ۇلتتار ليگاسى: قازاقستان قۇراماسى قاتارىنان ءۇشىنشى مارتە جەڭىلدى

استانا. KAZINFORM - بۇگىن، 13-قازاندا فۋتبولدان قازاقستان قۇراماسى UEFA ۇلتتار ليگاسىنىڭ В ديۆيزيونىندا ءتورتىنشى ويىنىن سلوۆەنياعا قارسى وتكىزدى.

اتالعان تۋرنيردە قازاقستاندىق فۋتبولشىلار ءالى جەڭىستىڭ كىلتىن تابا الماي كەلەدى. بۇعان دەيىن ءۇش كەزدەسۋدىڭ بىرەۋىندە تەڭ ويناسا، ەكەۋىندە قارسىلاستارىنا ەسە جىبەرىپ قويدى.

بۇل جونىنەن سلوۆەنيا قۇراماسى دا الدا تۇرعان جوق. قازىرگە دەيىن نەبارى ءتورت ۇپايدى مىسە تۇتقان ولار بۇگىنگى كەزدەسۋدە جەڭىسكە جەتۋ جولىن ىزدەيتىنى بەلگىلى ەدى.

كەزدەسۋ بارىسىندا قوس قۇراما ءبىر-ءبىرىنىڭ قاقپاسىنان ساڭىلاۋ تابا العان جوق. ويىننىڭ ءبىرىنشى كەزەڭىندە قازاقستاندىق شابۋىلشى ابات ايىمبەتوۆتىڭ الىستان تەپكەن دوبى قاقپا باعاناسىنا ءتيىپ، كەيىن قاراي سەرپىلدى. سلوۆەنيالىق فۋتبولشىلاردىڭ دا گول سوعاتىن بىرنەشە مۇمكىندىگى بولدى. دەگەنمەن تابلوداعى ەسەپكە وزگەرىس ەنگەن جوق.

ەكىنشى كەزەڭنىڭ العاشقى مينۋتتارىندا سلوۆەنيالىق فۋتبولشىلاردىڭ بەلسەندىلىگى بايقالدى. ناتيجەسىندە 53-مينۋتتا ولاردىڭ قاتارىنان يان ملاكار ءوز قۇراماسىن العا شىعاردى.

وسىلايشا قازاقستاندىق فۋتبولشىلار قارسىلاسىنا 0:1 ەسەبىمەن ەسە جىبەردى.

ەكى قۇراما قازىرگە دەيىن ءۇش مارتە كەزدەسىپ، بارلىعىندا سلوۆەنيالىق فۋتبولشىلار ءۇش ۇپايعا قول جەتكىزگەن ەدى.

ەندى ەل قۇراماسى الداعى ەكى ويىنىن قاراشا ايىندا وتكىزەدى. الدىمەن 11-قاراشادا ءوز الاڭىندا اۆستريانى قابىلداسا، 14-قاراشادا سىرت الاڭدا نورۆەگيامەن كەزدەسەدى.

اۆتور

ءادىلجان ۇمبەت