ەلتاڭبانى اۋىستىرۋعا قاتىستى شەشىم قابىلداۋ كوميسسياسى قۇرىلادى

استانا. KAZINFORM - ەلتاڭبانى اۋىستىرۋعا قاتىستى شەشىم قابىلداۋ كوميسسياسى قۇرىلادى. بۇل تۋرالى ۇكىمەت وتىرىسىنان كەيىنگى بريفينگتە قارجى ءمينيسترى ءمادي تاكيەۆ ايتتى.

«ەلباڭبانى اۋىستىرۋعا قاتىستى ماسەلە بەلگىلى ءبىر كەزەڭنەن بەرى تالقىلانىپ كەلە جاتقانىن جاقسى بىلەسىزدەر. پرەزيدەنت ۇلتتىق قۇرىلتايدا اتالعان ماسەلەنى تالقىلاۋدى ۇسىندى. مەملەكەت باسشىسى ەگەر قوعام بۇل ماسەلەگە جاپپاي قولداۋ بىلدىرسە، وندا ونى ودان ارى تالقىلاۋ قاجەتتىگىن ايتتى. ول ءۇشىن ارناۋلى كوميسسيا قۇرىلادى. كوميسسيا اتالعان ماسەلەنى تىڭعىلىقتى قاراستىراتىن بولادى. ەگەر بۇل ماسەلەگە قاتىستى وڭ شەشىم قابىلدانعان جاعدايدا، شىعىستارىنا قاتىستى قالعان جايتتار تۋىندايدى»، - دەدى مينيستر.

وسى ورايدا ءمادي تاكيەۆ ەلباڭبانى اۋىستىرۋعا قانشا قارجى جۇمسالاتىندىعىن، قانداي قارجى كوزدەرىنەن قارجىلاندىرىلاتىندىعىن ايتپادى.

«الدىمەن ءبىرىنشى ماسەلەنى شەشىپ الايىق، ودان كەيىن ەكىنشىسىن قاراستىرامىز»، - دەدى ول.

پرەزيدەنت ۇلتتىق قۇرىلتايدىڭ ءۇشىنشى وتىرىسىنداعى سوزىندە ۇلتتىق بىرەگەيلىگىمىزدىڭ مەملەكەتتىك رامىزدەردە ايقىن كورىنىس تاپقانىن اتاپ وتكەن ەدى.

«ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك. ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان-جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى»، - دەگەن بولاتىن قاسىم-جومارت توقايەۆ.

اۆتور

مارلان جيەمباي