ۇلتتىق بانك ۆاليۋتالىق ينتەرۆەنتسيا جۇرگىزۋگە دايىن

استانا. KAZINFORM - ۇلتتىق بانك ۆاليۋتا باعامىنىڭ كۇرت وزگەرۋىنە جول بەرمەۋ ينتەرۆەنتسيا جۇرگىزۋگە دايىن. بۇل تۋرالى ۇلتتىق بانك ءتوراعاسىنىڭ ورىنباسارى ءاليا مولدابەكوۆا ايتتى.

«وكىنىشكە قاراي، سپەكۋلياتيۆتىك سيپاتتاعى مامىلەلەردىڭ كوبەيگەنى دە بايقالىپ وتىر. بۇل دا ايىرباس باعامىن تىم قۇبىلتىپ جىبەرەدى. وتىمدىلىك جەتكىلىكسىز جاعدايدا بۇل - باعامنىڭ ايتارلىقتاي اۋىتقۋىنا اكەلۋى مۇمكىن. ءبىز بۇعان دەيىن مالىمدەگەنىمىزدەي، ۇلتتىق بانك ۇلتتىق ۆاليۋتا باعامىنا ءتان وزگەرىستەرگە ءمان بەرە قويمايدى. ويتكەنى مۇنىڭ بارلىعى فۋندامەنتالدى فاكتورلارمەن دايەكتەلگەن. الايدا، سوڭعى كۇندەردەگى تەڭگەنىڭ قۇبىلۋىنا - تەك قانا فۋندامەنتالدى فاكتورلار ىقپال ەتپەي وتىرعانىن ايتۋعا ءماجبۇرمىز. وسىعان بايلانىستى ۇلتتىق بانك ۇلتتىق ۆاليۋتانىڭ قۇبىلۋ شاماسىن - شامادان تىس دەپ باعالايدى. ۇلتتىق بانك ىشكى ۆاليۋتا نارىعىنداعى جاعدايدى قاداعالاپ وتىر. اعىمداعى ۇردىستەر، اسىرەسە، سپەكۋلياتيۆتى كوڭىل- كۇي ساقتالعان جاعدايدا، ءادىل باعام قالىپتاستىرۋدى قالپىنا كەلتىرۋ ءۇشىن جانە ۇلتتىق ۆاليۋتا باعامىنىڭ كۇرت وزگەرۋىنە جول بەرمەۋ ءۇشىن ۇلتتىق بانك جەدەل ارەكەت ەتىپ، ۆاليۋتالىق ينتەرۆەنتسيا جۇرگىزۋگە دايىن»، - دەدى ۇلتتىق بانك وكىلى.

بۇعان دەيىن حابارلاعانىمىزداي، ۇلتتىق بانك ءتوراعاسىنىڭ ورىنباسارى ءاليا مولدابەكوۆا ۆاليۋتا نارىعىنداعى سوڭعى جاعدايلارعا تۇسىنىكتەمە بەردى. ايتا كەتسەك، سوڭعى كۇندەرى قور نارىعىندا دوللار باعاسى كۇرت قىمباتتاپ، 495 تەڭگەدەن استى.

اۆتور

ساياگۇل جارىلقاسىن