ۇلتتىق بانك باسشىسى پرەزيدەنتكە تەڭگەنىڭ 30 جىلدىعىنا دايىندىق جونىندە ەسەپ بەردى
مەملەكەت باسشىسى ۇلتتىق بانك ءتوراعاسى تيمۋر سۇلەيمەنوۆتى قابىلدادى، دەپ حابارلايدى Kazinform اقورداعا سىلتەمە جاساپ.
پرەزيدەنتكە ۇلتتىق بانكتىڭ بيىلعى قاڭتار-قازان ايلارىندا جۇزەگە اسىرعان اقشا-كرەديت ساياساتىنىڭ ناتيجەلەرى جونىندە ەسەپ بەرىلدى.
مەملەكەت باسشىسىنا قازاقستان ەكونوميكاسىنىڭ جاعدايى، ينفلياتسيانى تومەندەتۋ شارالارى، سونداي-اق التىن-ۆاليۋتا قورىنىڭ، ب ج ز ق مەن ۇلتتىق قور اكتيۆتەرىنىڭ جاي-كۇيى تۋرالى باياندالدى.
قاسىم-جومارت توقايەۆقا سيفرلىق تەڭگەنى ىسكە قوسۋعا دايىندىق جۇمىسىنىڭ بارىسى جانە سيفرلىق قارجىلىق ينفراقۇرىلىمدى دامىتۋ جوسپارى جايىندا مالىمەت بەرىلدى.
بۇدان بولەك، تيمۋر سۇلەيمەنوۆ ەكونوميكانى كرەديتتەۋ ءىسىن ىنتالاندىرۋ ءۇشىن ءتيىستى شارالار ازىرلەۋگە قاتىستى مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرمالارىنىڭ ورىندالۋ بارىسى تۋرالى اقپارات بەردى.
سونىمەن قاتار ۇلتتىق بانك ءتوراعاسى ۇلتتىق ۆاليۋتامىز - تەڭگەنىڭ 30 جىلدىعىن اتاپ وتۋگە دايىندىق جۇمىستارى جونىندە ايتتى.
كەزدەسۋ سوڭىندا قاسىم-جومارت توقايەۆ اقشا-كرەديت ساياساتىن ءتيىمدى جۇزەگە اسىرۋعا باعىتتالعان ءبىرقاتار مىندەت جۇكتەدى.
