ۇلتتىق مۋزەي اتريۋمىنان نۇرسۇلتان نازاربايەۆتىڭ ءمۇسىنى الىنىپ تاستالدى
استانا. KAZINFORM - ەلورداداعى ق ر ۇلتتىق مۋزەيى اتريۋمىنداعى نۇرسۇلتان نازاربايەۆ ءمۇسىنى الىنىپ تاستالۋى تۋرالى تۇسىندىرمە جاسادى.
بيىل شىلدە ايىندا ق ر ۇلتتىق مۋزەيى ءوزىنىڭ العاشقى مەرەيتويى - 10 جىلدىعىن اتاپ وتەدى. جىلدان-جىلعا قازاق حالقىنىڭ تاريحىنا، مادەنيەتىنە، ونەرىنە دەگەن قىزىعۋشىلىق ارتىپ، رەسپۋبليكانىڭ ءاربىر ايماعىنان، الىس-جاقىن شەت ەلدەردەن كەلۋشىلەردىڭ سانى 2023-جىلى 600 مىڭعا جۋىق ادامعا جەتكەن.
«10 جىلدىق اياسىندا ق ر مادەنيەت جانە اقپارات ءمينيسترىنىڭ تاپسىرماسىمەن 2024-جىلى وتاندىق جانە شەتەلدىك ساراپشىلاردى تارتا وتىرىپ، مۋزەي كەڭىستىگىن جەتىلدىرۋ پروتسەسى باستالدى. الەمدىك مۋزەي تاجىريبەسىنە سايكەس، ءار مۋزەي ەكسپوزيتسيالىق زالدارىنىڭ تۇجىرىمدامالىق مازمۇنى مەن كوركەمدىك-ستيليستيكالىق شەشىمىن جاڭارتىپ وتىرۋعا مىندەتتى. ۇلتتىق مۋزەي وسى تاجىريبەنى قولدانىپ، اتريۋم زالىن قايتا ەكسپوزيتسيالاۋدى قولعا الدى. ونىڭ نەگىزگى مىندەتى - كەلۋشىلەر ءۇشىن ىڭعايلى رەكرەاتسيالىق ايماق رەتىندە قىزمەت ەتۋ»، - دەپ حابارلادى ۇلتتىق مۋزەيدىڭ باسپا ءسوز قىزمەتى.
قايتا ەكسپوزيتسيالاۋ بيلەت الۋدان باستاپ، ەكسكۋرسيالارعا تاپسىرىس بەرۋ، وتاندىق كادەسىيلار ساتىپ الۋ، وقۋ زالىندا عىلىمي كىتاپحانا قورىمەن تانىسۋعا دەيىنگى بارلىق قىزمەت ءتۇرىن قامتيدى. اتريۋمدا ەكسكۋرسيا باستالىپ، ۇلتتىق مۋزەي مەن ونىڭ قورىداعى كوللەكسيالار، ەكسپوزيتسيالىق زالدارى تۋرالى اقپارات بەرىلەدى.
«ەسكەرتكىشكە كەلەتىن بولساق، بۇل ەكسپونات مۋزەي مۇلكى بولىپ سانالادى جانە اتريۋم تۇجىرىمداماسىنىڭ وزگەرۋىنە بايلانىستى مۋزەي قورىندا تۇراقتى ساقتاۋدا بولادى. مۋزەيدىڭ دامۋىنا قىزىعۋشىلىق تانىتىپ، ونىڭ ءىس-شارالارى، اكسيالارى مەن كورمەلەرىنە نازار اۋداراتىن قازاقستاندىقتاردىڭ، بلوگەرلەر مەن جۋرناليستەردىڭ ۇستانىمى مۋزەي قىزمەتكەرلەرىن قۋانتادى. مۋزەي كەڭىستىگىندە بولاتىن الداعى وزگەرىستەر مەن جاڭارتۋلاردى جانە كورمە زالدارىنىڭ كوركەمدىك-ستيلدىك شەشىمدەرىن قالىڭ جۇرتشىلىق جوعارى باعالايدى دەپ سەنەمىز»، - دەيدى ۇلتتىق مۋزەي وكىلدەرى.
اۆتور
ايجان سەرىكجان قىزى
