ۇلتتىق اۋىل شارۋاشىلىعى ساناعىن وتكىزۋگە 5,2 ميلليارد تەڭگە ءبولىندى
استانا. KAZINFORM - بيىل ەلىمىزدە اراعا 18 جىل سالىپ اۋىل شارۋاشىلىعى ساناعى وتەدى. ساناقتى وتكىزۋگە 5,2 ميلليارد تەڭگە ءبولىندى. بۇل تۋرالى ۇلتتىق ستاتيستيكا بيۋروسى Kazinform اگەنتتىگىنىڭ رەسمي ساۋالىنا جولداعان جاۋاپتا ايتىلعان.
- مەملەكەت باسشىسىنىڭ 2023 -جىلعى 26-ساۋىردەگى تاپسىرماسىنا جانە ۇكىمەتتىڭ 2023 -جىلعى 29-جەلتوقسانداعى №1248-قاۋلىسىنا سايكەس قازاقستان رەسپۋبليكاسىنىڭ ۇلتتىق اۋىل شارۋاشىلىعى ساناعىن 2025 -جىلى 1-تامىز بەن 20-قازان ارالىعىندا وتكىزۋ تۋرالى شەشىم قابىلداندى. پرەمەر-ءمينيستردىڭ 2023 -جىلعى 29-جەلتوقسانداعى №201- وكىمىمەن ۇلتتىق اۋىل شارۋاشىلىعى ساناعىن دايىنداۋعا جانە وتكىزۋگە بايلانىستى ۇيىمداستىرۋشىلىق جانە نۇسقاۋ بەرۋ ماسەلەلەرىن شەشۋ جونىندەگى ارنايى كوميسسيا قۇرىلدى. ۇلتتىق اۋىل شارۋاشىلىعى ساناعىن وتكىزۋ ءۇشىن 5 247,0 ميلليون تەڭگە سوماسىندا قاراجات ءبولىندى، - دەلىنگەن جاۋاپتا.
ساناق سۋبەكتىلەرىنە زاڭدى تۇلعالار جانە ولاردىڭ قۇرىلىمدىق نە وقشاۋلانعان بولىمشەلەرى، دارا كاسىپكەرلەر، ونىڭ ىشىندە مال شارۋاشىلىعى، وسىمدىك شارۋاشىلىعى جانە بالىق شارۋاشىلىعى قىزمەتىن جۇزەگە اسىراتىن شارۋا قوجالىقتارى جاتادى. سونداي-اق جەكە شارۋاشىلىعىن جۇرگىزۋگە ارنالعان جەر ۋچاسكەلەرى (ساياجاي، باقشا، كوكونىس ۋچاسكەلەرى) جانە اۋىل شارۋاشىلىعى ءۇي جانۋارلارى بار ءۇي شارۋاشىلىقتارى دا ەنەدى.
اتاپ ايتقاندا جەر جانە ەگىستىك القابى، اۋىل شارۋاشىلىعى جانۋارلارى مەن قۇستاردىڭ سانى، اۋىل شارۋاشىلىعى ماشينالارى مەن جابدىقتارى، مال شارۋاشىلىعى كەشەندەرى مەن قۇس فابريكالارى، وندىرىستىك عيماراتتار مەن اۋىل شارۋاشىلىعى جانۋارلارى مەن قۇستاردى ۇستاۋعا ارنالعان ءۇي- جايلار، اۋىل شارۋاشىلىعى ونىمدەرىن ساقتاۋعا ارنالعان عيماراتتار مەن قۇرىلىستار سانالادى.
بىلتىر بيۋرو ساناق پاراقتارىن، اقپاراتتىق جۇيەلەردى سىناقتان وتكىزىپ، ۇيىمداستىرۋ جۇمىسىنىڭ دەڭگەيىن باعالاۋ ءۇشىن 54 ەلدى مەكەندە پيلوتتىق اۋىل شارۋاشىلىعى ساناعىن وتكىزدى. سونىڭ ارقاسىندا كەمشىن تۇستار مەن كۇشەيتۋدى قاجەت ەتەتىن باعىتتار انىقتالعان.
- بيىل دايىندىق شەڭبەرىندە ءبىز قۇقىقتىق، ادىستەمەلىك، ۇيىمداستىرۋشىلىق، تەحنولوگيالىق جانە ماتەريالدىق-تەحنيكالىق سيپاتتاعى كەشەندى شارالاردى قولعا الىپ جاتىرمىز. بۇگىندە ايماقتاردا اۋىل شارۋاشىلىعى ساناعىن ۇيىمداستىرۋ ءۇشىن قاجەت بولىمدەردىڭ قۇرىلىمى بەكىتىلىپ، قىزمەتكەرلەردىڭ لاۋازىمدىق نۇسقاۋلىقتارى ازىرلەندى. ءۇي-ءۇيدى ارالاپ سۇراۋ جۇرگىزەتىن قىزمەتكەرلەردى جۇمىسقا الۋ ءتارتىبى پىسىقتالىپ جاتىر. جالپى، اۋىل شارۋاشىلىعى ساناعىن وتكىزۋ ءۇشىن 4,6 مىڭنان استام ساناق پەرسونالى تارتىلادى. ولاردىڭ بارلىعىمەن ءتيىستى ەڭبەك شارتتارى جانە قىزمەت كورسەتۋ كەلىسىمدەرى جاسالادى، - دەپ حابارلادى ۆەدومستۆودان.
ساناق ەكى فورماتتا وتكىزىلەدى: ءبىرىنشىسى - ونلاين، ەكىنشىسى - ينتەرۆيۋەرلەردىڭ ارالاۋى ارقىلى.
- 1-31-تامىز ارالىعىندا اۋىل شارۋاشىلىعى كاسىپورىندارى، دارا كاسىپكەرلەر، شارۋا قوجالىقتارى جانە جەكە قوسالقى شارۋاشىلىقتار سۇراقتارعا sanaq.gov.kz پورتالىندا ونلاين تۇردە جاۋاپ بەرە الادى. ساناقتان ونلاين تۇردە ءوتىپ ۇلگەرمەگەن ازاماتتاردىڭ ۇيىنە 20 قىركۇيەك پەن 20-قازان ارالىعىندا ينتەرۆيۋەرلەر بارادى. ولار ساناقتى پلانشەت كومەگىمەن جۇرگىزەدى. ساناققا ونلاين قاتىسۋشىعا ساناق پاراقتارىن تولتىرۋ بويىنشا كەڭەس بەرۋگە دايىنبىز. سايتتا ول ءۇشىن ارنايى نۇسقاۋلىقتار بولادى، سونىمەن قاتار 1446 بايلانىس ورتالىعىنداعى ارىپتەستەرىمىز بارلىق سۇراققا ەگجەي-تەگجەيلى جاۋاپ بەرەدى، - دەپ مالىمدەيدى ۇلتتىق ستاتيستيكا بيۋروسىنان.
ەسكە سالساق، ەلىمىزدە العاشقى اۋىل شارۋاشىلىعى ساناعى 2006-2007 -جىلدارى وتكىزىلگەن. سودان بەرى سالا سۋبەكتىلەرىن تۇگەندەۋ جۇمىستارى جۇرگىزىلگەن جوق.
ساناق اۋىل شارۋاشىلىعىنىڭ ناقتى جاعدايى تۋرالى تولىق اقپارات الۋ، اۋىل شارۋاشىلىعى ءونىمىنىڭ باسەكەگە قابىلەتتىلىگىن ارتتىرۋعا باعىتتالعان الەۋمەتتىك- ەكونوميكالىق ساياساتتى ازىرلەۋ، شارۋاشىلىق جۇرگىزۋشى سۋبەكتىلەردىڭ ناقتى سانىن انىقتاۋ ماقساتىندا وتكىزىلەدى.
ستراتەگيالىق جوسپارلاۋ جانە رەفورمالار اگەنتتىگىنىڭ اقپاراتى بويىنشا، بۇل سالادا سوڭعى جىلدارى رەسمي دەرەككوزدەردەگى مالىمەتتەردە ورتا ەسەپپەن %20 الشاقتىق قالىپتاسقان.
اۆتور
ەربول جانات
