ۇلتتىق قورعانىس ۋنيۆەرسيتەتىنىڭ 217 تۇلەگىنە ماگيستر دارەجەسى بەرىلدى
استانا. KAZINFORM - قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتىندە جەدەل-تاكتيكالىق جانە جەدەل-ستراتەگيالىق باسقارۋ دەڭگەيلەرى ماماندارىنىڭ وقۋدى اياقتاۋىنا بايلانىستى سالتاناتتى شارا ءوتتى.
ءىس-شاراعا قورعانىس مينيسترلىگىنىڭ باسشىلىق قۇرامى، وقىتۋشىلار، ماگيسترانتتار، اسكەري قىزمەتشىلەردىڭ تۋىستارى مەن جاقىندارى قاتىستى.
ق ر قورعانىس ءمينيسترىنىڭ ءبىرىنشى ورىنباسارى - قارۋلى كۇشتەردىڭ باس شتاب باستىعى گەنەرال-لەيتەنانت سۇلتان كامالەتدينوۆ اسكەري باسشىلاردىڭ جاڭا بۋىنىن قۇتتىقتاي وتىرىپ، بۇل وقيعانىڭ ەلدىڭ قارۋلى كۇشتەرى مەن قورعانىس قابىلەتىن نىعايتۋداعى ماڭىزدىلىعىن اتاپ ءوتتى.
ول جوعارى بىلىكتى اسكەري كادر دايارلاۋ جۇيەسىن جەتىلدىرۋگە ەلەۋلى ۇلەس قوساتىن پروفەسسورلىق-وقىتۋشىلار قۇرامىنا، سونداي-اق اسكەري قىزمەتشىلەردىڭ وتباسى مۇشەلەرىنە مورالدىق قولداۋ كورسەتكەنى ءۇشىن العىسىن ءبىلدىردى. ول جاڭا زامانعا ءساتتى بەيىمدەلۋگە مۇمكىندىك بەرەتىن وزەكتى ءبىلىمنىڭ ماڭىزدىلىعىن اتاپ ءوتتى.
- قارۋلى كۇشتەردى بولىپ جاتقان وزگەرىستەرگە بەيىمدەۋ، باسقارۋ جۇيەسىن جاڭعىرتۋ جانە ۇلتتىق قورعانىس ۋنيۆەرسيتەتىندە جاڭا تەحنولوگيالاردى ەنگىزۋ بويىنشا جوعارعى باس قولباسشى قويعان مىندەتتەردى ەسكەرە وتىرىپ، اسكەرلەردىڭ قاجەتتىلىكتەرىنە سايكەس ءبىلىم بەرۋ باعدارلامالارى ۇنەمى جەتىلدىرىلىپ وتىرادى. ۋنيۆەرسيتەتتە اسكەري قۇرىلىستىڭ، ەلدىڭ قورعانىس قابىلەتىن جانە ۇلتتىق قاۋىپسىزدىگىن قامتاماسىز ەتۋدىڭ وزەكتى ماسەلەلەرىنىڭ كەڭ سپەكترى بويىنشا اۋقىمدى عىلىمي-زەرتتەۋ جۇمىستارى جۇرگىزىلۋدە، - دەپ اتاپ ءوتتى ول.
ۇ ق ش ۇ ەلدەرى قارۋلى كۇشتەرىنىڭ تۇلەكتەرىنە ارناعان سوزىندە گەنەرال-لەيتەنانت سۇلتان كامالەتدينوۆ العان بىلىمدەرى ولارعا وزدەرىنىڭ قارۋلى كۇشتەرىنىڭ مىندەتتەرىن لايىقتى شەشۋگە جانە ءبىزدىڭ دوستاس مەملەكەتتەرىمىزدىڭ اسكەري قاۋىپسىزدىگىن نىعايتۋ ىسىنە ۇلەس قوسۋعا مۇمكىندىك بەرەتىنىنە سەنىم ءبىلدىردى.
- ۋنيۆەرسيتەت باسشىلىعىنا، پروفەسسورلىق-وقىتۋشىلىق قۇرامعا بىزگە ءىس جۇزىندە پايدالى بولاتىن ىرگەلى، ءارى مامانداندىرىلعان ءبىلىم ءۇشىن العىس بىلدىرەمىز. بارلىق ماگيسترانتتارعا ولاردى قىزمەتتە تابىستى قولدانۋىن تىلەيمىن، - دەپ ءبولىستى «قارۋلى كۇشتەر باس شتابىنىڭ اكادەمياسى» فاكۋلتەتىنىڭ تۇلەگى پولكوۆنيك ايبول ءجۇسىپوۆ.
بيىل مەملەكەتتىك اتتەستاتتاۋ كوميسسياسىنىڭ شەشىمىمەن 217 تۇلەككە ماگيستر دارەجەسى بەرىلدى. ونىڭ ىشىندە ۇلتتىق ۇلاننىڭ 19, ۇ ق ك شەكارا قىزمەتىنىڭ 12, توتەنشە جاعدايلار مينيسترلىگىنىڭ 6 اسكەري قىزمەتشىسى بار.
سونىمەن بىرگە قىرعىزستان قارۋلى كۇشتەرىنىڭ 5 جانە تاجىكستان قارۋلى كۇشتەرىنىڭ 11 وكىلى وقۋدى اياقتاپ شىقتى. مەملەكەتتىك اتتەستاتتاۋ كوميسسياسىنىڭ شەشىمى بويىنشا ولارعا ۇلتتىق قاۋىپسىزدىك جانە اسكەري ىستەر ماگيسترى دارەجەسى بەرىلدى. وقۋدىڭ بارلىق كەزەڭىندە ەمتيحانداردى جانە قورىتىندى اتتەستاتتاۋدى «وتە جاقسى» باعاسىنا تاپسىرعان ماگيسترانتتارعا توسبەلگى بەرىلدى. ولاردىڭ اتى-ءجونى وقۋ ورنىنىڭ قۇرمەت تاقتاسىنا ەنگىزىلەدى.
وسىعان دەيىن اسكەري وقۋ ورىندارىنىڭ 14 تۇلەگى قاسىم-جومارت توقايەۆتىڭ قولىنان وفيتسەرلىك شەن العانى تۋرالى جادىق.
