەنگىزۋ ماڭىزدى. ەگەر الەمدىك دەڭگەيدە قىزىعۋشىلىق ارتسا، ونى قولداۋعا دايىنبىز، - دەيدى ول.

مەيرامعازى ساپارعاليەۆ قاي سپورت تۇرلەرى وليمپيادا باعدارلاماسىنا ەنە الاتىنىن دا اتادى.

- ينتەللەكتۋالدى ويىنداردىڭ ىشىندە توعىزقۇمالاق، ال جەكپە-جەك تۇرلەرىنەن قازاق كۇرەسى ەڭ جوعارى الەۋەتكە يە. سونداي-اق ات سپورتى تۇرلەرىنە دە قىزىعۋشىلىق بار، - دەيدى مامان.

اۆتور

ارۋجان ماحمۋت