ۇلتتىق قوردى پايدالانۋدىڭ جاڭا قاعيداسى بەكىتىلدى

استانا. KAZINFORM - ۇكىمەتتىڭ 2-شىلدەدەگى قاۋلىسىمەن اكتيۆتەردى ۇلتتىق قورعا ەسەپكە جاتقىزۋ، ۇلتتىق قوردى پايدالانۋ قاعيدالارى، سونداي-اق ۇلتتىق قوردى قالىپتاستىرۋ جانە پايدالانۋ تۋرالى جىلدىق ەسەپتىڭ نىساندارى مەن ونى جاساۋ قاعيدالارى بەكىتىلدى.

ۇلتتىق قور بيۋدجەت كودەكسىندە بەلگىلەنگەن تۇسىمدەردىڭ ەسەبىنەن قالىپتاستىرىلادى. ۇلتتىق بانك ۇكىمەتكە ۇلتتىق قور قاراجاتىن ەسەپكە الۋ جانە ونى جۇمساۋ ءۇشىن تەڭگەلىك شوت جانە شەتەل ۆاليۋتاسىندا تۇسەتىن قاراجاتتىڭ تەڭگەلىك بالاماسىن ەسەپكە الۋ ءۇشىن تەڭگەدە ءتيىستى شوت اشادى.

مۇناي سەكتورى ۇيىمدارىنا:

- شيكى مۇنايدى، گاز كوندەنساتىن وندىرۋمەن اينالىساتىن زاڭدى تۇلعالار؛

- شيكى مۇنايدى، گاز كوندەنساتىن بارلاۋعا كەلىسىمشارتتار جاساسقان زاڭدى تۇلعالار؛

- جەر قويناۋىن پايدالانۋشى سالىقتىق مىندەتتەمەنى زاتتاي نىساندا ورىنداۋ ەسەبىنە بەرگەن پايدالى قازبالاردى مەملەكەت اتىنان الۋشىلار جاتادى.

مۇناي سەكتورى ۇيىمدارىنىڭ كەلەسى قارجى جىلىنا ارنالعان تىزبەسى اعىمداعى قارجى جىلىنىڭ جەلتوقسانىندا بيۋدجەتتى اتقارۋ جونىندەگى ورتالىق ۋاكىلەتتى ورگانمەن جانە جەر قويناۋىن پايدالانۋ، مۇناي كەلىسىمشارتتارىن جاساسۋ جانە ورىنداۋ سالاسىنداعى مەملەكەتتىك ساياساتتى ىسكە اسىرۋدى جۇزەگە اسىراتىن قۇزىرەتتى ورگانمەن بىرلەسىپ بەكىتىلەدى.

مەملەكەتتىك قازىناشىلىق ايدىڭ باسىنا دەيىن كەمىندە بەس جۇمىس كۇنىنەن كەشىكتىرمەي ۇلتتىق قورعا جىبەرىلەتىن جانە ۇكىمەتتىڭ ۇلتتىق بانكتە اشىلعان شوتتارىنا اۋدارىلاتىن تۇسىمدەر سومالارىنىڭ الداعى ايعا ارنالعان بولجامىن ۇلتتىق بانككە ۇسىنادى.

ۇكىمەتتىڭ ۇلتتىق بانكتە اشىلعان تەڭگەلىك شوتىندا تۇسىمدەردىڭ جانە تولەمدەر بويىنشا قارجىلاندىرۋدىڭ جيىنتىق جوسپارىنا سايكەس ۇلتتىق قوردان رەسپۋبليكالىق بيۋدجەتكە بەرىلەتىن كەلەسى اي سايىنعى كەپىلدەندىرىلگەن ترانسفەرتتى اۋدارۋ شەڭبەرىندە جۇزەگە اسىرىلاتىن الىپ قويۋ ءۇشىن جەتكىلىكتى سومادا قاراجات جينالعاننان كەيىن قارجى نارىعىنداعى احۋالعا قاراي قاراجات ۇلتتىق قوردىڭ ۇلتتىق بانكتە شەتەل ۆاليۋتاسىندا اشىلعان شوتىنا ەسەپكە جاتقىزىلا وتىرىپ، تەڭگەلىك شوتتان ايىرباستالادى.

شەتەل ۆاليۋتاسىنداعى تۇسىمدەردى ۇلتتىق بانك مەملەكەتتىك قازىناشىلىقتىڭ كوررەسپوندەنتتىك شوتتارىنا شەتەل ۆاليۋتاسىندا ەسەپكە جاتقىزادى. ۇلتتىق قورعا ەسەپكە جاتقىزۋعا ارنالعان ۆاليۋتالار تۇرلەرى بويىنشا شەتەل ۆاليۋتاسىن قايتا ايىرباستاۋدى مەملەكەتتىك قازىناشىلىق ۇلتتىق بانكتەن ەلەكتروندىق تۇردەگى تولەم قۇجاتتارى قوسا بەرىلگەن شەتەل ۆاليۋتاسىنداعى شوتتار بويىنشا ءۇزىندى كوشىرمەلەردى العان كۇننەن باستاپ ءۇش جۇمىس كۇنى ىشىندە جۇزەگە اسىرادى.

شەتەل ۆاليۋتاسى قايتا ايىرباستالعاننان كەيىن مەملەكەتتىك قازىناشىلىق تەڭگەمەن الىنعان سومانى ۇلتتىق قوردىڭ قولما- قول اقشانى باقىلاۋ شوتىنا ەسەپكە جاتقىزادى جانە سول جۇمىس كۇنى بيۋدجەتتى اتقارۋ راسىمىنە سايكەس شەتەل ۆاليۋتاسىندا تۇسەتىن قاراجاتتىڭ تەڭگەلىك بالاماسىن ەسەپكە الۋ ءۇشىن ۇكىمەتتىڭ ءتيىستى شوتىنا تەڭگەمەن اۋدارادى، ۇكىمەتتىڭ شوتتارىنا ەسەپكە جاتقىزىلاتىن شەتەلدىك ۆاليۋتانى دايەكتى تۇردە قايتا ايىرباستاۋ جانە ايىرباستاۋ وپەراتسياسى ءۇشىن ۇلتتىق بانك بەلگىلەگەن حابارلامالار، وتىنىشتەر بەرۋ جانە سومانى تەڭگەمەن ەسەپكە جاتقىزۋ كەستەسىن ساقتايدى.

ۇلتتىق بانك ۇلتتىق قوردى باسقارۋدان تۇسەتىن ينۆەستيتسيالىق كىرىستەردى ەسەپكە الۋدى كاستوديانداردان تۇسەتىن اقپاراتتىڭ نەگىزىندە ەسەپكە جازۋ ادىسىمەن جۇرگىزەدى. ينۆەستيتسيالىق كىرىستەردىڭ سوماسى ۇلتتىق قور كاستوديانىنىڭ شوتتارىندا ۇلتتىق قور اكتيۆتەرىنىڭ قۇرامىندا كورسەتىلەدى.

ۇلتتىق قورعا تۇسەتىن قازاقستان رەسپۋبليكاسىنىڭ زاڭناماسىندا تىيىم سالىنباعان وزگە تۇسىمدەر مەن كىرىستەردى زاڭدى جانە جەكە تۇلعالار ۇكىمەتتىڭ ۇلتتىق بانكتە اشىلعان شوتىنا اۋدارادى.

ۇلتتىق قور قاراجاتىن پايدالانۋ ءتارتىبى

ۇلتتىق قوردىڭ قاراجاتىن پايدالانۋ بيۋدجەت كودەكسىندە كوزدەلگەن ماقساتتارعا عانا جۇزەگە اسىرىلادى. ۇلتتىق قوردىڭ قاراجاتىن جۇمساۋ ۇلتتىق قوردان رەسپۋبليكالىق بيۋدجەتكە بەرىلەتىن كەپىلدەندىرىلگەن ترانسفەرت تۇرىندە، پرەزيدەنت ايقىندايتىن ماقساتتارعا اسا ماڭىزدى وبەكتىلەر مەن جالپى ەلدىك ماڭىزى بار جوبالاردى قارجىلاندىرۋعا ۇلتتىق قوردان رەسپۋبليكالىق بيۋدجەتكە بەرىلەتىن نىسانالى ترانسفەرتتەر تۇرىندە، نىسانالى تالاپتاردى تولەۋ جانە نىسانالى جيناقتاردى اۋدارۋعا، ەسەپكە جاتقىزۋ مەن تولەۋگە بايلانىستى بانكتىك كورسەتىلەتىن قىزمەتتەرگە اقى تولەۋ بويىنشا شىعىستاردى جابۋ تۇرىندە، سونداي- اق ۇلتتىق قوردى باسقارۋعا جانە جىل سايىن ءاۋديتتى جۇرگىزۋگە بايلانىستى شىعىستاردى جابۋ تۇرىندە جۇزەگە اسىرىلادى.

ۇكىمەتتىڭ رەسپۋبليكالىق بيۋدجەت تۋرالى زاڭدى ىسكە اسىرۋ تۋرالى قاۋلىسىنىڭ نەگىزىندە مەملەكەتتىك قازىناشىلىق مىندەتتەمەلەر بويىنشا قارجىلاندىرۋدىڭ جيىنتىق جوسپارىن، تۇسىمدەردىڭ جانە تولەمدەر بويىنشا قارجىلاندىرۋدىڭ جيىنتىق جوسپارىن جاسايدى جانە بەكىتەدى، ولارعا سايكەس رەسپۋبليكالىق بيۋدجەتكە ۇلتتىق قوردان بەرىلەتىن كەپىلدەندىرىلگەن جانە نىسانالى ترانسفەرتتەردى قارجى جىل ىشىندە ءتيىستى كەزەڭگە كوزدەلگەننەن اسپايتىن كولەمدە تارتۋ جۇزەگە اسىرىلادى.

مەملەكەتتىك قازىناشىلىق رەسپۋبليكالىق بيۋدجەت بويىنشا تۇسىمدەردىڭ جانە تولەمدەر بويىنشا قارجىلاندىرۋدىڭ جيىنتىق جوسپارى بەكىتىلگەن كۇننەن باستاپ ءۇش جۇمىس كۇنى ىشىندە ۇلتتىق قوردان رەسپۋبليكالىق بيۋدجەتكە بەرىلەتىن كەپىلدەندىرىلگەن ترانسفەرتتىڭ بەكىتىلگەن كولەمىن، ۇلتتىق قوردان بەرىلەتىن نىسانالى ترانسفەرتتەردىڭ بەكىتىلگەن كولەمىن ايلارعا بولە وتىرىپ، ۇلتتىق بانككە جەتكىزەدى جانە ۇلتتىق بانك اۋدارۋدى جۇزەگە اسىراتىن دەرەكتەمەلەر تۋرالى حابارلايدى.

مەملەكەتتىك قازىناشىلىق رەسپۋبليكالىق بيۋدجەتتىڭ ۇلتتىق قوردان بەرىلەتىن كەپىلدىك بەرىلگەن ترانسفەرتكە قاجەتتىلىك كولەمىن اي سايىن بولجايدى.

ۇلتتىق قوردان بەرىلەتىن كەپىلدەندىرىلگەن ترانسفەرتكە رەسپۋبليكالىق بيۋدجەت قاجەتتىلىگىنىڭ الداعى ايعا ارنالعان كولەمىن بولجاۋ رەسپۋبليكالىق بيۋدجەتتىڭ قولما- قول اقشانى باقىلاۋ شوتىنداعى بيۋدجەت قاراجاتىنىڭ قالدىعى، رەسپۋبليكالىق بيۋدجەتكە تۇسەتىن تۇسىمدەردىڭ كۇتىلەتىن كولەمىنىڭ بولجامدارى مەن رەسپۋبليكالىق بيۋدجەت شىعىستارىنىڭ الداعى ايدا كۇتىلەتىن اتقارىلۋى جانە رەسپۋبليكالىق بيۋدجەتتىك باعدارلامالاردىڭ اكىمشىلەرى اي سايىن مەملەكەتتىك قازىناشىلىققا ۇسىناتىن اقپارات ەسكەرىلە وتىرىپ ايقىندالادى.

ۇلتتىق قوردان كەپىلدەندىرىلگەن جانە نىسانالى ترانسفەرتتەردى بولۋگە ارنالعان ءوتىنىمدى بيۋدجەتتى اتقارۋ جونىندەگى ورتالىق ۋاكىلەتتى ورگان وسى قاعيدالارعا 3-قوسىمشاعا سايكەس نىسان بويىنشا جاسايدى، وعان بيۋدجەتتى اتقارۋ جونىندەگى ورتالىق ۋاكىلەتتى ورگاننىڭ ءبىرىنشى باسشىسى نەمەسە ول ۋاكىلەتتىك بەرگەن تۇلعا قول قويادى جانە كەلەسى جۇمىس كۇنىنەن كەشىكتىرىلمەي ۇلتتىق بانككە جىبەرىلەدى.

ۇلتتىق قوردان رەسپۋبليكالىق بيۋدجەتكە بەرىلەتىن كەپىلدەندىرىلگەن ترانسفەرتتىڭ اقشا قاجەتتىلىگىنىڭ قاجەتتى كولەمىن اۋدارۋ اي سايىن ۇلتتىق بانككە جىبەرىلەتىن ءوتىنىمنىڭ نەگىزىندە جۇزەگە اسىرىلادى.

ۇلتتىق قوردان رەسپۋبليكالىق بيۋدجەتكە بەرىلەتىن نىسانالى ترانسفەرتتەردى اۋدارۋ ۇلتتىق بانككە جىبەرىلەتىن ءوتىنىمنىڭ نەگىزىندە جۇزەگە اسىرىلادى.

ۇلتتىق بانك بيۋدجەتتى اتقارۋ جونىندەگى ورتالىق ۋاكىلەتتى ورگاننىڭ ءوتىنىمى نەگىزىندە ونى العان كۇننەن باستاپ ون بەس جۇمىس كۇنى ىشىندە كەپىلدىك بەرىلگەن ترانسفەرتتىڭ مالىمدەلگەن سوماسىن، ون بەس جۇمىس كۇنى ىشىندە ۇلتتىق قوردان بەرىلەتىن نىسانالى ترانسفەرتتى رەسپۋبليكالىق بيۋدجەتتىڭ قولما-قول اقشانى باقىلاۋ شوتىنا اۋدارادى.

ۇكىمەت قاۋلىسى العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

ايتا كەتەلىك ۇلتتىق قوردان بولىنگەن قاراجاتتى تالان- تاراجعا سالعان پاۆلودارلىق شەنەۋنىك سوتتالعان ەدى.

اۆتور

مارلان جيەمباي