ۇلتتىق بانك باسشىسى ەڭ تومەنگى ايلىق تۋرالى: 85 مىڭ تەڭگە كۇنكورىسكە جەتپەيدى

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ بازالىق مولشەرلەمەنى بەلگىلەۋگە ارنالعان بريفينگىدە ەلدەگى ەڭ تومەنگى ايلىق كۇنكورىسكە جەتپەيتىنىن ايتتى.

«ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ب ا ق وكىلدەرىنىڭ سۇراعىن جاۋاپ بەرە وتىرىپ، ەڭ تومەنگى ايلىق كولەمى 85 مىڭ تەڭگە بولۋ كەرەك دەدى. ءسىز وسىنداي ۇستانىممەن كەلىسەسىز بە؟ مۇنداي مولشەر ەڭبەكتىڭ ادىلەتتى وتەمى دەپ ەسەپتەيسىز بە؟» دەپ سۇرادى جۋرناليست سپيكەردەن.

ۇلتتىق بانك ءتوراعاسى ەلدەگى ەڭ تومەنگى ايلىقتىڭ مولشەرىن بىرتىندەپ كوتەرۋ كەرەك دەپ سانايتىنىن جەتكىزدى.

«ەڭ تومەنگى ەڭبەكاقى دەگەن ءىس جۇزىندە تولەنەتىن ايلىق ەمەس دەپ ەسەپتەيمىن. بۇل - كوبىنە وزگە ەسەپتەۋ جۇرگىزۋگە قولدانىلاتىن ەكونوميكالىق كورسەتكىش. ياعني، زاڭ بويىنشا ينتەللەكتۋالدى ەڭبەككە دە، قارا جۇمىسقا دا، فيزيكالىق ەڭبەككە دە 85 مىڭ تەڭگەدەن از تولەۋگە بولمايدى. زاڭ بويىنشا وسىلاي. ال ادىلدىك اڭگىمەسىنە كەلسەك، 85 مىڭ تەڭگە جەتە مە، جەتپەي مە دەگەن سۇراق تۋىندايدى. ارينە، 85 مىڭ تەڭگە (كۇن كورۋگە - رەد. ) جەتپەيدى. قازاقستاندا ەڭ تومەنگى ەڭبەكاقى كوتەرىلىپ كەلەدى. 6 جىل بۇرىن ءتىپتى 28500 تەڭگە بولعان. سودان بەرى 42500 گە، 60 مىڭعا، ەندى 85 مىڭعا دەگەن سياقتى بىرتىندەپ كوتەرىلىپ وتىردى. بۇل ينفلياتسيا قارقىنىنان ايتارلىقتاي جىلدام دەۋگە بولادى. ءبىز سانالى تۇردە ينفلياتسيادان العا ءجۇرىپ وتىردىق. ءبىز ەڭ تومەنگى ەڭبەكاقى دەڭگەيىن ءىس جۇزىندەگى ايلىقتاردىڭ دەڭگەيىنە دەيىن كوتەرۋىمىز كەرەك. سوندا ەڭ تومەنگى ايلىق بۇكىل كورسەتكىشتەردى تومەننەن باستاپ كوتەرەر ەدى. سوندىقتان ەڭ تومەنگى ايلىق ءوسىپ كەلەدى»، - دەدى ول.

ۇلتتىق بانك باسشىسى ەڭ تومەنگى ايلىق مولشەرى ءارى قاراي دا ءوسۋ كەرەك دەپ ەسەپتەيدى.

ء«بىراق بۇل جەردە ەڭبەكتىڭ اقىسىمەن بىرگە ونىمدىلىگىنىڭ دە وسكەنىن قاراستىرۋىمىز كەرەك. ەڭبەك ونىمدىلىگى ارتپاسا، باسەكەگە قابىلەت جوعالادى. بۇل ءبىزدىڭ نارىقتى، تاۋارلاردى باسەكەگە قابىلەتسىز ەتەدى. مەن قىزمەتكەرلەرىمە جوعارى ايلىق تولەۋىم مۇمكىن. ونىڭ ەسەبىنەن تاۋاردى نەمەسە قىزمەتتىڭ وزىندىك قۇنى وسەدى. وسىلايشا نارىقتا باسەكەگە قابىلەت ازايادى. سوندىقتان بۇل - ماكروەكونوميكالىق تۇرعىدان دا، ميكروەكونوميكالىق تۇرعىدان دا زەردەلەيتىن نازىك ماسەلە. ەگەر مەنەن ەكونوميست رەتىندە سۇراساڭىز، جالپى ەڭ تومەنگى ايلىقتى كەزەڭ- كەزەڭىمەن ءوسىرۋدى قولدايمىن» - دەدى تيمۋر سۇلەيمەنوۆ.

ەسكە سالساق، قازاقستاندىقتار لايىقتى ءومىر ءسۇرۋ ءۇشىن قانشا تابىس تابۋى كەرەك دەپ ەسەپتەيتىنىن ايتقان ەدى.

اۆتور
ەسىمجان ناقتىباي