ۇلتتىق ۇلاننىڭ 1200-دەن استام ساربازى سۋ تاسقىنى بولعان ايماقتارعا كومەككە اتتاندى
الماتى. KAZINFORM - قازاقستاننىڭ باتىسى مەن سولتۇستىگىندەگى سۋ باسقان وڭىرلەرگە كومەك كورسەتۋ ءۇشىن ق ر ءى ءى م- ءى ۇلتتىق ۇلاننىڭ 1200-دەن استام جاۋىنگەرى جىبەرىلدى، دەپ حابارلادى ق ر ۇلتتىق ۇلانىنىڭ باسپا ءسوز قىزمەتى.
باسپاءسوز قىزمەتىنىڭ مالىمەتتەرىنە قاراعاندا، بۇگىن سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى سالدارىن جويۋ جونىندەگى رەسپۋبليكالىق شتابتىڭ جۇمىس كەڭەسى ءوتتى. كۇن تارتىبىندە سۋ تاسقىنىنىڭ ەكىنشى تولقىنى بولۋى مۇمكىن باتىس وڭىرلەردەگى جاعداي باستى ماسەلە رەتىندە قارالدى.
پرەمەر-مينيستر ولجاس بەكتەنوۆتىڭ تاپسىرماسى بويىنشا اتىراۋ، باتىس قازاقستان جانە سولتۇستىك قازاقستان وبلىستارىنىڭ تۇرعىندارىنا كومەكتەسۋ ءۇشىن ۇلتتىق ۇلاننىڭ كۇشتەرى مەن قۇرالدارى جىبەرىلدى. ۇكىمەت باسشىسى وبلىس اكىمدىكتەرىنە كەلەتىن اسكەري قىزمەتشىلەردى بارلىق قاجەتتى زاتتارمەن قامتاماسىز ەتۋدى، سونداي- اق تەحنيكاعا جانارماي قۇيۋ ماسەلەسىن شەشۋدى تاپسىردى.
مىناداي اسكەري بولىمدەردىڭ جەكە قۇرامى مەن تەحنيكالارى قوسىمشا كۇش رەتىندە جىبەرىلدى: 6506 اسكەري بولىمىنەن (شىمكەنت ق. ) 300 اسكەري قىزمەتشى مەن 15 اۆتوموبيل قىزىلوردا ارقىلى جولعا شىقتى، ولارعا كەيىن 5547 اسكەري ءبولىمىنىڭ 200 اسكەري قىزمەتشىسى قوسىلدى جانە ودان ءارى ولار ورال قالاسىنا دەيىن تەمىر جول كولىگىمەن 1500 شاقىرىمنان استام جول ءجۇرىپ وتەدى. شىمكەنت جەدەل بريگاداسىنىڭ سۋ تاسقىنى زارداپتارىن جويۋ جونىندەگى جيىنتىق وتريادىن تىل بويىنشا قۇراما كومانديرىنىڭ ورىنباسارى پودپولكوۆنيك ساعدات قاپاشيەۆ باسقاردى.
- ەل ءۇشىن قيىن ۋاقىتتا بارلىعىمىز قولدا بار كۇشىمىز بەن قۇرالدارىمىزدى قولدانۋىمىز كەرەك. بىزگە ۇلكەن جاۋاپكەرشىلىك جۇكتەلگەن. سۋ تاسقىنىنان زارداپ شەككەن ازاماتتارعا كومەك كورسەتۋ ءۇشىن بار كۇشىمىزدى سالامىز، - دەدى پودپولكوۆنيك ساعدات قاپاشيەۆ.
سونىمەن قاتار، 5451 اسكەري ءبولىمىنىڭ (قاراعاندى ق. ) 500 اسكەري قىزمەتشىسى مەن 18 اۆتوموبيلى تەمىر جول كولىگىمەن اتىراۋ قالاسىندا بولىپ جاتقان سۋ تاسقىنىنا قارسى جۇمىستارعا اتسالىسۋ ءۇشىن اتتاندى. جولدىڭ ۇزاقتىعى 2100 شاقىرىمنان اسادى.
سونىمەن قاتار، ەلوردالىق ۇلتتىق ۇلاننىڭ جەدەل بريگاداسىنىڭ 200 اسكەري قىزمەتشىسى استانادان پەتروپاۆلعا دەيىن 7 تەحنيكامەن بارا جاتىر. 5573 اسكەري ءبولىمىنىڭ جەكە قۇرامى سۋ باسقان ەلدى مەكەندەردىڭ كوشەلەرىندەگى باسپانالاردى ۇرى- قارىعا توناتپاس ءۇشىن سولتۇستىك قازاقستان وبلىسىندا قوعامدىق ءتارتىپتى قورعاۋ بويىنشا جاۋىنگەرلىك قىزمەت اتقارادى.
ايتا كەتەيىك، جالپى العاندا، ۇلتتىق ۇلاننىڭ 2700-دەن استام جاۋىنگەرى مەن 120 تەحنيكاسى جانە اۆيا ترانسپورتى ەلىمىزدىڭ بارلىق سۋ باسقان وڭىرلەرىندە بەلسەندى كومەك كورسەتىپ جاتىر. ولار سۋ باسقان كەنتتەر مەن قالالاردا پاترۋلدەۋ ارقىلى تۇرعىنداردىڭ جەكە مۇلىكتەرىن قورعاۋدى قامتاماسىز ەتۋدە، جاعالاۋدى نىعايتۋ جۇمىستارىنا قاتىسۋدا، سۋ تاسقىنى بولعان ەلدى مەكەندەردە سۋ بۇرۋدى جانە كانالداردى تازارتۋدا. بۇدان بولەك ادامداردى، جانۋارلاردى قاۋىپسىز جەرلەرگە ەۆاكۋاتسيالاۋ جۇمىستارىمەن دە شۇعىلدانىپ ءجۇر.
بۇگىندە قۇقىقتىق ءتارتىپ اسكەرلەرىنىڭ اسكەري قىزمەتشىلەرى جالپى ۇزىندىعى 10 شاقىرىمنان اساتىن ارىقتاردى تازارتىپ، ينەرتتى ماتەريالدارى بار 233 مىڭنان استام قاپشىق دايىندادى.
