ۇلتتىق قور قارجىسىن شەتەلدىك كومپانيالاردىڭ قۇندى قاعازدارىنا سالۋدى ازايتۋ كەرەك - قايىربەك ارىستانبەكوۆ
استانا. KAZINFORM - ەكونوميكالىق ساياسات ينستيتۋتىنىڭ ديرەكتورى، پرەزيدەنت جانىنداعى ۇلتتىق قۇرىلتاي مۇشەسى قايىربەك ارىستانبەكوۆ پرەزيدەنت جولداۋىنىڭ ۇلتتىق قور قاراجاتىنا ارنالعان تۇسىنىڭ ءمانىن ءتۇسىندىردى.
«ۇلتتىق قوردىڭ ەكى ستراتەگيالىق فۋنكتسياسى بار. ءبىرىنشىسى - قىسىلتاياڭ زاماندا تۇراقتاندىرۋ. ەكىنشىسى - كەلەر ۇرپاقتىڭ يگىلىگىنە قاراجات جيناقتاۋ. وكىنىشكە قاراي، ءبىزدىڭ ۇلتتىق قوردىڭ كوبەيۋ جىلدامدىعىن باسقا ەلدەرمەن سالىستىرساق، وتە تومەن. بۇل ەندى ۇلتتىق بانك پەن قارجى مينيسترلىگىنە قويىلاتىن سۇراق، باسقارىپ وتىرعان سولار. مىسالى، نورۆەگيانىڭ ۇلتتىق قورىنىڭ جىلدىق تابىسى بىزدىكىنەن ەكى ەسە كوپ.
پرەزيدەنت بۇل جولداۋىندا ۇلتتىق قوردىڭ ءبىر بولىگىن سىرتقا ەمەس، ىشكە سالۋ كەرەك دەگەندى مەڭزەدى دەپ ويلايمىن. بانكتەردە اقشا كوپ، ءبىراق ولار ەكونوميكانى نەسيەلەندىرىپ جاتقان جوق. ماسەلە سوندا. ءبىراق بانك مەملەكەتتەن تاۋەلسىز بولعاندىقتان، ەكونوميكانى ۇلتتىق قور ارقىلى دا قارجىلاندىرۋ قاجەتتىگى ءسوز بولىپ وتىر. ولار قازىر تۇتىنۋ نەسيەلەرى ارقىلى حالىقپەن عانا جۇمىس ىستەپ جاتىر. ال وندىرىسكە، ينفراقۇرىلىمدىق جوبالارعا بانكتەن بولىنەتىن نەسيە از»، - دەدى ساراپشى Kazinform ءتىلشىسىنىڭ سۇراعىنا بەرگەن جاۋابىندا.
ونىڭ ايتۋىنشا، قازىر ۇلتتىق قور قاراجاتىنىڭ ءبىر بولىگى شەتەلدىك قۇندى قاعازدار ساتىپ الۋعا، اكسيالار مەن وبليگاتسيالارعا، دەريۆاتيۆتەرگە سالىنعان.
«ونىڭ پايىزى تومەن، ياعني ۇلتتىق قور اقشاسىنا قاي كومپانيانىڭ اكسياسىن ساتىپ الساق، سولاردى بايىتىپ وتىرمىز دەۋگە بولادى. شەتەلدىك قارجى ينستيتۋتتارىنا قىزمەت ەتپەۋى كەرەك دەپ وسىنى مەڭزەدى دەپ ويلايمىن»، - دەيدى ەكونوميست.
قايىربەك ارىستانبەكوۆ ۇلتتىق قوردىڭ اقشاسىن تۇگەل ىشكى ەكونومكاعا سالۋ مۇمكىن ەمەس ەكەنىن دە ايتادى.
«ۇلتتىق قوردىڭ ءبىر بولىگىن جۇمساۋ دەپ بەكەر ايتىپ تۇرعان جوقپىن. قورداعى بۇكىل اقشانى ەكونوميكاعا سالۋ دەگەن مۇمكىن ەمەس. ويتكەنى ءبارىن ەكونوميكاعا سالساق، ماكروەكونوميكالىق تاۋەكەلدەر تۋىنداۋى مۇمكىن. ولاي بولماۋ ءۇشىن ەكونوميكامىزدىڭ ۇلتتىق قوردىڭ قانشا اقشاسىن قورىتا الاتىنىن، ول شامامەن قانشا سوما ەكەنىن ەسەپتەپ شىعارۋ كەرەك. قورىتۋ قابىلەتىنەن كوپ اقشا سالىنسا، ينفلياتسيانىڭ ءورشۋى سياقتى كوپتەگەن كەرى اسەرى پايدا بولۋى مۇمكىن.
ەكونوميكامىزدىڭ قورىتۋ شەگىن انىقتاعاننان كەيىن ۇلتتىق قور اقشاسىن تەك وندىرىستىك جانە ينفراقۇرىلىمدىق جوبالارعا عانا ءبولۋ كەرەك دەپ ويلايمىن. بيىلعى جاعدايلارعا بايلانىستى سۋ جيناقتاپ ساقتاۋعا باعىتتالعان ينفراقۇرىلىمدارعا سالۋعا بولادى. ءبىراق ول ۆاليۋتا نارىعىنا تۇسپەۋ كەرەك، ياعني باعانىڭ كوتەرىلۋىنە جول اشپاۋى قاجەت. بۇلار - ۇلتتىق بانك پەن قارجى مينيسترلىگىنىڭ قۇزىرىنداعى شارۋا. سول ەكى مەكەمەگە جۇكتەلىپ وتىرعان مىندەت دەپ ويلايمىن»، - دەيدى ۇلتتىق قۇرىلتاي مۇشەسى.
ايتا كەتسەك، بۇگىنگى قازاقستان حالقىنا جولداۋىندا مەملەكەت باسشىسى قاسىم- جومارت توقايەۆ ۇلتتىق قوردىڭ رولىنە جەكە توقتالدى. پرەزيدەنت قور قاراجاتىن، ەڭ الدىمەن، مەملەكەت مۇددەسى ءۇشىن، ياعني ەلىمىزدىڭ ستراتەگيالىق ماقساتتارىن جۇزەگە اسىرۋ ءۇشىن پايدالانۋ قاجەتتىن ايتتى.
