ۇلتتىق كيىمدى سانگە اينالدىرۋ ماقساتىندا ارنايى جۇمىس توبى قۇرىلدى
استانا. KAZINFORM - قازاقستاندا ۇلتتىق كيىم ۇلگىسىن قوعامعا ەنگىزۋ جانە جاستار اراسىندا سانگە اينالدىرۋ بويىنشا ارنايى جۇمىس توبى ۇسىنىستار ازىرلەپ جاتىر. بۇل تۋرالى مادەنيەت جانە اقپارات مينيسترلىگىنىڭ اگەنتتىك جولداعان ساۋال جاۋابىندا ايتىلعان.
- ۇلتتىق كيىمدەردى دارىپتەۋ مەن جاڭعىرتۋ ەلىمىزدىڭ مادەني قۇندىلىقتارىن ساقتاپ، جاستاردىڭ ۇلتتىق بولمىستى تانۋىنا جول اشۋ باعىتىندا ماڭىزدى. وسى ماقساتتا بىرنەشە باستاما قولعا الىندى. مەملەكەت باسشىسى قاسىم- جومارت توقايەۆتىڭ 2024-جىلعى 15-ناۋرىزدا اتىراۋ قالاسىندا وتكەن ۇلتتىق قۇرىلتايدا بەرگەن حاتتامالىق تاپسىرماسىنىڭ 3.7-تارماعىنا سايكەس ۇلتتىق ستيلدەگى كيىم كيۋ تاجىريبەسىن ىلگەرىلەتۋ جانە تانىمال ەتۋ جونىندە تاپسىرما بەرىلدى. اتالعان تاپسىرما اياسىندا ۇلتتىق كيىم ۇلگىسىن قوعام ومىرىنە ەنگىزۋ جانە جاستار اراسىندا سانگە اينالدىرۋ بويىنشا ۇسىنىستار ازىرلەۋ ءۇشىن ەۋرازيالىق ديزاينەرلەر وداعىنىڭ ءتوراعاسى ەرمەك اسىلحانوۆ، تانىمال ديزاينەر قايروللا ابىشيەۆ، ەتنو-ديزاينەرلەر وداعىنىڭ ءتوراعاسى ك. كودەكوۆ تاعى باسقا بەلگىلى ديزاينەرلەر قاتارىنان ارنايى جۇمىس توبى قۇرىلدى. ءوز كەزەگىندە جۇمىس توبى مادەنيەت، ءبىلىم بەرۋ جانە سول سياقتى الەۋمەتتىك سالا قىزمەتكەرلەرى ءۇشىن ۇلتتىق كولوريت پەن ويۋ- ورنەك ەلەمەنتتەرى بار كوستيۋمدەردىڭ ەسكيزىن ازىرلەپ، مۇددەلى مەملەكەتتىك ورگاندارعا ۇسىنىس رەتىندە جولدادى، - دەپ جاۋاپ بەردى مادەنيەت جانە اقپارات ۆيتسە-ءمينيسترى قانات ىسقاقوۆ.
ونىڭ ايتۋىنشا، بۇگىندە ەل اۋماعىندا ۇلتتىق كيىم كيۋ پراكتيكاسى جۇيەلى جولعا قويىلعان.
- وتكەن جىلدان بەرى مەملەكەت باسشىسىنىڭ تاپسىرماسىمەن ناۋرىز مەيرامىنىڭ ونكۇندىگى تۇجىرىمداماسى اياسىندا «ۇلتتىق كيىم» كۇنى دەپ جاريالانىپ، ەلىمىزدەگى مەملەكەتتىك ورگاندار مەن ۇيىمدار قولداۋ ءبىلدىرىپ كەلەدى. ءبىرقاتار مەملەكەتتىك ورگان مەن كاسىپورىن اپتانىڭ بەلگىلى ءبىر كۇنى، جوعارى وقۋ ورىنداردا ءار بەيسەنبى ۇلتتىق كيىم كۇنى بولىپ جاريالانىپ، قىزمەتكەرلەر مەن ءبىلىم الۋشىلار ۇلتتىق كيىم كيىپ كەلۋ ءداستۇرىن قولعا العان. بۇل باستاما ۇلتتىق بىرەگەيلىكتى ساقتاۋعا جانە كۇندەلىكتى ومىردە ۇلتتىق قۇندىلىقتاردى جاڭعىرتۋعا باعىتتالىپ وتىر. وتاندىق ديزاينەرلەر مەن ءسان ۇيلەرى ۇلتتىق ەلەمەنتتەردى زاماناۋي سانمەن ۇيلەستىرىپ، جاڭا توپتامالار شىعارىپ جاتىر. بۇل كيىمدەر ءتۇرلى ءسان اپتالىقتارىندا كورسەتىلىپ، ۇلتتىق كيىمدى جاڭا تۇرعىدان قايتا تانۋعا مۇمكىندىك بەرىپ كەلەدى. ماسەلەن، استانا قالاسى مەن پاۆلودار جانە اقتوبە وبلىستارىندا 2023-جىلدان بەرى «تاقيا-fest» فەستيۆالى تۇراقتى وتكىزىلىپ كەلەدى. الەۋمەتتىك جەلىلەر مەن اقپارات قۇرالدارىندا ۇلتتىق كيىم تۋرالى بەينەروليكتەر، تانىمدىق ماقالالار مەن فوتوجوبالار جاريالانىپ، ۇلتتىق كيىم جايلى اقپارات كەڭ اۋديتورياعا ناسيحاتتالىپ جاتىر. بۇل باعىتتاعى جۇمىستار ءارى قاراي جالعاسادى، - دەيدى ول.
بيىل «ناۋرىزناما» ونكۇندىگى اياسىندا «18-ناۋرىز - ۇلتتىق كيىم كۇنى» ەلىمىزدىڭ بارلىق اۋماعىندا ۇلتتىق كيىمدەر شەرۋى ءوتتى.
- اتاپ ايتقاندا، اقتاۋ قالاسىندا 5 مىڭنان استام ادامنىڭ، اتىراۋ قالاسىندا 3 مىڭنان استام ادامنىڭ قاتىسۋىمەن ۇلتتىق كيىم شەرۋى، كوكشەتاۋ قالاسىندا 1600 ايەل قاتىسقان كيمەشەكتەر شەرۋى (قازاقستاننىڭ گيننەس رەكوردتار كىتابىنا ەندى) ءوتتى. بۇل كورسەتكىش وتكەن جىلمەن سالىستىرعاندا 10 ەسە وسكەنىن كورسەتتى. مينيسترلىك مۇددەلى مەملەكەتتىك ورگاندارمەن بىرلەسىپ قوعامدا، سونىڭ ىشىندە جاستار اراسىندا ۇلتتىق كيىم كيۋ ءۇردىسىن كۇندەلىكتى ادەت پەن قالىپقا اينالدىرۋ باعىتىندا ءتۇرلى شارالار قابىلداپ كەلەدى، - دەپ تولىقتىردى ءمينيستردىڭ ورىنباسارى.
سونداي-اق مينيسترلىك ۇسىنعان مالىمەتكە سۇيەنسەك، ەلىمىزدىڭ جوعارى وقۋ ورىندارىندا ۇلتتىق كيىم كيۋ تاجىريبەسى تاربيەلىك ءىس-شارالار ارقىلى دارىپتەلىپ جاتىر.
- «ءداستۇرلى كيىم نەنى بىلدىرەدى؟»، «قازاق ۇلتتىق كيىمى: شىعۋ تەگى مەن بولاشاعى» سەكىلدى كۋراتورلىق ساعات وتكىزىلەدى. «ۇلتتىق كيىم كۇنى» جانە «ناۋرىز» مەرەكەسى اياسىندا «ۇلتتىق كيىم - ۇلتتىڭ كورىنىسى»، «ethno Kun»، «بايان سۇلۋ مەن قوزى كورپەش» بايقاۋلارى، «ۇزدىك ۇلتتىق كيىم» كونكۋرستارى، «ۇلتتىق كيىم - ۇلتتىڭ كورىنىسى» كورمەلەرى جانە «Nauryz Fest» فەستيۆالدەرى ۇيىمداستىرىلادى. سول سياقتى مەكتەپكە دەيىنگى جانە ورتا ءبىلىم بەرۋ ۇيىمدارىندا «ءبىرتۇتاس تاربيە باعدارلاماسى» جۇزەگە اسىرىلىپ جاتىر. باعدارلامادا بۇل سالانىڭ بارلىق دامۋ باعىتتارى قامتىلعان، ونىڭ ىشىندە ۇلتتىق كيىمدى كيۋ تاجىريبەسىن ەنگىزۋ جانە ناسيحاتتاۋ ءىس-شارالارى قاراستىرىلعان، - دەلىنگەن حابارلامادا.
ايتا كەتسەك، بيىل بۋرابايدا وتكەن ۇلتتىق قۇرىلتايدا مەملەكەت باسشىسى قاسىم-جومارت توقايەۆ بولمىسىمىزدىڭ ماڭىزدى كورىنىسى ۇلتتىق كيىمدى جان-جاقتى دارىپتەۋ كەرەكتىگىن ايتقان ەدى.
- بەت-ءجۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق، - دەدى پرەزيدەنت.
ەسكە سالايىق، ەلىمىزدە ۇلىستىڭ ۇلى كۇنى ءاز ناۋرىزدى تويلاۋ اياسىندا 18-ناۋرىز «ۇلتتىق كيىم» كۇنى بولىپ بەلگىلەنگەن. وسى ورايدا Kazinform ءتىلشىسى قازاق مادەنيەتىنىڭ ماڭىزدى جانە اجىراماس اتريبۋتى ىسپەتتەس ۇلتتىق كيىمدەرگە تالداۋ جاساعان ەدى.
