ۇلتتىق دومبىرا كۇنىنە وراي قىزىلوردالىق وقۋشىلار قوعامدىق كولىكتەردە كۇي ورىندادى
قىزىلوردا. KAZINFORM - قىزىلوردا قالاسىنداعى قوعامدىق كولىكتەردە جاس ونەرپازدار ۇلتتىق دومبىرا كۇنىنە وراي كۇي ورىنداپ، جولاۋشىلاردىڭ قۇلاق قۇرىشىن قاندىردى. بۇل تۋرالى قالالىق قوعامدىق دامۋ بولىمىنەن حابارلادى.
- بۇگىن قىزىلوردالىق جاس دومبىراشىلار ۇلتتىق رۋحتى وياتقان تاماشا باستامامەن حالىقتى قۋانتتى. اۆتوبۋس ىشىندە كۇمبىرلەتە توگىلگەن «بالبىراۋىن» كۇيى جولاۋشىلاردىڭ كوڭىلىن كوتەرىپ، كەرەمەت اتموسفەرا سىيلادى. جاس كۇيشىلەر وسىنداي يگى باستاما ارقىلى ەل ىشىندە ۇلتتىق ونەردى دارىپتەۋگە ۇلكەن ۇلەس قوسىپ ءجۇر، - دەلىنگەن حابارلامادا.
جولاۋشىلارعا مەرەكەلىك كوڭىل-كۇي سىيلاعان - ءمادينا ەراليەۆا اتىنداعى قىزىلوردا قالالىق مادەنيەت ۇيىندەگى «بالبۇلاق» دومبىرا ۇيىرمەسىنىڭ قاتىسۋشىلارى.
- ءبىز 10 مەن 14 جاس ارالىعىنداعى مەكتەپ وقۋشىلارىنىڭ بويىنا قارا دومبىرانىڭ قاسيەتىن سىڭىرۋگە تىرىسامىز. بالالاردىڭ ۇلتتىق اسپاپتى ۇيرەنۋگە ىنتا- ىقىلاسى جوعارى. ۇيىرمەدە ونعا جۋىق بالا بار. ولار بۇگىن قوعامدىق كولىكتەردە قۇرمانعازىنىڭ «بالبىراۋىن» كۇيىن ورىنداپ، قالا تۇرعىندارىنىڭ مەرەكەلىك كوڭىل- كۇيدى سەزىنۋىنە ىقپال ەتتى، - دەدى ۇيىرمە جەتەكشىسى ارۋ وسپانوۆا.
بۇعان دەيىن قوعامدىق كولىكتەردە مادەنيەت ۇيىنە قاراستى اجەلەر ءانسامبلى ونەر كورسەتكەن. وسى جولى شىعارماشىلىق ۇجىم وزدەرىن باسقاشا قىرىنان كورسەتكىسى كەلىپ، بالالاردىڭ ونەرىن ورتاعا سالدى.
ال كەشە قىزىلوردادا ۇلتتىق دومبىرا كۇنىنە وراي مىرزا توقتابولات ۇلىنىڭ 175 جىلدىعىنا ارنالعان «سىر تولقىنى» اتتى II رەسپۋبليكالىق كۇيشىلەر بايقاۋى ءوتتى.
