ۇلتتىق قۇرىلتايدا ۇسىنىلعان باستامالار ورىندالىپ كەلەدى - ەرلان قارين
استانا. KAZINFORM - مەملەكەتتىك كەڭەسشى، قازاقستان پرەزيدەنتى جانىنداعى جاستار ساياساتى جونىندەگى كەڭەستىڭ ءتوراعاسى ەرلان قارين ويىن بيزنەسى، لوتەرەيا جانە لوتەرەيا قىزمەتى ماسەلەلەرى بويىنشا زاڭنامالىق تۇزەتۋلەرگە پىكىر ءبىلدىردى.
«ۇلتتىق قۇرىلتايدىڭ ءۇشىنشى وتىرىسىندا ۇسىنىلعان باستامالاردى ناقتى جۇزەگە اسىرۋ جالعاسۋدا. بۇگىن ءماجىلىس ءبىرىنشى وقىلىمدا ويىن بيزنەسى، لوتەرەيا جانە لوتەرەيا قىزمەتى ماسەلەلەرى بويىنشا زاڭنامالىق تۇزەتۋلەردى قابىلدادى. بۇل تۇزەتۋلەرگە دەپۋتاتتار قاسىم-جومارت توقايەۆتىڭ اتىراۋداعى سوزىنەن كەيىن باستاماشىلىق ەتتى، وندا پرەزيدەنت قازىرگى قوعامنىڭ بەس نەگىزگى الەۋمەتتىك ماسەلەسىن اتاعان ەدى»، - دەپ جازدى ە. قارين Telegram پاراقشاسىندا.
اتاپ ايتقاندا، ۇلتتىق قۇرىلتاي وتىرىسىندا پرەزيدەنت لۋدومانيا مىڭداعان وتباسىلاردى قيراتىپ، كوپتەگەن ادامداردى قىلمىسقا يتەرمەلەپ، سانسىز قيىنشىلىقتار اكەلەتىنىن اتاپ ءوتتى.
سوندىقتان مەملەكەت باسشىسى پارلامەنتتىڭ قازىرگى سەسسياسىندا ويىنعا تاۋەلدىلىككە قارسى ءىس-قيمىل تۋرالى زاڭ قابىلداۋدى جانە لۋدومانيامەن كۇرەسۋدىڭ كەشەندى جوسپارىن ازىرلەۋدى تاپسىردى.
«ەسكە سالا كەتەيىن، زاڭ جوباسىن تالقىلاۋعا ۇلتتىق قۇرىلتاي مەن پرەزيدەنت جانىنداعى جاستار ساياساتى جونىندەگى كەڭەستىڭ مۇشەلەرى بەلسەندى قاتىسىپ، بۇل ماسەلەنى قوعامدىق سالادا العاشقىلاردىڭ ءبىرى بولىپ كوتەردى»، - دەدى ە. قارين.
