ۇلتتىق بانك باسشىسى ازات پەرۋاشەۆتىڭ سىنىنا جاۋاپ بەردى

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ ءماجىلىس دەپۋتاتى ازات پەرۋاشەۆتىڭ ەلدەگى اقشا-نەسيە ساياساتىن سىناپ جازعان پايىمىنا پىكىر ءبىلدىردى.

«اق جول» پارتياسىنىڭ دەپۋتاتى ازات پەرۋاشەۆ بازالىق ستاۆكانى بۇگىن سىزدەر جاريالاعان دەڭگەيگە دەيىن ءتۇسىرۋ - تۇككە تۇرعىسىز شەشىم ەكەنىن جازدى. ءوز پارتياسىنىڭ جىلدار بويى بازالىق مولشەرلەمەنى 5-7 پايىز دالىزىنە دەيىن ءتۇسىرۋ كەرەكتىگىن ايتىپ كەلە جاتقانىمەن، قۇلاق اسپاي وتىرعاندارىڭىزدى ايتىپتى. پايىزدىڭ جوعارى بولۋى وندىرۋشىلەرگە اۋىر ءتيىپ جاتقانىن دا ايتقان. بۇل مالىمدەگە قانداي جاۋاپ ايتاسىز؟» - دەپ سۇرادى ب ا ق وكىلى.

تيمۋر سۇلەيمەنوۆ ءبىر پارتيانىڭ سىنىنا بولا بۇكىل حالىقتىڭ تىرشىلىگىنە كەرى اسەر ەتەتىن شەشىم قابىلداۋ مۇمكىن ەمەستىگىن تىلگە تيەك ەتتى.

«دەپۋتاتقا جاۋاپ دەگەن دۇرىس ەمەس شىعار. ويتكەنى ول ماعان تىكەلەي ساۋال جولداپ وتىرعان جوق. «اق جول» پارتياسىنىڭ ۇستانىمىنا كەلسەك، ول - كاسىپكەرلەردىڭ، ونەركاسىپ يەلەرىنىڭ پارتياسى. سوندىقتان دا ءماجىلىس قۇرىلىمىنداعى وتە ماڭىزدى پارتيا. ولار ءبىرىنشى كەزەكتە جانە باستى نەگىزدە كاسىپكەرلەردىڭ مۇددەسىن قورعايدى. سولاي بولۋى دا كەرەك. ءبىراق ءبىزدىڭ ەلدە كاسىپكەرلەر عانا تۇرىپ جاتقان جوق. حالىقتىڭ كوپشىلىگى كاسىپكەر ەمەس. جالدامالى جۇمىس ىستەپ جۇرگەندەر، ستۋدەنتتەر، بالالار، زەينەتكەرلەر بار دەگەن سياقتى… ينفلياتسيانىڭ اسەرى بارىنە تيەدى. ءبىراق بارىنە بىردەي دەڭگەيدە تيمەيدى. تابىسى كوبىرەك ادامدارعا ينفلياتسيا ازىراق اسەر ەتەدى. ال ايلىقتان ايلىققا دەيىن ءومىر ءسۇرىپ جۇرگەندەرگە كەز كەلگەن تاۋاردىڭ باعاسى كەز كەلگەن مولشەردە وسسە، اسەرى قاتتى سەزىلەدى. ازىق-تۇلىك تاۋارى بولسا دا، ازىق-تۇلىككە جاتپايتىن تاۋار بولسا دا سولاي. سوندىقتان ولاردى نازاردان تىس قالدىرا المايمىز. ءبىزدىڭ نەگىزگى مانداتىمىز - باعا تۇراقتىلىعى»، - دەدى ول.

تيمۋر سۇلەيمەنوۆ بازالىق ستاۆكا تومەن بولسا، كاسىپكەرلەردىڭ بانكتەن الاتىن نەسيە مولشەرلەمەسى دە تومەن بولاتىنىن اتاپ ءوتتى.

«ينفلياتسيا دەگەن - ماكروەكونوميكاداعى ەڭ قيىن باسقارىلاتىن كورسەتكىش، قۇبىلىس. سايكەسىنشە، ءبىز نەسيەنى ارزانداتۋدىڭ جولىندا بازالىق مولشەرلەمەنى تۇسىرە المايمىز. تۇسىرمەيمىز دە! بىزگە ينفلياتسيانى ءتۇسىرۋ قاجەت، سوندىقتان ينفلياتسيانى تومەندەتۋگە باعىتتالعان اقشا- نەسيە ساياساتىن جالعاستىرا بەرەمىز. كاسىپكەرلەر الاتىن نەسيەنىڭ پايىزى جەڭىل، ءوزى قولجەتىمدى بولۋى ءۇشىن ۇكىمەت تاراپىنان، «بايتەرەك»، جەرگىلىكتى اكىمدىكتەر تاراپىنان كوپتەگەن قولداۋ شارالارى قابىلدانعان. ياعني، ولار ءوز سايلاۋشىلارىنىڭ پىكىرىن جاريالاۋعا قۇقىلى. ءبىراق ۇلتتىق بانك بۇكىل حالىقتىڭ مۇددەسىنە جۇمىس ىستەيتىندىكتەن دە ۇلتتىق بانك ەسەپتەلەدى»، - دەدى ۇلتتىق بانك باسشىسى.