ۇلتتىق قوردان بالاعا تۇسەتىن اقشانىڭ كولەمى مۇناي باعاسىنا بايلانىستى بولا ما
ۇلتتىق قوردان بالا شوتىنا تۇسەتىن اقشانىڭ مولشەرى مۇناي باعاسى مەن ۇلتتىق بانكتىڭ ينۆەستيتسيالىق ساياساتىنا بايلانىستى بولادى.
قارجى مينيسترلىگىنىڭ بيۋجەتتىك كرەديتتەۋ، ۇلتتىق قور جانە قارجى سەكتورى ماسەلەلەرى جونىندەگى ءوزارا ءىس-قيمىل دەپارتامەنتىنىڭ ديرەكتورى ايبول ارعىنعازين ۆەدومستۆو ۇيىمداستىرعان بريفينگىدە وسىندا مالىمەت ايتتى، دەپ حابارلايدى Kazinform.
«ۇلتتىق قوردان بالا شوتىنا تۇسەتىن اقشا نەعۇرلىم مول بولۋ ءۇشىن قازاقستاندىقتار مۇناي قىمبات بولسىن دەپ تىلەۋى كەرەك پە؟» دەپ سۇرادى جۋرناليست.
دەپارتامەنت ديرەكتورى مۇنداي ساۋالدىڭ قيسىنى بار ەكەنىن ايتادى.
«ۇلتتىق قورعا تۇسەتىن كىرىس كوزى بىرنەشەۋ. اشىعىن ايتقان كەزدە، ونىڭ باسىم بولىگى شيكىزات، مينەرالدى ءونىم ەكسپورتتاۋدىڭ ەسەبىنەن تۇسەتىن تۇسىمدەردەن قۇرالادى. ول ءبىزدىڭ سالىق كودەكسىندە اشىق كورسەتىلگەن. سوندىقتان ءسوزىڭىزدىڭ جانى بار. مۇنايدان، جالپى مەتاللۋرگيالىق ونىمدەر ەكسپورتىنان تۇسەتىن تابىس ارتقان سايىن، ۇلتتىق قوردىڭ دا كىرىستىلىگى ارتادى دەۋگە بولادى»، - دەدى ايبول ارعىنعازين.
سونداي-اق، ول ۇلتتىق قوردىڭ ينۆەستيتسيالىق كىرىستىلىگى ۇلتتىق بانكتىڭ جۇمىسىنا دا بايلانىستى ەكەنىن ەسكە سالدى.
«ۇلتتىق قوردىڭ كىرىستىلىگى ينۆەستيتسيالىق وپەراتسيالاردىڭ قالاي باسقارىلعانىنا دا بايلانىستى. بۇل وپەراتسيالاردىڭ ءبارىن ۇلتتىق بانك جۇرگىزەدى. ۇلتتىق قور ۇكىمەتتىڭ يەلىگىندە بولعانىمەن، ۇلتتىق بانككە سەنىمگەرلىك باسقارۋعا بەرىلگەن. ونىڭ بۇكىل كىرىستىلىگىنە، تابىسى قانداي دەڭگەيدە بولعانىنا، اكتيۆتەرى قانداي ينۆەستيتسيا قۇرالدارىنا سالىنعانىنا ۇلتتىق بانك جاۋاپ بەرەدى»، - دەدى دەپارتامەنت ديرەكتورى.
