ۇلتتىق كينونى قولداۋ ورتالىعى 99 كينوجوباعا اشىق قورعاۋعا جولداما بەردى
استانا. KAZINFORM - الماتىدا ۇلتتىق كينونى قولداۋ ورتالىعى مەملەكەتتىك قاراجاتتان ۇمىتكەر كينوجوبالاردىڭ اشىق قورعاۋىن وتكىزۋدە، دەپ حابارلايدى 24kz.
بۇل - ءۇشىنشى ىرىكتەۋ كەزەڭى. بايقاۋ ءادىل ءوتۋ ءۇشىن ۇلتتىق كينونى قولداۋ مەملەكەتتىك ورتالىعىنىڭ الەۋمەتتىك جەلىدەگى پاراقشاسى مەن YouTube ارناسىندا تىكەلەي ەفيردە ءتورت كۇن بويى كورسەتىلىمدەر جۇرەدى. جالپى بيىل اۆتورلاردان 444 ۇسىنىس تۇسكەن.
اشىق قورعاۋعا 99 كينوجوبا جولداما العان. ولار تاريحي، ۇلتتىق قۇندىلىقتاردى دارىپتەيتىن فيلمدەر. ەلدەگى عىلىمي جەتىستىكتەر جايلى جانە تانىمدىق باعىتتا دەرەكتى فيلم تۇسىرسەك دەيتىندەر دە كوپ. انيماتسيا باعىتىندا دا ءبىراز جوبا بار. باعالاۋ كەزىندە سسەناريدىڭ تاقىرىپقا ساي بولۋى، دراماتۋرگيالىق قۇرىلىمى جانە كەيىپكەرلەر بەينەسىنىڭ اشىلۋى دا ەسكەرىلەدى.
نۇرجان جالاۋ قىزى، ساراپتاما كەڭەسىنىڭ مۇشەسى:
- جوبانى ۇسىنۋشىلاردىڭ ۇسىنعان تاقىرىپتارىنىڭ اراسىندا كادىمگى جۇرەگىڭە جول تاباتىن، كوڭىلىڭدى وزىڭە قاراي بۇراتىن سونداي جاقسى-جاقسى تاقىرىپتار بار. مىسالى، الەۋمەتتىك تاقىرىپتار، تاريحي تاقىرىپتار، بالالارعا ارنالعان انيماتسيالىق تاقىرىپتار. قىزىق، بالالارعا ارنالعان تاقىرىپتار كەيبىر ميستيكالىق دۇنيەلەردى ۇسىنعان.
ادىلەت وماروۆ، ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ورىنباسارى:
- بۇدان كەيىنگى كەزەڭ ۆەدومستۆوارالىق كوميسسيانىڭ وتىرىسى بولادى. ول جەردەن الدىڭعى جىلعى كوميسسيانىڭ شەشىمىنە، تاجىريبەلەرگە سۇيەنسەك، سوڭىندا جيىرما شاقتى جوبا ىرىكتەلىپ الىنادى. بۇل دەگەنىمىز، ۇلكەن سۇزگىدەن وتەدى دەگەن ءسوز.
