ۇلتتىق عىلىم اكادەمياسى تاراتىلدى
استانا. قازاقپارات - ەلىمىزدە «قازاقستان رەسپۋبليكاسىنىڭ ۇلتتىق عىلىم اكادەمياسى» رەسپۋبليكالىق قوعامدىق بىرلەستىگى تاراتىلدى، دەپ حابارلايدى 24kz.
بۇگىن الماتىدا جالپى جينالىس ءوتىپ، ۇيىم جارعىسىنا سايكەس ونى ەرىكتى تۇردە تاراتۋ تۋرالى تاريحي شەشىم قابىلداندى. اكادەميكتەر بۇل شەشىمدى ەلدىڭ عىلىمي الەۋەتىن ءبىر ورتالىققا شوعىرلاندىرۋ ماقساتىندا قولدادى. 2023 -جىلى پرەزيدەنت جانىنداعى جاڭا ۇلتتىق عىلىم اكادەمياسى قۇرىلىپ، وعان مەملەكەتتىك مارتەبە بەرىلگەن. بۇل اكادەميا قىزمەتىنە ۇقساس فۋنكسيالاردىڭ قايتالانۋىن بولدىرماي، ونى جاڭا فورماتتاعى بىرەگەي ءارى ورنىقتى عىلىمي ورتالىق رەتىندە نىعايتۋعا مۇمكىندىك بەرەدى.
2023 -جىلى «عىلىم جانە تەحنولوگيالىق ساياسات تۋرالى» زاڭ قابىلداندى. سونىڭ ارقاسىندا جاس عالىمداردى قولداۋعا، ۋنيۆەرسيتەتتىك عىلىمدى دامىتۋعا، عىلىمي جاڭالىقتاردى كوممەرتسيالاندىرۋعا جانە وڭىرلەردەگى عىلىمي ينفراقۇرىلىمدى نىعايتۋعا ايرىقشا كوڭىل بولىنۋدە. بىرلەستىكتىڭ جالپى جينالىسىندا قابىلدانعان بۇگىنگى شەشىم - عىلىمي ساباقتاستىقتى ساقتاپ، عىلىم مەن ءوندىرىس اراسىنداعى بايلانىستى كۇشەيتۋ جولىنداعى ماڭىزدى قادام.
كەنجەحان ماتىجانوۆ، اكادەميك:
- پرەزيدەنت جانىنان جاڭا اكادەميا قۇرىلدى. مىنە، وسى توڭىرەكتە عالىمداردىڭ كوپتەن بەرى سۇراپ جۇرگەن ماسەلەسى وسى 2 اكادەميانى بىرىكتىرىپ، جالپى عالىمداردىڭ كۇش-جىگەرىن شوعىرلاندىرۋ. مەملەكەتتىك تۇرعىدان جۇمىس ىستەۋگە دە جانە جالپى عىلىم قۋاتىن ارتتىرۋدا بۇل عالىمدار بىرلىگى وتە قاجەت دۇنيە.
كارىمبەك قۇرماناليەۆ، ق ر پرەزيدەنتى جانىنداعى ۇ ع ا ديرەكتورلار كەڭەسىنىڭ تاۋەلسىز ديرەكتورى:
- بۇل ەندى پرەزيدەنت تاعايىنداعان ءوزىنىڭ جانىنداعى اكادەميانىڭ الەۋەتىن كوتەرەدى. بىلايشا ايتقاندا، اعا بۋىننىڭ دا، ورتا بۋىننىڭ دا، كىشى بۋىننىڭ دا جالعاستىعىن، ءداستۇر جالعاستىعىن عىلىمدى دامىتۋ جالعاستىعىنا بەت العان تۇس.
24.kz
